Likih Siohwa en Kakehleiukala
1 Mie kahrepe tohto me kitail anahne likih Siohwa. Kalohki Rongamwahu “wasa koaros nin sampah” kin wia doadoahk apwal ehu. (Madiu 24:14) Ahnsou koaros, kitail kin peiong atail ineng suwed kan me kin kohsang paliwaratail me soh unsek. (Rom 7:21-23) Oh pil, “kitail mahweniong . . . koht akan me kaunda dih rotorot wet.” (Episos 6:11, 12) E sansal mwahu me kitail anahne sawas. Iaduwen kitail kak ale kehl me kin kohsang rehn Siohwa?
2 Ki Kapakap: Siohwa kin ketikihong sapwellime ladu kan me kin peki reh sapwellime ngehn sarawi kehlail. (Luk 11:13) Ke kin pehm me ke sohte koahiek en kalohk ihmw lel ihmw, nanial kan de kalohk ni ahmw doadoahngki telephone? Ke kin namenek en kalohk ni ahnsou soh lipilipil? Ahmw ngoangki kalohk wia tikitikla pwehki ke kilang me aramas akan sohte men rong ahnsou me ke kalohk ong irail? Dahme ke pahn wia ma emen pahn song en kauwehla ahmw pwoson? Ken likih Siohwa. Kapakapki kehl.—Pilipai 4:13.
3 Ki Pein Ahmw Onop Paipel: Duwehte kitail kin kehlailkihda mwengehn war, kitail pil kak kehlailda ni pali ngehn ni atail kin kaukaule onop Mahsen en Koht oh sawaspen Pwuhk Sarawi kan me “ladu lelepek oh loalokong” kin kihda. (Madiu 4:4; 24:45) Ni ahnsou me emen idek rehn Stanley Jones duwen dahme kin kakehle ih pwehn dadaur kelekelepw nan imweteng nan Saina sounpahr tohto mendahki sohte ehu Paipel reh, e sapeng: “Kitail kak kesihnenda teng nan pwoson. Ahpw, ni mehlel, kitail anahne onop Paipel mahs. Ma kitail sohte kin onop, loalatail sohte pahn kak kehlail ni pali ngehn.”
4 Ki Iang Towehda Mihding kan: Nan mihding en Kristian ehu me wiawi nan keieun senturi, Sudas oh Sailas “koasoakoasoiong me pwoson akan ahnsou reirei, penepeneu oh kangkakehlaka irail.” (Wiewia 15:32) Pil duwehte rahnwet, dahme kitail kin rong nan mihding kan kin kakehlailih atail kalahnganki soahng koaros me Siohwa kin wia ong kitail oh kin kakehlailih atail pwoson oh pil kin kamwekid kitail en kalohk. Mihding kan pil kin sewese kitail en tuhwong irail me kin “iang [kitail] doadoahk ong Wehin Koht,” oh re kin “inenen wia sawas laud” ong kitail.—Kolose 4:11.
5 Kitail anahne sawas nan “ahnsou apwal ekei ni imwin rahn akan.” (2 Tim. 3:1) Me pid irail me kin peki sawas sang rehn Siohwa pwehn ahneki kehl, kitail kak kamehlele me met pahn wiawiong irail: “Re pahn kin kehlail, rasehng ikel kan; ni ar pahn kin tang, re sohte pahn pwangada; ni ar pahn kin alu, re sohte pahn luwetala.”—Aiseia 40:31.