“Rapahki Siohwa Oh Sapwellime Kehl”

“Siohwa kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.”​—2 KRONIKEL 16:9, New World Translation.

1. Dahkot kehl, oh iaduwen aramas kin doadoahngki arail kehl de manaman me re kin ahneki?

KEHL kin wehwehki soahng tohto, duwehte ahneki kaunda, manaman, de kamwekid mehteikan; koahiek en wia de kahrehda en wiawi; kehl en paliwar; de koahiek en madamadau de tiahk mwahu. Aramas sohte kin kihda rekord mwahu ni arail kin ahneki manaman. Lord Acton, emen soupoad, ni ah kosoia duwen manaman en sounpolitic kan, koasoia: “Manaman kin kasaminehla oh manaman unsek kin kasaminehla douluhl.” Poadoapoad en ahnsouwet kasalehda mehlel en koasoi kan en Lord Acton. Erein senturi 20: “ekei aramas ahneki manaman, a ekei kin wie lokolok pahn ar manaman” oh mehpwukat kin wiawi wuk sang mahs. (Eklesiasdes 8:9) Kaun mwersuwed kan kin doadoahngki ni ahl sapwung arail manaman oh kemehla aramas rar kei. Manaman me sohte kin audaudki limpoak, erpit, oh kopwungpwung me keper.

2. Kawehwehda iaduwen irair sarawi teikan kin kamwekid en Siohwa kin doadoahngki sapwellime manaman.

² Me weksang aramas tohto, Koht kin ketin doadoahngki sapwellime manaman ong me mwahu. “Kauno [“Siohwa,” NW] kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.” (2 Kronikel 16:9) Siohwa kin ketin doadoahngki sapwellime manaman ni ahl ehu me e kak kaunda manaman wet. Kanengamah kin irehdi Koht en dehr kasohrala me suwed kan pwehn kihong irail ahnsou mwahu en koluhla. Limpoak kin kamwekid Ih en kamarainehki soangen aramas koaros ketipin​—me pwung oh me sapwung kan. Kopwungpwung kin kamwekid Ih en kasohrala meno me kin kahrehda mehla, Sehdan me Tepil.​—Madiu 5:44, 45; Ipru 2:14; 2 Piter 3:9.

3. Dahme kahrehda sapwellimen Koht kehl roson kin kihong kitail kahrepe kitail en likih Ih?

³ Kehl roson me Samatail nanleng sapwellimanki kin kihong kitail kahrepe kitail en likih oh koapworopworki sapwellime inou kan oh perepe. Kisin seri men kin ahneki pepehm en meleilei nanpwungen aramas kan me e sehse ni ah kin kolokol teng pehn ah pahpa, pwehki e ese me ah pahpa sohte pahn mweidohng mehkot en kamedekihla ih. Me duwehte met, Samatail nanleng, meno “me diren manaman en doarehla,” pahn pere kitail sang soahng kan me kamedek ma kitail kin iang Ih kekeid. (Aiseia 63:1; Maika 6:8) Oh nin duwen Sahm mwahu men, Siohwa kin ahnsou koaros kapwaiada sapwellime inou kan. Sapwellime manaman me soh imwi kin wia mehn kamehlel me sapwellime ‘mahsen me I kin kapwilewei​—e pahn kapwaiada audepen kupwurei koaros.’​—Aiseia 55:11; Taitus 1:2.

4, 5. (a) Dahme imwikihla en Nanmwarki Asa likih ni unsek Siohwa? (b) Dahme kak wiawi ma kitail kin likih kaweid en aramas en kamwahuwihala atail kahpwal akan?

⁴ Dahme kahrehda e inenen kesempwal kitail en ahneki lamalam kehlail en dehr pohnsehsehla perepe sang rehn Samatail nanleng? Pwehki kitail kakete luwetkihla irair kan oh manokehla wasa me atail popohl mehlel kin kohsang ie. Met kin sansalda ni karasaras en Nanmwarki Asa, emen ohl me kin likih Siohwa. Erein kaundahn Asa, sounpein mehn Itiopia rar mahweniong Suda. Ni ah wehwehki me ah imwintihti kan pahn kana, Asa kapakapki: “Maing Kaun [“Siohwa,” NW] e mengeiong komwi en sewese karis luwet ehu duwehte omwi pahn ketin sewese karis kehlail ehu. Komwi ketin sewesei kiht, Maing Kaun [“Siohwa,” NW], at Koht, pwehki komwi me se koapworopworki, oh mwaromwi me se patohkidohn mahweniong karis lapalap wet. Maing Kauno [“Siohwa,” NW] komwi me at Koht; sohte emen me kak koapworopworki me e pahn poweikomwihdi.” (2 Kronikel 14:11) Siohwa kapwaiada en Asa pekipek oh kahrehong en kana douluhl.

