Ia Iren Ahmw Kin Wia Mwengmwenge Ni Pali Ngehn?
1 Mie lepin koasoi ni lokaiahn wai me koasoia ‘we are what we eat’ oh met kin wehwehki me atail roson en paliwar kin poahsoankihda dahme kitail kin kang. Ei, mehlel, ma atail koasoandi en mwenge oh dahme kitail kin kang kin mwahu ong paliwaratail, kitail pahn kehlail oh sohte pahn kalapw soumwahu. Sises mahsanih: “E ntingdier nan Pwuhk Sarawi, ‘Kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht.’ ” Met kin wehwehki me atail koasoandi en mwenge ni pali ngehn pil pahn sewese kitail en kehlail de luwet ni pali ngehn. (Madiu 4:4) Eri, ia iren ahmw kin wia mwengmwenge ni pali ngehn? Ke kin lipilipil ni ahmw kin kang ekei mwengehn ngehn oh ekei soh? Ke kin karuwaru ni ahmw kin wia mwengmwenge? De ke kin ahnsou koaros mwohndi oh wia mwengmwenge ni pali ngehn ni meleilei (sohte karuwaru) oh kang soahng kan me kin sewese iuk en kekeirada ni pali ngehn?
2 Kasawihada Dahme Ke Kin Kang: Siohwa kin ketikihda “mwenge ahnsou me konehng” oh “kamadipw ehu me pahn direkihla kisin sak keieu kaselel oh wain keieu iou” sang “ladu lelepek oh loalokong.” (Madiu 24:45; Aiseia 25:6) Pwehn paiekihda kapai limpoak pwukat, kitail anahne nantihong mwenge mwahu ni pali ngehn.
3 Ke kak idek pein rehmw peidek pwukat: ‘I kin wadek Iren Rahn rahn koaros? I kin wadek oh medemedewe Pwuhk Sarawi rahn koaros? I kin kaunopada ong mihding kan koaros ni ahi kin onop pwuhk kan de makisihn kan me kitail kin wia nan mihding? I wadek pwuhk kapw kan duwehte pwuhk kapw kan en Isaiah’s Prophecy—Light for All Mankind?’
4 Sises mahsanih: “Meid pai irail kan me nsenohki arail pali ngehn . . . Meid pai me kin ngoangki kapwaiada kupwuren Koht; pwe Koht pahn ketin kaitarirailla.” (Madiu 5:3, 6) Eri, ken mwenge mwahu ni pali ngehn ni ahmw pahn audekihda ahmw mohngiong oh madamadau loalokong me pid duwen Koht.