Siohwa Ketikihpene Sapwellime Peneinei

‘I peki ni ngidingid rehmwail kumwail en kin dadaurete minimin me sapwellimen Koht manaman kin kihong kumwail.’​—EP. 4:1, 3.

IA DUWEN OMW PAHN SAPENG PEIDEK PWUKAT?

Ia kahrepen Koht eh ketin wiahda sapwellime koasoandi?

Ia duwen atail kin ‘dadaurete minimin me sapwellimen Koht manaman kin kihong kitail’?

Dahme pahn sewese ‘kitail en kin kadekpene’?

1, 2. Ia kupwuren Siohwa ong sampah oh aramas?

DAHME ke kin medewe ni omw kin rong lepin lokaia wet “peneinei”? Ke kin medewe duwen limpoakpene oh peren? Ke kin medewe duwen omw peneinei ar kin sawaspene pwe kumwail en lel mehn akadei ehu? De ke kin medewe duwen wasa ehu me sohte keper me ken keirda ie, sukuhlki mehkot, oh koasoia duwen omw madamadau? Mwein ke kin medewe duwen mepwukat ma omw peneinei kin limpoakpene. Siohwa me ketin wiahda koasoandi en peneinei. (Ep. 3:14, 15) Kupwure iei koaros me kin mi nanleng oh sampah pahn wiahla peneinei ehu oh re sohte pahn perki mehkot, re pahn likih emenemen oh miniminpene.

² Mwurin Adam oh Ihp ara dipada, aramas solahr wia kisehn sapwellimen Koht peneinei. Ahpw met sohte wekidala kupwuren Koht. E uhdahn pahn ketin kapwaiada kupwureo me sampah uhdahn pahn wia paradais oh pahn direkihla nein Adam oh Ihp seri kan. (Sen. 1:28; Ais. 45:18) E ketin kaunopadahr soahng koaros me anahn pwe kupwureo en pweida. Pali laud en pwuhken Episos kin koasoia duwen miniminpene. Nan pwuhko, kitail kak pil wadek duwen dahme Siohwa ketin kaunopadahr. Met kitail pahn koasoiapene ekei iretikitik en pwuhk wet oh sukuhlki ia duwen atail kak utung kupwuren Siohwa me pahn kaminiminpene koaros me kin mi nanleng oh sampah nin duwen peneinei ehu.

DAHME SIOHWA KIN KETIN WIA PWE KUPWUREO EN PWEIDA?

3. Nin duwen Episos 1:10, dahme Koht ketin tepida wia ni ahnsou me konehng? Iahd me keieun kahk tepida wiawi?

³ Sapwellimen Siohwa wiewia kan oh kupwure kan kin pahrekpene. Eri, ni ahnsou me e ketin pilada, Koht ketin tepida wiahda koasoandi kan pwehn kaminiminpene sapwellime aramas oh tohnleng kan koaros. (Wadek Episos 1:8-10.) E ketin koasoanehdi mepwukat en wiawi ni kahk riau. Keieu, Koht ketin kaunopada irail me keidi kan pwe ren mi nanleng, wasa me re pahn pousehlahte doadoahk pahn kaundahn Sises Krais. E tepida wiawi ni Pendekos pahr 33, ahnsou me Siohwa tepida ketikihpene irail kan me pahn iang Krais kaunda nanleng ni eh ketin keieiraildi. (Wiewia 2:1-4) Pwehki meirong en Krais, Koht ketin kilangwohng me keidi kan nin duwen me pwunglahr kei reh oh warohng mour. Me keidi kan ese me re pwekpwekdahr nin duwen “sapwellimen Koht seri.”​—Rom 3:23, 24; 5:1; 8:15-17.

4, 5. Ia kahk keriau en sapwellimen Koht koasoandi?