⁵ Ahpw, mwurin ah kin papah lelepek sounpar tohto, en Asa kin likih sapwellimen Siohwa manaman en doarehla kin luwetala. Pwehn irehdi mahwen sang wehin Israel en paliepeng, e sohpeilahng Siria pwehn ale sawas. (2 Kronikel 16:1-3) Mendahki ah natih Nanmwarki Penadad en Siria kin imwikihla kauhdi Israel en sohla mahweniohng Suda, en Asa inou ong Siria kin kasalehda ah sohla kin likih Siohwa. Soukohp Ananai patohwanohng: “Dah? Mehn Sudan oh Lipia kan sohte neirail karis lapalahpie iangahki kiden werennansapw en mahwen oh soundak oahs? Ahpw pwehki omwi koapworopworki Kauno [“Siohwa,” NW], e ketikihong komwi en poweiraildi.” (2 Kronikel 16:7, 8) Mendahki met, Asa soikala kaweid wet. (2 Kronikel 16:9-12) Ni ahnsou me kitail kin lelohng kahpwal kan, kitail en dehr likih kaweid en aramas. Ahpw, kitail en kasalehda koapworopworki Koht, pwehki ma kitail pahn likih manaman en aramas e pahn imwikihla nsensuwed.​—Melkahka 146:3-5.

Rapahki Kehl Me Siohwa Ketikihda

6. Dahme kahrehda kitail en “rapahki Siohwa oh sapwellime kehl”?

⁶ Siohwa kak ketikihong sapwellime ladu kan kehl iangahki pere irail. Paipel kangoangehkin kitail en “rapahki Siohwa oh sapwellime kehl.” (Melkahka 105:4, NW) Pwekihda? Pwehki ma kitail kin wia soahng kan ni kehl en Koht, atail manaman pahn kadoadoahkohng kamwahupen, ahpw kaidehn kasuwedpen, mehteikan. Sohte emen me kin kihda karasepe mwahu duwehte Sises Krais, me wiahda manaman kapwuriamwei tohto ni “manaman en Siohwa.” (Luk 5:17) Sises kak wiahiong pein ih en kepwehpwehla, ndandla, de pil wiahla nanmwarki manaman men. (Luk 4:5-7) Ahpw, e sohte wia met pwe e doadoahngki manaman me Koht ketikihong ih en kaianehda oh en padahkki, en sewese oh en kamwahuwihla. (Mark 7:37; Sohn 7:46) Ia uwen e wia mehn kahlimeng mwahu ong kitail!

7. Irair kesempwal dahieu kitail kin kekeirada ni ahnsou me kitail kin wia mehkan ni kehl en Koht ahpw kaidehn sang ni pein atail kehl?

⁷ Pil ehu, ma kitail kin wia mehkan “ni kehlo me Koht ketikihda,” met pahn sewese kitail en aktikitik. Aramas akan me kin rapahki manaman ong pein irail kin pohnmwahsohla. Ehu irair en met iei Nanmwarki en Asiria Esar-haddon, me suweiki: “Ngehi me manaman, Ngehi me ahneki manaman koaros, Ngehi me wadawad, Ngehi me lapalap, Ngehi me kowahlap.” Me weksang met, Siohwa ketin “pilada me luwet akan pwe en ketin kasarowehkihdi me kehlail kan.” Ihme kahrehda, ma Kristian mehlel men kin suwei, ah en kin suweiki Siohwa, pwehki e ese me dahme e wiahdahr sohte kak pweikihda pein ah kehl. ‘Karakarahkala pahn nin limen Koht manaman’ pahn wahdo peren mehlel.​—1 Korint 1:26-31; 1 Piter 5:6.

