Kapai kan me Kin Kohsang Kalahnganki Sapwellimen Siohwa Limpoak—Pali 2
1 Nan Atail Doadoahk Ong Wehio en November, pahnangin oaralap en “Kapai kan me Kin Kohsang Kalahnganki Sapwellimen Siohwa Limpoak—Pali 1,” se koasoia ahl pahieu me kitail kak kasalehda atail kalahnganki sapwellimen Siohwa limpoak nan kalohk. (1 Sohn 4:9-11) Nan artikel wet, se pahn kapataiong ahl limau pwehn pil wia met. Ni ahnsou me kitail pahn wia uwen atail kak en sewese aramas en kekeirada ni pali ngehn, kitail pahn ale kapai tohto sang Siohwa.
2 Kalohk Ni Ahnsou Sohte Lipilipil: Met kin wia ahl mwahu en diar aramas me kin “men mwenge oh nim me pwung” oh esehla dahme pwung oh kihdi pwuhk kan, brochure kan, de makisihn kan rehrail me pahn sewese irail ni pali ngehn. E pahn mwahu en ‘isaneki ahnsou mwahu koaros’ oh kalohk ahnsou koaros oh kalohk ong aramas sohte lipilipil me kitail kin tuhwong. (Episos 5:16) Mwein ele kitail anahne nantihong en eimah pwehn kalohk ni ahnsou sohte lipilipil, ahpw me kitail kin kalahnganki sapwellimen Koht limpoak oh wehwehki duwen dahme aramas akan kin anahne, kitail pahn kalohk ahnsou koaros.—2 Tim. 1:7, 8.
3 Emen misineri ale kapai laud pwehki e tepida kalohk ong emen ohl me iang ih nan taxi. Ohlo men rong dahme brother menet koasoia. E pwurehng pwurala rehn ohlo oh tepida onop Paipel reh. Ohlo eri iangala padahk mehlel oh kekeirada ni pali ngehn oh mwuhr wiahla elder men nan mwomwohdiso!
4 Ntingihdi Kisinlikou kan: Mwein ele ke sohte kak pedoila likin ihmw pwehn kalohk ihmw lel ihmw pwehki ke ahneki soumwahu de nan wehwe sakanakan. Ke kak ntingihdi kisinlikou kan, oh kisin kalohk ong aramas akan me ke ese, de irail me arail peneinei oh kompoakparail melahr, de irail me sohte mihmi nan imwarail ahnsou me ke kalohk nan arail wasa. Ke kak kihong nan pwuhdo ehu tract sang neitail tract ko me kin konehng atail ahnsou oh me kin kasalehda Rongamwahu sang Paipel oh kangoange aramaso en ntingdohng uhk pwe ken kak sapeng peidek kan me e ahneki. Ken ntingihdi pein ahmw adres de adres en Kingdom Hall ong return address; menlau dehr doadoahngki adres en Branch Office ong return address.
5 Kalohk Ni Ahmw Doadoahngki Telephone: Met kin wia ahl mwahu en kalohk ong aramas me sohte kin mihmi ahnsou me kitail kin kalohk ihmw lel ihmw. Ma kitail kin kalohk ni atail doadoahngki telephone ni elen loalokong oh koahiek, iangahki atail kasalehda limpoak oh kadek ong aramas akan, re pahn perenki rong dahme kitail kin koasoia. Atail Doadoahk Ong Wehio en February 2001, pali 5 oh 6, kin kihda mehn sawas mwahu ong dahme kitail pahn wia pwehn pweida mwahu ahnsou me kitail kalohk ni atail doadoahngki telephone.
6 Ni ahnsou me emen sister kalohk ni ah doadoahngki telephone, e idek rehn emen lih ma e kin medemedewe duwen dahme pahn wiawiong ih oh eh peneinei ni ahnsou kohkohdo. Liho nda me iei. Liho nda me, pwehki e kin pwunod laud, e kin kalap kelekelepw nan imweo oh sohte kin pedoila likio. Pwehki sistero kasalehda limpoak mehlel ong ih, liho mwekidkihda limpoak wet oh pwungki dahme sistero koasoanehdi ong ira pwehn tuhpene ni sidohwa me karanih imweo. Imwilahn met: liho mwadang pwungki en onop Paipel rehn sistero!
7 Kasamwo Irail me Kitail Sehse: Ma kitail men kasalehda limpoak ong mehn mpatail kan, kitail pahn pohnese irail me kapw kan me kin iang mihding kan nan Kingdom Hall oh kasamwo ih. (Rom 15:7) Sewese ih en wehwehki me e mihmi rehn aramas akan me kin nsenohki ah pali ngehn. Atail kasalehda limpoak mehlel ong irail iangahki atail idek rehrail ma re men onop Paipel kak kamwekid ih en ale atail sawas.
8 Atail Tiahk Mwahu: Ni atail kin tiahk mwahu, oh kitail kin kapingahki padahk mehlel. (Taitus 2:10) Ni ahnsou me irail me mihmi nan sampah kin kapinga Sounkadehdehn Siohwa kan, ni mehlel, re kin wauneki atail Koht. (1 Pit. 2:12) Met pil kin sewese meteikan en tepida kekeid nan ahl me kin kahluwalahng mour soutuk.
9 Dahme ke soh kousapahlih ahl limau pwukat me kin kasalehda atail kalahnganki sapwellimen Siohwa limpoak oh kapwaiada soahng pwukat? (1 Sohn 4:16) Ni ahmw wia met, ke pahn kak ale kapai tohto.