⁴ Keriau, Koht ketin kaunopada irail kan me pahn kousoan nan Paradais nin sampah. Irail pwukat kin pwungki kaundahn Wehin Mesaia, me iangahki Krais oh pil me keidi kan nanleng. Pokon kalaimwuno me pitsang Armakedon iei irail me pahn tepin mour nan Paradais. (Kaud. 7:9, 13-17; 21:1-5) Eri, erein sounpar kid me Krais pahn kaunda, aramas lik kei pahn iasada pwe ren iang pokon kalaimwuno kousoan nin sampah. (Kaud. 20:12, 13) Medewehla uwen laud en ahnsou kitail pahn ahneki pwehn kasalehda me kitail kin miniminpene! Pokon kalaimwuno oh irail kan me pahn iasada iei ‘soahng koaruhsie nin sampah.’ Ni kaimwiseklahn sounpar kido, re pahn ale kasongosong. Koaros me lelepek kan pahn pwekpwekda nin duwen “sapwellimen Koht seri kan” nin sampah.​—Rom 8:21; Kaud. 20:7, 8.

⁵ Rahnwet, Siohwa ketin kaukaunop irail me keidi kan ren kousoan nanleng oh pil sihpw teikan ren kousoan nan Paradais nin sampah. Ahpw ia duwen emenemen kitail en utung sapwellimen Koht koasoandi wet?

‘DADAURETE MINIMIN ME SAPWELLIMEN KOHT MANAMAN KIN KIHONG KUMWAIL’

6. Mehnia iren Paipel kan me kasalehda me Kristian kan anahne kin pokonpene?

⁶ Paipel mahsanih me Kristian kan anahne kin pokonpene. (1 Kor. 14:23; Ipru 10:24, 25) Ahpw pwe kitail en miniminpene, kitail anahne wia laudsang en ihte tuhpene ni wasa teieu, duwehte aramas akan ar kin kohla ni wasahn netinet kan de wasahn kilang mwadong kan. Kitail kin miniminpene ni atail kin doadoahngki dahme Siohwa kin ketin padahkihong kitail oh pil mweidohng sapwellime manaman en sewese kamwahwihala pein kitail.

7. Ia duwen atail kin doadoahngki kaweid en ‘dadaurete minimin me sapwellimen Koht manaman kin kihong kitail’?

⁷ Pwehki kitail kin pwoson meirong en Sises, Siohwa kin ketin kilangwohng kitail nin duwen aramas pwunglahr kei, mehnda ma kitail wia sapwellime seri me keidi kan de kompoakepah sihpw teikan. Ahpw erein atail mihmi nan koasoandi wet, ahnsou koaros e pahn mie ahnsou kan me kitail pahn ahneki nanpwung suwed rehn meteikan. (Rom 5:9; Seims 2:23) Ihme kahrehda Paipel kin padahkihong kitail en kanengamah­iong emenemen. Ahpw dahme kitail anahne wia pwe kitail en miniminiong riatail Kristian kan? Kitail anahne sukuhlki en “mpahi, meleilei oh kanengamah,” met wehwehki kitail en aktikitik oh kadek. Pohl koasoia me kitail anahne doadoahk laud pwe popohl oh minimin en mie ni eh padahkihong kitail en ‘dadaurete minimin me sapwellimen Koht manaman kin kihong kitail sang ni sapwellime kisakis en popohl me kin kolokolkitailpene.’ (Wadek Episos 4:1-3.) Ehu ahl me kitail en doadoahngki kaweid wet iei en mweidohng sapwellimen Koht manaman en wekidala atail wiewia kan oh sewese kitail en kasalehda wahn manamano. Kitail pil sohte kin wia wiewia kan nin duwen ahnepen aramas, de soahng kan me Koht kin ketin kalahdeki. Wahn sapwellimen Koht manaman kin sewese kitail en kamwahwihala nanpwung suwed rehn meteikan. E kin kaminiminihkitailpene. Ahpw wiewia kan nin duwen ahnepen aramas kin katohreikitailpeseng.

8. Ia duwen wiewia kan nin duwen ahnepen aramas ar kin katohrepeseng aramas?

⁸ Ia duwen “wiewia kan nin duwen ahnepen aramas” ar kin katohrepeseng aramas? (Wadek Kalesia 5:19-21.a) Nenek kin katohrehsang emen Siohwa oh mwomwohdiso. Kamwahl kin kahrehda nsensuwed laud nan peneinei oh kak katohrehsang seri kan arail pahpa oh nohno oh pil me sohte wiahda kamwahlo sang eh pwoud. Tiahk samin kin kahrehda apwal en miniminiong Koht oh irail kan me poakohng ih. Ma ke men kapasapene soahng riau, ira koaros anahne mwakelekel pwe ira en kak pas. Wia me suwed ni ngidingid kin kasalehda me emen kin sapeikiong sapwellimen Koht kosonned kan oh sohte douluhl kin wauneki. Wiewia teikan nin duwen ahnepen aramas pil kin katohrepeseng aramas oh pil sang Koht. Mepwukat iei wiewia kan me Siohwa ketin kalahdeki.

