Kasalehda Lelepek en Kristian Ni Ahnsou me Emen Kisetail Piskensang Mwomwohdiso
1. Irair dahieu pahn kak wahdo apwal ong emen Kristian me pahn pid eh lelepek?
1 Selen limpoak nanpwungen tohnpeneinei kan pahn kak kehlail. Ahpw, met pahn pil kak wahdo apwal ong emen Kristian ni ahnsou me eh pwoud, de nah seri, de eh pahpa de nohno, de emen kisehn eh peneinei piskensang mwomwohdiso de pein katohre ih sang mwomwohdiso. (Madiu 10:37) Iaduwen wiewiahn Kristian lelepek kan ong emen kise me piskensang mwomwohdiso? E pahn weksang ma e kin koukousoan rehmwail? Keieu, kitail pahn kousapahlih dahme Paipel mahsanih duwen met, mouren kosonned akan me kin pid ong irail akan me kin piskensang mwomwohdiso oh irail akan me kin pein katohre irail sang mwomwohdiso.
2. Nin duwen dahme Paipel kin mahsanih, ia mwomwen wiewia en Kristian akan ong irail akan me piskensang mwomwohdiso?
2 Ia Mwomwen Atail Wiewia Ong Irail akan me Piskensang Mwomwohdiso: Mahsen en Koht kin padahkiong Kristian akan en dehr werekiong aramas akan me piskensang mwomwohdiso: “Ahpw, I koasoia duwen irail kan me kin wia riamwail [Kristian] ahpw kin nenek, kin noahrok, kin pwohngih dikedik en eni kan, kin karaunlikamw, kin kamamsakau de kin loallap suwed. Kumwail dehr pil kin patehng irail oh iang mwenge rehrail. . . . Kumwail kesepwekehsang nanpwungamwail aramas suwedo.” (1 Korint 5:11, 13) Mahsen en Sises me ntingihdi nan Madiu 18:17 kin pil pid duwen ire wet: “A wiahkihla ih mehn liki men de sounrik daksis men.” Aramas akan me kin rong mahsen en Sises kin wehwehki me irail mehn Suhs akan en ni ahnsowo sohte kin werekiong mehn liki kan oh irail sohte pil kin patehng sounrik daksis akan, oh re kin wiahkin irail aramas suwed ekei. Sises kin kaweidih sapwellime tohnpadahk kan en dehr werekiong aramas akan me piskensang mwomwohdiso.—Kilang The Watchtower (lokaiahn wai) en September 15, 1981, pali 18-20.
3, 4. Soahng dah kan me sohte konehng kitail en iang irail akan me piskensang mwomwohdiso oh pil irail me pein katohre irail sang mwomwohdiso wia oh koasoia?
3 Met kin wehwehki me Kristian lelepek kan sohte pahn koasoiong emen me piskenla duwen mehkan me pid pali ngehn. Ahpw, pil mie mehkot me kitail en dehr wia. Mahsen en Koht kin padahkiong kitail en ‘dehr pil kin patehng irail oh iang mwenge rehrail.’ (1 Korint 5:11) Ihme kahrehda, kitail sohte kin patehng emen me piskenla. Met kin wehwehki me kitail sohte pahn iang ih mwemweit, de picnic, de kamadipw, de mwadong, de iang ih kohla wasahn netinet de kilang kasdo, de mwohdpene en mwenge nan ihmw de nan imwen mwenge.
4 Iaduwen lokaiaiong aramas akan me piskenla? Edetehn Paipel sohte kin mahsanih duwen irair akan koaros, 2 Sohn 10 kin sewese kitail en wehwehki dahme Siohwa kupwurki kitail en wia: “Eri, ma emen pahn pwarodohng kumwail, ahpw sohte pwarkidohng kumwail padahk wet, kumwail dehr kasamwolong nan imwamwail, oh dehr rahnmwahwih.” The Watchtower (lokaiahn wai) en September 15, 1981, pali 25, koasoia: “Ni ahnsou me kitail kin ‘rahnmwahwih’ emen, met kin mwomwen wia tepin ewen kahk en kamengeiala koasoakoasoiong aramas menet oh ele kak wiahkihla ih kompoakepahmw. Kitail kin men wia tepin ewen kahk wet ong aramas emen me piskenla?”