8. Dahme kitail en keieu wia en alehdi sapwellimen Siohwa manaman?

⁸ Iaduwen kitail kak ale kehl en Siohwa? Mwohn mehkoaros, kitail anahne pekih ni kapakap. Sises kamehleleiong sapwellime tohnpadahk kan me Semeo pahn ketikihong irail ko me kin pekih reh ngehn sarawi. (Luk 11:10-13) Tehk iaduwen met kadirehkihla sapwellimen Krais tohnpadahk kan manaman ni ahnsou me re pilada en peikiong Koht ahpw kaidehn kaun en lamalam kan me idingkin irail en uhdisang arail kadehde duwen Sises. Ni ahnsou me re kin kapakapki sawas en Siohwa, arail kapakap mehlel kin pasapengla, oh ngehn sarawi kadirehkinirailla manaman en kaukaule kalohkiseli rongamwahuwo ni eimah.​—Wiewia 4:19, 20, 29-31, 33.

9. Kasalehda keriau en ahl kitail kak ale kehl en pali ngehn, oh koasoiahda ehu karasepen Pwuhk Sarawi pwehn kasalehda ah lipwalipw.

⁹ Keriau, kitail kak ale kehl en pali ngehn sang nan Paipel. (Ipru 4:12) Manaman en mahsen en Koht kin sansal erein ni mwein Nanmwarki Sosaia. Mendahki nanmwarki en Suda menet kihsangehr nan sahpwo dikedik en eni mwahl akan, ah diarada ni soh kasikpe Kosonned en Siohwa nan Tehnpas Sarawio kamwekidih ih en kalaudehla koasoandi en kamwakel wet.a Mwurin en Sosaia pein wadek ong aramas kan Kosonnedo, wehio pwon wiahda inou ehu rehn Siohwa, oh koasoandi en kamwakel keriau ehu, me mwuledek sang mehn keieuwo, en kihsang pwongih dikedik en eni mwahl wiawihda. Imwila mwahu en kamwakel me Sosaia wiahda iei me erein “eh ieias, e wia uwen eh kak pwe aramas akan en papah Kauno [“Siohwa,” NW].”​—2 Kronikel 34:33.

10. Ia kesiluh en ahl en ale kehl sang rehn Siohwa, oh dahme karehda e kesempwal?

¹⁰ Kesiluh, kitail kin ale kehl sang rehn Siohwa sang ni atail kin werekiong riatail Kristian kan. Pohl kangoangehki Kristian kan en iang towehda mihding kan kaukaule pwehn “nsenoh sawaspene ni kasalepen atail limpoak oh atail wiewia mwahu kan” oh en kangoange emenemen. (Ipru 10:24, 25) Ni ahnsou me Piter saledek sang nan imweteng ki manaman en Koht, e men mih rehn rie kan ni pali ngehn, ihme e inenlahngete ni imwen inen Sohn Mark, wasa me “aramas tohto pokonpenehr oh kapakap wasao.” (Wiewia 12:12) Ni mehlel, irail koaros kakete mihmi nan pein imwarail oh kapakap. Ahpw, re pilada en pokonpene pwehn kapakap oh kangoange emenemen erein ahnsou apwalo. Kerenlahng ni imwin en Pohl seiloak reirei oh keper ong Rom, e tuhwong ekei rie kan ni pali ngehn nan Puteoli oh mwuri, e tuhwong ekei me seiloakdo pwehn tuhwong ih. Iaduwen e mwekidiki met? “Ni Pohl e kilangirailda, e ahpw kapingkihong Koht oh e koapworopwor ahpw laudla.” (Wiewia 28:13-15) E kehlailkihda ah pil pwurehng patohng ienge Kristian kan. Kitail pil kak ale kehl sang atail werekiong iengetail Kristian kan. Uwen reirei en atail saledek oh kak werekiong emenemen riatail kan, kitail en dehr song en kekeid kelehpw pohn ahl tikitik me kohkohlahng nan mour.​—Lepin Padahk 18:1; Madiu 7:14.