9. Peidek dah kan kitail kak pein idek pwe kitail en kak ese ma kitail kin nannanti laud pwehn kolokol popohl oh meleilei?

⁹ Eri emenemen kitail anahne pein idek: ‘Ia uwen ei kin nannanti en kolokol popohl oh minimin rehn riei Kristian kan? Dahme I kin wia ni ahnsou me I kin ahneki nanpwung suwed rehn emen? I kin ndaiong kompoakepahi tohto pwe ien song ren pwungkin ie? I kin kasik elder kan ren kamwahwihala kahpwalo kahrehda I sohte anahne pein koasoiong aramaso oh wiahda popohl reh? Oh ma I ese me emen nsensuwed pahi, I sohte kin koasoiong pwe sen dehr koasoiapene kahpwalo?’ Ma kitail kin wia soahng pwukat, kitail kin kasalehda me kitail utung kupwuren Siohwa me e pahn ketin kaminiminpene koaros nin duwen peneinei ehu pahn kaundahn Krais?

10, 11. (a) Ia uwen eh kesempwal kitail en ahneki popohl rehn riatail kan? (b) Dahme kitail kak wia pwehn kolokol popohl oh ahneki kapai sang Siohwa?

¹⁰ Sises mahsanih: “Eri, ni omw pahn wiahiong Koht omw meirong pohn pei sarawi ehu, ke ahpw tamanda me riomw mehn Suhs men nsensuwed pahmw, pwilikihdi mahs omw meirongo mwohn pei sarawio, ke ahpw kohwei oh kapwungala nanpwungamwa; mwuri, ke ahpw pwurodo wia omw meirong ong Koht. Kapwungala mahs nanpwungamwa.” (Mad. 5:23-25) Seims ntingihedi me “pwung, iei wahn wiewia mwahu me irail kan me kin wia doadoahk en kamwahu kin kamwerehdi ni popohl.” (Seims 3:17, 18) Met wehwehki me kitail sohte kak doulahte wia dahme pwung ma kitail sohte ahneki popohl rehn meteikan.

¹¹ Karasepe, nan ekei sahpw akan me mie mahwen, soumwet akan kak kalaudehla arail doadoahngki sapwarail persent 35 ma sohte pakudang kan seridi nan pwehlo. Ni ahnsou me pakudang ehu kin pos, soumwet kan sohte kin doadoahngki sahpwo oh e kin kahrehda apwal en diar doadoahk nan wehi kan oh alehdi mwenge nan kahnimw kan. Ni ahlohte, e kin apwal ong kitail en pousehlahte kamwahwihala atail irair en Kristian ma mwomwatail kin kahrehda kahpwal en ahneki meleilei rehn meteikan. Met pahn kahrehiong kitail en duwehte pakudang me seridi nan pwehl. Ma ih mwomwen kitail met, kitail anahne wekidala mwomwatail. Ma kitail kin mwadang mahkohng meteikan oh wia soahng mwahu kan, kitail koaros kak ahneki popohl oh kapai sang Siohwa.

12. Ia duwen elder kan ar kak sewese kitail en miniminpene?

¹² “Sapwellime kisakis kan” de elder kan kak sewese kitail en “ehupene ni minimin en pwoson.” (Ep. 4:8, 13) Met wehwehki me elder kan kin sewese mwomwohdiso en miniminpene. Re kin sewese kitail kamwahwihala atail irair en Kristian ni arail kin ehuiong kitail nan atail papah Siohwa oh ni arail kin kohdo rehtail oh kihong kitail kaweid kan sang nan Paipel. (Ep. 4:22-24) Ma elder kan kin kihong uhk kaweid, tamataman me Siohwa ketin doadoahngki irail pwehn kaunopuhkada ken mour nan sampah kapwo. Oh elder kan, tehk mwahu me ni amwail kin kapwungala meteikan, met en kin wiawi ni ahl ehu me pahn kasalehda me kumwail men sewese irail.​—Kal. 6:⁠1.

