Kapai kan me Kin Kohsang Kalahnganki Sapwellimen Siohwa Limpoak —Pali 1
1 Wahnpoaron Sohn ntingihdi: “Kitail kin ahneki limpoak pwehki [Siohwa] Koht eh tepin limpoak ong kitail.” (1 Sohn 4:19) Ni ahnsou me kitail kin medemedewe soahng koaros me Siohwa ketikihong kitail, e kin kamwekid kitail en kasalehda atail kalahngan ong Ih. Sises wia mehn kahlemeng mwahu en kasalehda sapwellime kalahngan ni e peikiong Siohwa oh kalohk duwen mwaren Koht oh sapwellime Wehi. (Sohn 14:31) E pahn mwahu ma kitail pahn tehk duwen ekei ahl kan me kitail kak kasalehda atail kalahnganki sapwellimen Siohwa limpoak oh kapai kan me kin kohsang met.
2 Kalohk Sang Ihmw Lel Ihmw: Sises padahkiong sapwellime tohnpadahk kan iaduwen re pahn wia doadoahk en kalohki Wehin Koht. Sapwellimen Sises kaweid kasansalehda me re pahn kalohk sang ihmw lel ihmw oh kalohki Rongamwahu en Wehin Koht. (Luk 9:1-6; 10:1-7) Limpoak ong Koht oh mehn mpatail kan kin sewese kitail en nantihong kalohk sang ihmw lel ihmw mendahki kitail pahn lelohng uhwong de aramas sohte nsenohki dahme kitail kin koasoia. Ni atail pahn nantihong kalohk ihmw lel ihmw, pein kitail pahn paiekihda pwe atail pwoson oh atail koapworopwor pahn kehlailla.
3 Pwehki tohnleng kan kin sewese atail doadoahk en kalohk, kitail diarada aramas tohto me men mwenge oh nimpil en pali ngehn wehwehki re men sukuhliki padahk mehlel. (Kaudiahl 14:6) Ekei pak, tohnihmw kan nda me re wia arail kapakap oh peki sawas ahnsou me Sounkadehde men kohdo ni imwarail. Sister riemen iangahki seri men kalohk sang ihmw lel ihmw nan dekehn Caribbean. Ahnsou me sister kan tepida kaunopada pwehn pwurala imwara, serio ahpw kelepw kohla ni wenihmw ieu oh letelet. Emen lih ritingada wenihmwo. Ni ahnsou me sister kan kilang liho, re ahpw kohla reh oh koasoiong ih. E luhke irail en pedolong nan imweo oh kawehwe ong irail me e ahpwtehn kapakap pwe Koht en kadarodo Sounkadehde kan pwehn padahkiong ih duwen Pwuhk Sarawi!
4 Kalohk Nanial: Nan ekei wasa, e inenen apwal en diar aramas nan imwarail, ihme kahrehda, kalohk nanial kin wia ahl mwahu en tuhwong aramas pwukat pwehn kalohk ong irail. Oh pil, aramas tohto kin mihmi nan wasa kan me kitail sohte kak pedolong pwehn kalohk ihmw lel ihmw. Ahpw, atail kalahnganki sapwellimen Siohwa limpoak kin kamwekid kitail en doadoahngki ahnsou mwahu koaros pwehn tuhwong aramas akan oh kalohk ong irail duwen Wehin Koht, iangahki kalohk nanial.—Lepin Padahk 1:20, 21.
5 Pwurehng Pwurala Rehn Aramas akan: Pwehki kitail kin raparapahki irail me kin “nsenohki arail anahn en pali ngehn,” kitail anahne wia uwen me kitail kak en sewese irail ni pali ngehn. (Madiu 5:3) Met kin wehwehki me kitail pahn pwurehng pwurala rehn irail akan me kitail padokedi war en padahk mehlel oh kitail en pwurehng pwurala rehrail pwehn kalamwur war ko me kitail padokedi rehrail. (1 Kor. 3:6-8) Emen sister nan Australia kihong emen lih tract ehu mendahki lih sohte mwomwen men rong dahme sistero koasoia. Ahpw, sister nantihong pwurehng pwurala rehn liho. Ahnsou me sister tuhwong liho, liho ndaiong sister me, mwurin e tuhwong sister oh ale tract, e pwainda nah Pwuhk Sarawi—soahng kan me pweilaud. Mwurin mwo, sister tepida onop Paipel rehn liho!
6 Onop Paipel Rehn Aramas akan: Met kin wia doadoahk me keieu kaperen oh keieu kataman me kisehn atail doadoahk en kalohk. E kin wia kapai laud ong kitail en sewese aramas en sukuhliki duwen Siohwa, kilang irail kamwahuwihala arail mour pwehn kaperenda Ih, oh mwurin mwo, kitail irail inoukihong Koht arail mour oh papidaisla!—1 Dese. 2:20; 3 Sohn 4.
7 Nan Atail Doadoahk Ong Wehio en sounpwong kohkohdo, kitail pahn tehk duwen pil ekei ahl me kitail paiekihda pwehki kitail kin kalahnganki sapwellimen Siohwa limpoak.