11. Kasalehda ekei irair kan me “manaman lapalap eh uhdahn sapwellimen Koht, a kaidehk aht” kin keieu anahn.

¹¹ Sang ni atail kin kaukaule kapakap, onopki Mahsen en Koht, oh werekiong iengetail me pwoson kan, kitail kin “kehlailkihda amwail miniminiong Kauno oh manaman en sapwellime roson.” (Episos 6:10) Kitail koaros ni mehlel anahne “manaman en Kauno.” Ekei kin lokolohngki soumwahu me kin kaluwetehla paliwarail, ekei sang ni arail mahla de pwehki arail pwoud mehla. (Melkahka 41:3) Ekei kin dadaurete pahn uhwong kan sang arail pwoud me soh pwoson. Pahpa oh nohno kan, keieu pahpa de nohno me kiripw, kin diarada me ahneki doadoahk en mwohni kaukaule oh ni ahnsouwohte apwalihada peneinei ehu kin wia pwukoa toutou ehu. Kristian pwulopwul kan anahne kehl en pelianda kapwunod kan sang iengerail kan oh kak nda soh ong irail me men kihong irail wini en kasahliel kan oh kasonge irail en wia tiahk en nenek. Sohte emen en pweiek sang pekih rehn Siohwa en ketikihdo “manaman lapalap eh uhdahn sapwellimen Koht, a kaidehk aht” pwehn powekihdi soangen kahpwal pwukat.​—2 Korint 4:7.

“E kin ketin Kakehlahda me Luwet kan”

12. Iaduwen Siohwa kin kakehle kitail nan kalohk en Kristian?

¹² Pil ehu, Siohwa kin ketikihong sapwellime ladu kan manaman en kapwaiada arail doadoahk en kalohk. Kitail wadek nan kokohp en Aiseia: “E kin ketin kakehlahda me luwet oh me pwangadahr kan. . . . Ahpw irail kan me kin koapworopworki Kauno [“Siohwa,” NW], pahn onehda sapahl ar kehl. Re pahn kin kehlail, rasehng ikel kan; ni ar pahn kin tang, re sohte pahn pwangada; ni ar pahn kin alu, re sohte pahn luwetala.” (Aiseia 40:29-31) Pein wahnpoaron Pohl ale manaman en wiahda ah doadoahk en kalohk. Imwilahn met, mie lipwen ah kalohk. Ong Kristian kan nan Deselonika, e ntingihdi: “Pwe se kalohkiwohngkumwailehr Rongamwahwo, kaidehn ni lokaiahte, ahpw ni manaman oh ni Ngehn Sarawi.” (1 Deselonika 1:5) Ah kalohk oh padahk kin ahneki manaman en wekidala mouren irail kan me kin rong ih.

13. Dahme sewese Seremaia en dadaurete mendahki uhwong kan?

¹³ Ni ahnsou me kitail kin tuhwong irail kan nan wasahn kalohk me sohte kin perenki rong​—nan wasahn kalohk ehu me kitail kin pwurpwurehng kalohk erein sounpar tohto ahpw aramas kan sohte kin perenki rong—​kitail kakete mworuskihla. Seremaia kin ahneki soangen pepehmohte en mworusala sang ni uhwong kan, kapailok kan, oh soh nseno me aramas kan kin kasalehda. E mahsanih: “I solahr pahn tamanda Kauno, oh I solahr pahn kokohp ni mware.” Ahpw Seremaia sohte kak nennenla. Rohng me e kalohki “kin rasehng kisiniei me lullul nan kapehdi oh kin ngkengken nan tih kat en paliwereiet.” (Seremaia 20:9) Dahme pwurehng kakehle ih pahn kahpwal tohto? “Maing Kauno [“Siohwa,”], komwi ketin ieiang ie, komwi me roson oh manaman,” Seremaia mahsanih. (Seremaia 20:11) En Seremaia kin kalahnganki ire kesempwal en rohng me e kin kalohki oh ah pwais me Koht ketikihong kahrehong ih en mwekidikih sapwellimen Siohwa kangoang.

Manaman en Kamedekihla oh Manaman en Kamwahuwihala

14. (a) Ia uwen manaman en lowe? (b) Kihda karasepe kan me kin kasalehda duwen ohla me lowe kak wiahda.