“KUMWAIL EN KIN KADEKPENE”

13. Dahme kitail kin wia ma kitail sohte kin peikiong kaweid en Episos 4:25-32?

¹³ Episos 4:25-29 kasalehda soahng kei me kitail en dehr wia. Kitail sohte pahn likamw, lingeringer, pohnkahke oh nda soahng suwed kan. Ahpw kitail en koasoia soahng kan me mwahu oh kangoang. Emen me sohte kin peikiong kaweid wet kin katohrepeseng aramas. E pahn “kansensuwedihada” de pelianda sapwellimen Koht manaman oh iei sapwellime manaman me kin kaminiminpene aramas. (Ep. 4:30) Pwe kitail en ahneki popohl oh meleilei, kitail pil anahne doadoahngki dahme Pohl ntingihedi: “Kumwail kadohwanewei sang kumwail soangen mwakar koaros, soangen ineng suwed koaros, soangen lingeringer koaros, soangen men pei koaros, soangen lahlahwe koaros, soangen kailok koaros en nan kapehdamwail. A kumwail en kin kadekpene oh loallamwahupene, oh mahkpene duwen Koht eh ketin mahkohng kumwail rehn Krais.”​—Ep. 4:31, 32.

14. (a) Dahme kahrehda Pohl kihda kaweid en kin kadekpene? (b) Dahme pahn sewese kitail en kadek ong meteikan?

¹⁴ Pohl kihda kaweid en kadekpene pwehki ekei pak kitail sohte kin kasalehda kadek oh kitail anahne sukuhlki en kalaudehla atail kasalehda kadek. Kitail anahne esehla medewe me pepehm en meteikan kesempwalsang pein atail. (Pil. 2:⁠4) Ekei pak kitail ele kin men nda soahng kan me pahn kahrehda meteikan en kouruhr oh wiahiong kitail en mwomwen aramas loalokong. Ahpw ma e sohte kasalehda kadek, eri kitail en dehr wia met. Ma kitail kin taman en medewe mahs mwohn atail pahn kin lokaia, met pahn sewese kitail en kadek ong meteikan.

ESEHLA AHNEKI LIMPOAK OH WAHU NAN PENEINEI

15. Ia duwen Episos 5:28 eh sewese ohl pwopwoud kan ren wehwehki ia duwen arail pahn alasang Krais?

¹⁵ Paipel karasahiong nanpwungen Krais oh mwomwohdiso duwehte nanpwungen ohl pwopwoud oh eh pwoud. Mehn kahlemeng en Krais sewese ohl pwopwoud men en wehwehki me e anahne kihda kaweid oh poakohng eh pwoud oh apwalih. Mehn kahlemeng en Krais pil sewese lih pwopwoud men pwehn wehwehki me e anahne uhpahiong eh pwoud. (Ep. 5:22-33) Ni Pohl eh ntingihedi: “Ohl akan uhdahn pahn poakohng ar werek kan duwehte ar kin poakohng pein paliwararail kan,” ahn ihs mehn kahlemeng me e padahkihong ohl pwopwoud kan en alasang? (Ep. 5:28) Dahme e koasoia duwen Krais oh mwomwohdiso sewese kitail en sapengala peidek wet. E koasoia me Krais poakohng mwomwohdiso oh ketikihda sapwellime mour oh kamwakelehkihda “mwomwohdiso pihl” sang sapwellimen Koht mahsen. Eri, ohl pwopwoud men pwukoahki sewese emenemen tohn eh peneinei pwe ren ahneki nanpwungmwahu rehn Siohwa. Sang ni eh kin wia met, e kin utung kupwuren Koht en kaminiminpene koaros ni duwen peneinei ehu pahn kaundahn Krais.

