Miniminpene oh Sawaspene Nanpwungamwail
1 Ke kin kalap medemedewe oh pwuriamweikihla soangen oaritik en paliwaratail? (Mel. 139:14) Kakon koaros en paliwaratail kin sawaspene nanpwungarail oh sonamwahupene. Mahsen en Koht kin ketikihda karasaras wet me mwomwohdiso en Kristian kin rasehng paliwar me sonamwahu pwehki e kin tengetengkihpene kakon koaros. Pahnangin Kaunen Mwomwohdiso, Krais, tohnmwomwohdiso koaros kin ‘sonamwahupene oh . . . kin tengetengkihpene kakon koaros.’ (Episos 4:16a) Kahrehda, Siohwa kin doadoahngki sapwellime aramas akan me kin miniminpene pwehn wia soahng tohto me kapwuriamwei.
2 Emenemen tohnmwomwohdiso en keieun senturi kin “miniminpene” ni arail kin apwalih anahn en pali ngehn oh paliwar en emenemen irail. (Wiewia 2:44-47) Ki sapwellimen Siohwa sawas, irail kin powehdi uhwong laud me kin lelohng irail. (Wiewia 4:24-31) Sohte lipilipil wasa kan me irail ese me aramas akan kin mihmi ie, irail kin kalohkiseli Rongamwahu en Wehin Koht. (Kolose 1:23) Nan atail ahnsou, mwomwohdiso en Kristian kin miniminpene oh sawaspene pwehn wia soangen doadoahkohte me Kristian en mahs kan kin wia—doadoahk en kalohk—ahpw, sounkalohk en ahnsou wet kin wia doadoahk laud sang mahs. Soahng dah kan kin kahrehong tohnmwomwohdiso en miniminpene?
3 Miniminkihpene Padahk kan Sang Koht: Wasa koaros nan sampah, kitail kin miniminkihpene atail kaudok. Iaduwen met kak wiawi? Kitail kin pohnese me sapwellimen Siohwa pwihn sansal kin kihpeseng “mwengehn ngehn ni ahnsou konehng.” (Madiu 24:45, New World Translation) Kitail pil kalahnganki “kisakis kan me mih rehn ohl akan” me e ketikihda pwehn wia sounpadahk kan nan mwomwohdiso. Ni atail kin, ni lamalam aktikitik, ale sawas sang sapwellimen Siohwa koasoandi kan me kin kamwenge kitail ni pali ngehn, atail wehwehki Mahsen en Koht kin lalaudla oh kamwekid kitail en kahlemengih Sises nin duwen sapwellime tohnpadahk kan. Kitail en nantihongete onop Mahsen en Koht, oh wia uwen me kitail kak en “miniminpene nan pwoson.” (Episos 4:8, 11-13) Ke kin sewese minimin wet ni pali ngehn ni ahmw kin wadek Paipel rahn koaros?
4 Miniminkihpene Werekiong Kristian Teikan: Limpoak kin kamwekid kitail en miniminpene nanpwungatail nan mihding en Kristian kan. Ni mihding pwukat, kitail kin “nsenohki meteikan.” (Ipru 10:24, 25) Met kin wehwehki me kitail sohte pahn kilang mas liki en aramas teikan ahpw kitail en esehla riatail kan, oh kilang dahme Siohwa kin mahsanih irail—me irail kin wia aramas kesempwal. (Akkai 2:7) Ni atail kin rong duwen dahme re kin koasoia me kin kasalehda arail pwoson, atail limpoak ong irail kin laudla oh miniminiong irail pahn kehlailla. Aramas teikan kin wehwehki me ke kin kaukaule iang towehda mihding kan?
5 Iengetail Tohndoadoahk kan Nan Sahpwo: Ma kitail kin miniminiong iengetail kan ni atail kin kalohki Rongamwahu en Wehin Koht, met kin kaminiminpene kitail pwehki kitail wia kupwuren Koht. Wahnpoaron Pohl kin kesempwaliki “ienge tohndoadoahk kan ong Wehin Koht.” (Kolose 4:11) Koasoiapene ekspiriens kan oh sewese meteikan nan kalohk kin sewese kitail en kapwaiada atail pwukoa nin duwen Kristian kan oh pil kakehlailih atail miniminpene.—Kolose 3:14.
6 Mwekidki Manaman en Ngehn Sarawi: Ni atail kin nantihong wia kupwuren Koht, Siohwa Koht kin kapaiada kitail ni E kin ketikihong kitail sapwellime ngehn sarawi. Met kin sewese kitail en kamwahuwihala sawehwe kan me kin wiawi nanpwungatail oh kahrehong miniminpene en pweida. (Mel. 133:1) E kin kamwekid kitail en “wia uwen me kitail kak pwe kitail en kin dadaurete minimin me ngehn sarawi kin ketikihong kitail sang ni sapwellime kisakis en popohl me kin kolokolkitailpene.” (Episos 4:3) Emenemen kitail kak utungada minimin wet nanpwungen sapwellimen Koht aramas akan ni atail kin kasalehda wahn ngehn akan ong meteikan.—Kalesia 5:22, 23.
7 Ma kitail kin miniminpene ni atail kin mihmi pahnangin kaundahn Krais, eri “ehuehu kakon eh kin wiewia pwaise, paliwar unsek kin keirada oh laudla ni limpoak.” (Episos 4:16b) Met kin kalinganada mwaren Siohwa, “Koht me tepin atail popohl.”—Rom 16:20.