¹⁴ Kaidehn manaman koaros me kitail ahneki kohsang rehn Koht. Karasepe ehu, lowe, kin ahneki manaman en kamedekihla oh en kamwahuwihala. Solomon kaweidki: “Mehla oh mour kin mih ni manaman en lowe.” (Lepin Padahk 18:21, NW) Imwilahn en Sehdan koasoi mwotomwot ong Ihp kin kasalehda duwen ia uwen laud ohla kak kohsang ni koasoi kan. (Senesis 3:1-5; Seims 3:5) Kitail pil kak kamedekihla aramas sang atail koasoi kan. Kauweki emen serepein pwulopwul me mworourou pahn kahrehong serepeino en sohla mwenge me kak imwikihla soumwahu. Sehse lamalam oh pwurepwurehng koasoia lokaia likamw duwen emen pahn kak kauwehla nanpwungen pirien werei kan. Ehi, kitail anahne koledi lowetail.

15. Iaduwen kitail kak doadoahngki lowetail en kakehle oh kamwahuwihala?

¹⁵ Ahpw, lowe kak kakehlahda emen oh e pil kak kaluwetehla aramas. Lepin padahk en Paipel mahsanih: “Lokaia mwahl kin kauwehla wasa rasehng kedlahs, ahpw lokaiahn loalokong kin kamwahwihala wasa.” (Lepin Padahk 12:18) Kristian erpit kan kin doadoahngki manaman en lowerail en kamweitala me nsensuwed kan oh me pahtou kan. Lokaiahn kamweit kan kak kangoange me pwulopwul kan me kin peipeiong kapwunod kan sang iengerail kan. Lokaiahn ese lamalam kak kamehleleiong riatail brother oh sister mahla kan me kitail anahnehte irail oh poakepoakehte irail. Lokaia kadek kak kaperenda irail kan me soumwahu. Mwohn mehkoaros, kitail kak doadoahngki lowetail en ehukihong irail ko koaros me men rong rohng manaman en Wehio. Kitail ahneki manaman en kalohkiseli Mahsen en Koht ma met kohsang nan mohngiongatail. Paipel mahsanih: “Ahnsou koaros me ke kak, sewese irail kan me kin anahne sawas.”​—Lepin Padahk 3:27.

Kadoadoahk Pwung en Manaman

16, 17. Ni arail kin kasalehda manaman me Koht ketikihong irail, iaduwen elder kan, pahpa kan oh nohno kan, ohl pwopwoud kan, oh lih pwopwoud kan kak kahlemengih Siohwa?

¹⁶ Mendahki e ketin lapalahpie, Siohwa kin ketin kaunkihda mwomwohdiso limpoak. (1 Sohn 4:8) Ni arail kin kahlemengih Siohwa, Kristian sounapwalih kan kin apwalih sapwellimen Koht pelin sihpw kan ni limpoak​—ni ahr kin doadoahngki ni ahl pwung, ahpw kaidehn doadoahngki ni ahl sapwung, arail manaman. Mehlel, sounapwalih kan ekei pak anahne en “panawih irail oh kakehlaka irail,” ahpw met en wiawi ni “padahk oh kanengamah.” (2 Timoty 4:2) Ihme kahrehda, elder kan en kaukaule doudouloale mahsen kan me wahnpoaron Piter ntingihwohng irail ko me ahneki manaman nan mwowohdiso: “Kumwail en kin wia doadoahk en silepen sihpw me Koht ketikihong kumwail, oh apwalih irail, kaidehk ni mehnseiren ahpw ni kupwur mwahu duwen kupwuren Koht. Kumwail wia amwail doadoahk, kaidehk pwehki amwail pahn ale pweipweiki, a pwehki amwail kin uhdahn ngoangki papah. Kumwail dehr kin aksoupeidi ong irail kan me mi pahn epwelpamwail, ahpw kumwail en wia kahlemengihpen pwihn sihpw.”​—1 Piter 5:2, 3; 1 Deselonika 2:7, 8.