16. Ia imwilahn ma pahpa oh nohno pahn apwalih ara pwukoa me Siohwa ketikihong ira?

¹⁶ Pahpa oh nohno kan anahne tamataman me Siohwa ketikihong irail pwukoahn apwalih neirail seri kan. E kansensuwed me aramas tohto nan sampah rahnwet kin “sempoak.” (2 Tim. 3:1, 3) Pahpa tohto kin soukautihong arail pwukoa oh met kin imwila suwed ong neirail seri kan oh kin kahrehda ren nsensuwed. Pohl padahkihong pahpa kan: “Kumwail sahm akan, kumwail dehr kamwakara mwahl noumwail seri kan. A kumwail kekeirirailda ni kaiahn oh madamadau en Siohwa.” (Ep. 6:4, NW.) Nan peneinei iei wasa me seri kan kin tepida sukuhlki duwen arail pahn kasalehda limpoak oh wauneki irail kan me ahneki manaman. Pahpa oh nohno kan me kin padahkih­ong neirail seri kan mepwukat kin utungada kupwuren Siohwa en kaminiminpene koaros. Pahpa oh nohno kan anahne sewese neirail seri kan ren pehm limpoak nan peneinei. Eri re anahne kanengamahiong arail lingeringer oh dehr wering neirail seri kan de nda soahng kamedek kan. Ni ahl wet, re kin padahkihong neirail seri kan mehn kasukuhl kesempwal kan duwen arail pahn kasalehda limpoak oh wauneki irail me ahneki manaman. Met pahn kaunopada seri ko ren mour nan sapwellimen Koht sampah kapw.

17. Dahme kitail anahne wia pwehn pelianda Tepil?

¹⁷ Kitail anahne pohnese me Tepil kin men ahnsou koaros kauhdi meteikan sang arail papah Koht oh e pahn wia soahng koaros me a kak pwehn kauhkitaildi. Me tohto nan sampah kin wiewia dahme Tepil men ren wia ni arail kin mweisang arail pwoud, mihmihpene ahpw sohte kapwopwoud, oh pil pwungki ohl en pwoudiki ohl oh lih en pwoudiki lih. Ahpw kitail sohte kin alasang soangen tiahk me tohnsampah rahnwet kin pwungki. Kitail kin alasang Krais. (Ep. 4:17-21) Eri, pwe kitail en pelianda Tepil oh nah ngehn saut kan, kitail anahne ‘pwuhriong nan tehtehn mahwen koaros me Koht ketikihong kitail.’​—Wadek Episos 6:10-13.

“WEWEIDKI LIMPOAK”

18. Dahme kitail anahne ahneki pwe kitail en kak miniminpene?

¹⁸ Kitail anahne limpoak ma kitail men miniminpene. Atail mohngiong kin direkihla limpoak ong atail “Kauntehmen” Sises Krais, ong atail “Kohttehmen,” Siohwa; oh pil ong emenemen. Ihme kahrehda kitail kin koasoanehdi teng en kolokol atail popohl oh minimin. (Ep. 4:3-6) Sises ketin kapakapki soangen limpoak wet: “I sohte kapakapkin irailte, pwe pil irail kan me pahn pwoson ie pwehki arail padahk. I kapakap pwe irail koaros en wiahla ehu. Maing Semei! Irail en wiahla ehu nan kupwurata, duwehte omwi ket rehi, oh ngehi rehmwi.” E pil mahsanih: “Ngehi me kahrehiong irail en esei komwi, oh I pil pahn usehla wiewia met pwe limpoak me komw ketin wiahiong ie en mi rehrail, oh I en pil kak mi rehrail.”​—Sohn 17:20, 21, 26.

19. Dahme ke koasoanedier teng ken wia?

¹⁹ Ele mie irair ehu rehtail me kitail apwalki wekidala, ahpw limpoak anahne kamwakid kitail en kapakap duwehte sounmelkahkao me koasoia: “Komw ketin padahkihong ie pwe I en kin papah komwi ni kapehdi unsek.” (Mel. 86:11) Kitail anahne koasoanehdi teng en pelianda Tepil ni eh kin song en katohreikitailsang Samatail limpoak oh riatail Kristian kan. Nin duwen sapwellimen Koht seri kompoak kei, kitail anahne ‘song en kahlemengih ih. Nan atail mour kitail weweidki limpoak’ nan atail peneinei, nan doadoahk en kalohk, oh pil nan mwomwohdiso.​—Ep. 5:1, 2.

[Nting tikitik me mi pah]

[Kilel nan pali 29]

Pwilikihdi eh meirongo pohn pei sarawio oh e kohla oh wiahda popohl rehn rie Kristiano

[Kilel nan pali 31]

Pahpa oh nohno kan, padahkihong noumwail seri kan ren kasalehda wahu