Dehr Pweiek!
1 Ni atail kin onopada en kohla kalohk ihmw lel ihmw, ele ihmw me keieu en apwal iei pein imwatail. Pepehm en soh itar kin kahrehiong kitail en pweiek en kalohki duwen me mehlelo ohng “soangen aramas koaros.” (1 Timoty 2:4) Ahpw, kitail sohte anahne en ahneki pepehm en pweiek en kalohki Rongamwahuo. Dahme kahrehda?
2 Met Iei Sapwellimen Siohwa Mahsen: Siohwa kin doadoahngki Paipel en kapwilewei sapwellime mahsen kan. Ni atail kin ehukihong meteikan rohng wet, kitail kin kalohki sapwellime madamadau kan a kaidehn pein atail. (Rom 10:13-15) Ni emen aramas e kin soikala Rongamwahu en Wehio, irail kin soikala Siohwa. Ahpw, kitail en dehr mworusala. Kitail en koapworopworki me rohng wet pahn lel mohngiong en irail me pahn perenki karonge. Met iei irail akan me kin kasikasik irair en sampah en wekila oh irail kin pohnese arail anahn en pali ngehn.—Esekiel 9:4; Madiu 5:3, 6.
3 Siohwa kin Kakerenihodo Aramas kan: Aramas emen ele kin kahng rong kitail mahs ahpw met e kin luhke kitail pwe ele mie wekidekla kan nan irair en ah mour me kahrehiong ah mohngiong en mwuterekla. Siohwa kin kasalehda sapwellime kupwuramwahu ohng soangen aramas pwukat oh kin ‘kakerenihedohng ih aramas pwukat.’ (Sohn 6:44, 65) Ni met kin wiawi, kitail kin kaunopada pwe Siohwa en kak doadoahngki kitail oh idawehn kaweid en tohnleng kan pwe kitail en kak diar soangen aramas pwukat.—Kaudiahl 14:6.
4 Koht Ketikihong Kitail Sapwellime Ngehn Sarawi: Ngehn sarawi kin kahrehiong kitail en kak koasoi “ni eimah ki sapwellimen Siohwa manaman.” (Wiewia 14:1-3) Ni atail kin tamataman me kitail kin ale utuht manaman sang Siohwa nan atail doadoahk, kitail sohte pahn pweiek en koasoia duwen me mehlelo ohng irail mehn mpatail kan, iengetail tohndoadoahk kan, iengetail tohnsukuhl kan, atail peneinei oh irail me sukuhl laud oh kepwehpwe kan.
5 Sises Padahkihong Kitail Iaduwen Kitail Kak Wia Met: Sises kin doadoahngki soangen peidek kan me kin kamwekid atail lamalam kan, karasaras konehng kan, oh kawehwe pwung oh katapan kan en iren Paipel kan. E ketin kawehwehda duwen me mehlelo ni ahl mengei oh me kin kahrehiong aramas kan en men rong sang mohngiongarail. Ahl pwukat iei me pil keieu mwahu oh pil wie doadoahkte rahnwet. (1 Korint 4:17) Mwomwen atail kin padahk ele kin wekpeseng, ahpw Rongamwahu en Wehio kin duduwehte.
6 Kitail kin pai ni atail kin kak iang kisehn irail me Siohwa kin doadoahngki pwehn sewese aramas akan ni ahl ehu me tohrohr oh kesempwal. Kitail dehr pweiek en kalohk! Kitail en eimah oh mweidohng Siohwa en “ketikihong kitail ahnsou mwahu” pwe kitail en kak kalohki Rongamwahuo ohng meteikan.—Kolose 4:2-4.