¹⁷ Siohwa pil ketikihong pahpa kan oh nohno kan oh ohl pwopwoud kan manaman, oh manaman wet pahn anahne kadoadoahkohng en sewese, apwalih, oh kesempwaliki. (Episos 5:22, 28-30; 6:4) Mehn kahlimeng en Sises kasalehda me manaman kak ni lipwalipw kasansalda ni elen limpoak. Ma kaiahn kin toupahrek oh ahnsou koaros kohda, seri kan sohte pahn mworusala. (Kolose 3:21) Pwopwoud kan kin kehlailla ma Kristian ohl pwopwoud kan kapwaiada arail pwukoahn tapwi ni limpoak oh lih pwopwoud kan kin uhdahn wauneki pwukoahn tapwi me arail pwoud ahneki oh sohte kin tiengla mwohn arail pwukoa me Koht ketikihong irail pwehn kaunda de pwe nsenarailte en pweida.​—Episos 5:28, 33; 1 Piter 3:7.

18. (a) Iaduwen kitail en alasang kahlimeng en Siohwa ni atail koledi atail lingeringer? (b) Dahme irail ko me ahneki manaman en song katengehdi rehn irail ko me re apwalih?

¹⁸ Irail ko me ahneki manaman nan peneinei oh nan mwomwohdiso anahne en keieu kanahieng en koledi arail lingeringer, pwehki lingeringer kin kahrehda masak ahpw kaidehn limpoak. Soukohp Nahum mahsani: “Kauno [“Siohwa,” NW] sohte kin ketin mwadang engiengda, ahpw e me ketin manaman.” (Nahum 1:3; Kolose 3:19) Koledi atail lingeringer kin wia kilelen kehl, ahpw mweidala atail lingeringer kin wia kadehdehpen luwet. (Lepin Padahk 16:32) Mehn akadei me koaros nan peneinei oh nan mwomwohdiso, en ahneki iei en ahneki limpoak​—limpoak ong Siohwa, limpoak ong mehteikan, oh limpoak ong kosonned pwung kan. Limpoak iei sahlen minimin me keieu kehlail oh irair ehu me keieu kehlail en kamwekid aramas en wia dahme pwung.​—1 Korint 13:8, 13; Kolose 3:14.

19. Mehn kamehlele dahieu me Siohwa ketikihda, oh iaduwen kitail en mwekidiki met?

¹⁹ En esehla Siohwa iei en pohnese sapwellime manaman. Ki Aiseia, Siohwa mahsanih: “Ke sehse? Ke sohte kin rong? Me Kauno [“Siohwa,” NW] iei Koht unsek; iei ih me ketin kapikada sampah pwon. E sohte mwahn kin ngirala de luwetala.” (Aiseia 40:28) Sapwellimen Siohwa manaman sohte imwi. Ma kitail kin likih ih oh kitail sohte kin likih pein kitail, e sohte pahn ketin likidmeliehla kitail. E kamehleleiong kitail: “Kumwail dehr masak, pwe I kin ieiang kumwail. Kumwail dehr perki mehkot, pwe ngehi me amwail Koht. I pahn kin kakehlakei kumwail oh sewesei kumwail; I pahn kin apwalih kumwail oh doareikumwailla.” (Aiseia 41:10) Iaduwen atail pahn mwekidiki sapwellime epwel limpoak? Duwehte Sises, kitail en ahnsou koaros doadoahngki sohte lipilipil soahngen manaman dah me Siohwa ketikihong kitail pwehn sewese oh kakehle. Kitail en koledi lowetail pwehn kin kamwahuwihala ahpw en dehr kamedekihla. Oh kitail en ahnsou koaros pepehd ni pali ngehn, tengeteng nan pwoson, oh kehlailkihda manaman en Sounkapikpatail Lapalap, Siohwa Koht.​—1 Korint 16:13.

[Nting tikitik me mi pah]

Ke Kak Kawehwehda?

• Iaduwen Siohwa kin doadoahngki sapwellime manaman?

• Ni ahl dah kei kitail kak alehdi sapwellimen Siohwa manaman?

• Iaduwen manaman en lowe en kadoadoahk?

• Iaduwen manaman me kohsang rehn Koht kak wia kapai ehu?

[Kilel nan pali 12]

Sises doadoahngki sapwellimen Siohwa kehl pwehn sewese mehteikan

[Kilel nan pali 14]

Kitail ahneki koahiek en kalohkiseli Mahsen en Koht ma met kohsang nan mohngiongatail