Doadoahngki Mahsen en Koht Ni Pwung
1 Ni ahnsou me Pilip kalohk ong ohl lapalap men, e “tapihda eh koasoi, tepida sang iren Pwuhk Sarawi wet, e ahpw koasoia ong ohlo duwen Rongamwahu en Sises.” (Wiewia 8:35) Pilip kin “doadoahngki mahsen en mehlel ni pwung.” (2 Tim. 2:15, New World Translation) Ahpw, nan rahnpwukat, irail me kin wia Sounapwalih en Circuit oh District kan kin kilang me sounkalohk tohto sohte kin doadoahngki neirail Paipel ahnsou me re kin kalohk ong aramas akan. Iaduwen—ke kin doadoahngki noumw Paipel ni ahnsou me ke kin kalohk?
2 Soahng koaros me kitail kin kamehlele oh padahkiong aramas akan anahne en poahsoanda pohn Mahsen en Koht. (2 Tim. 3:16, 17) Mahsen en Koht kin sewese aramas en karanih Koht oh kin kasukuhliki irail ong mour. Ihme kahrehda, e kesempwal en doadoahngki Pwuhk Sarawi nan atail kalohk oh met pahn mwahu sang koasoakoasoite duwen oaralap kan me kitail kin perenki koasoia. (Ipru 4:12) Pwehki pali laud en aramas kin wehwehki ekis duwen Pwuhk Sarawi, kitail anahne wadek sang Pwuhk Sarawi pwehn kasalehong irail kaweid mwahu me mihmi loale oh dahme Pwuhk Sarawi kin kasalehda duwen ahnsou kohkohdo.
3 Wadek Sang Nan Pwuhk Sarawi: Ke kak song kalohk ni wehnimw kan oh sohte wahda ehden kalohk. Ke kak kihong nan kisin ehd dahme ke men kihla oh kolokol Pwuhk Sarawi de wahda Pwuhk Sarawi nan ahmw pwekid. Eri, ni ahnsou me ke koasoi ong aramas emen, e pahn mengei en doadoahngki noumw Pwuhk Sarawi oh tohnihmwo sohte pahn lemeleme me ke wia padahk ong ih. Kolokol noumw Pwuhk Sarawi oh kesihnenda de mwohndi limwahn tohnihmwo pwe e kak iang uhk wadek noumw Pwuhk Sarawi. Mwein ele ke kak idek reh ma e men wadek iren Paipel ehu ni ngihl laud. Tohnihmw pahn keieu wehwehki audepen iren Paipelo ma ke pahn mweidong ih en pein kilang dahme ntingihdi nan Paipelo, oh met pahn wia mwahu sang tohnihmwo en rongete uhk en wadek Paipel. Ahpw, ni mehlel, ma ke men sewese ih en wehwehki iren Paipelo, ke pahn anahne kasalehong ih lepin lokaia kan me kin kawehwe duwen mour en ireo.
4 Padahk me Ke Pahn Doadoahngki Iren Paipel Ehute: Mwurin ahmw rahnmwahuwih tohnihmwo, ke kak nda: “Aramas akan kin ale kaweid ong arail mour sang soangsoangen wasa kan. Dahme ke lemeleme kin kak kihda kaweid me keieu mwahu nan atail mour? [Mweidong tohnihmw en sapeng.] Ia ahmw madamadau duwen dahme iren Paipel wet kasalehda? [Wadek Lepin Padahk 2:6, 7, oh mweidong tohnihmw en sapeng.] E sansal me loalokong en aramas sohte kin kak kamwahuwihala kahpwal kan, ahpw, ni mehlel, e kin kahrehong aramas tohto en pwunodada. Ahpw, erpit sang Koht uhdahn kak sewese aramas oh e kin kak wahdo kamwahu kan ong irail.” Mwurin mwo, ke kak kasalehda pwuhk de brochure me ke men kihla, oh kasalehda mehkot me pid iaduwen erpit sang rehn Koht kin kak sewese kitail nan atail mour.
5 Sises kin doadoahngki iren Paipel kan en sewese aramas me mohngiong mehlel. (Luk 24:32) Pohl kin pil doadoahngki iren Paipel kan en kasalehda me dahme e kin padahkiong aramas akan me pwung oh mehlel. (Wiewia 17:2, 3) Atail likih Siohwa oh atail peren pahn kekeirada ahnsou me kitail pahn koahiekla ni atail doadoahngki Mahsen en Koht ni pwung.