Kitail en Koasoanehdi Atail Koasoandi kan Pwehn Wia Dah?
1 Kitail koaros kin medemedewe duwen dahme kitail pahn wia ni ahnsou kohkohdo. Irail me kin koapworopworki en mihmi nan sampah kin kasikasik mour soutuk nan sapwellimen Koht koasoandi pwung. Ahpw, mie soahng kan me kakete kihsang de kauwehla atail koapworopwor sang nan mohngiongatail. Kitail anahne nannanti pwehn rapahki mahs Wehio nan atail mour oh mwohnki soahng koaros me pid Wehin Koht oh en dehr lohdi pahn kasongosong kan iangahki ineng suwed kan (ineng en uduk) me kitail kin lelohng.—1 Sohn 2:15-17.
2 Sampah wet sohte kak wehwehki dahme irail me kin nantihong arail pali ngehn kin akadeiong oh koapworopworki. (1 Kor. 2:14) Mendahki aramas tohto kin nantihong ndandla, de ahneki manaman laud, de kepwehpwehla, kitail kin nantihong atail pali ngehn pwe kitail men kepwehpwehkihla paien nanleng. (Madiu 6:19-21) Ma kitail pahn songen kawukila atail madamadau ong madamadau me sampah kin ahneki duwen ahnsou kohkohdo, kitail kak lel atail mehn akadei kan me pid atail pali ngehn? Soahng kan me pid sampah pahn kak dirkihla mohngiongatail. Dahme kitail kak wia pwe met sohte pahn wiawi?
3 “Kitail en Ale Tehtehn Pei en Atail Kaun Sises Krais”: Ehu ahl kitail kak tehk ma kitail kin mwohnki Wehin Koht nan atail mour: kitail en kasawihada dahme kitail kin koasoia. Kitail kin kalapw koasoia duwen soahng kan me pid sampah duwehte dipwisou kan en sampah? Ma iei, kitail kak tehk ma mohngiongatail tepida luwetla ni pali ngehn. Mwein kitail anahne ‘ale tehtehn pei en atail Kaun Sises Krais, oh tokedihsang [atail] ngoangki kapwaiada [atail] ineng suwed kan.’—Rom 13:14.
4 Me pwulopwul kan kak ‘ale tehtehn pei en atail Kaun Sises Krais’ ni arail pahn koasoanehdi nan arail mour en kaunopada ong iang doadoahk en Regular Pioneer. Emen mwahnakapw me men wiahla Regular Pioneer tikida wasakis me arail tiahk ong mwahnakapw akan: aramas akan kin pehm me mwahnakapw kan anahne sukuhl pwehn ale doadoahk me pweimwahu pwehn kak apwalih mwahu eh peneinei ehu rahn. Ihme kahrehda, mwahnakapw menet tepida iang pisnis oh e kin pil iang mihding kan oh iang kalohk ahpw mihding kan oh kalohk sohla wehwe ong ih. Ahpw, mwurin mwo, e tepida medemedewe laud duwen Madiu 6:33 oh wehwehkihdahr me doadoahk en mwohni me e wia kin kapwang oh pil kin nohk kangala laud eh ahnsou oh eh kehl oh e sohla wehwe ong ih, kahrehda e pwurehng koasoanehdi eh koasoandi oh tepida Regular Pioneer. Met, e nsenamwahu pwe e kin ahneki nsen mwakelekel pwe e kin ‘wia uwen me e kak’ pwehn papah Siohwa.’
5 Pwuhk Sarawi kin kasalehda me e wia elen loalokong en koasoanehdi atail koasoandi kan ong ni ahnsou kohkohdo. (Lepin Padahk 21:5) Kitail en nantihong wia met oh ahnsou koaros tamataman en mwohnki mahs kupwuren Koht nan atail mour.—Episos 5:15-17.