5. Ni ahnsou me emen piskensang mwomwohdiso, dahme e kin kesehla?
5 Ni mehlel, makisihnohte (The Watchtower en September 15, 1981) ni pali 31 koasoia: “Ni ahnsou me emen Kristian kin lohdi pahn dihp oh anahne en piskensang mwomwohdiso, e kin kesehla: ah nanpwungmwahu rehn Koht; . . . oh pil e kin kesehla ah miniminiong rie brother oh sister kan, oh pil iangahki ah werekiong kise kan me Kristian.”
6. Ma emen Kristian kin kousoan rehn kise me piskenla nan ihmw ehu, met wehwehki me e anahne uhdi sang koasoiong ih, mwenge reh de patehng ih? Kawehwe.
6 Ong Tohnimwe kan: Eri, iaduwen ma peneinei en Kristian kin kousoanpene nan ihmw ehu oh emen irail eri pisikenla, met kin wehwehki me re sohte pahn kak koasoiong ih, mwenge reh, oh patehng ih ni arail kin wia arail wiewia kan ni ehuehu rahn? The Watchtower (lokaiahn wai) en April 15, 1991, pali 22 (footnote) koasoia: “Ma mie emen nan peneinei ieu me pisikenla oh irail kin koasoanpene nan ihmw ehu, emen me pisikenla pahn iang wiewia kan en peneinei nin duwen irail kin wia ni ehuehu rahn.” Kahrehda, tohnpeneinei wet pahn anahne pein wiahda arail pilipil me pid ia uwen laud en arail pahn mweidong ih en iang irail mwenge de wiewia en peneinei teikan. Ahpw, irail sohte men wiaiong brother oh sister teikan nan mwomwohdiso en medemedewe me arail wiewia kan ong aramas piskenlao kin duwehte ahnsou me e saikinte piskensang mwomwohdiso.
7. Iaduwen koasoandi me pid miniminkihpene soahng ngehnin kan nanpwungen tohnpeneinei kin wekila ni ahnsou me emen tohnpeneinei piskenla?
7 Nan makisihn en The Watchtower (lokaiahn wai) en September 15, 1981, pali 28, e kin kawehwehda duwen emen me piskenla de emen me pein katohre ih sang mwomwohdiso: “Ehupenehn pali ngehn me mie mahs—met e loplahr. Met kin pil pidada kise kan oh iangahki irail tohnpeneinei kan me kin kousoan reh nan ihmw ehu. . . . Met pahn wehwehki me peneineio pahn anahne wekid arail koasoandi kan me kin pid arail miniminkihpene soahng ngehnin kan. Karasepe ieu, ma ohl pwopwoudo me piskenla, eh pwoud lih oh nah seri kan ele e sohte pahn soanamwahuparail ma ohlo pahn wia onop Paipel en peneinei de wadawad en Paipel oh kapakap. Ma e men kapakap, duwehte ansoun mwenge, mie eh pwung en wia met nan imwe. Ahpw, tohnpeneinei teikan pahn kak wia pein arail kapakap kan ong Koht. (Lepin Padahk 28:9; Melkahka 119:145, 146) Ahpw, iaduwen ma emen tohnpeneinei me piskenla ahpw e kin kousoan rehn ah peneinei oh e men iang ah peneinei ni ansoun wadawad en Paipel de onop en Paipel? Eri, tohnpeneineio ele pahn mweidong en iang onopo ma e pahn rongorongte oh sohte pahn song en padahkiong irail de ehukihong irail pein ah madamadau kan me pid pelien lamalam kan.”
8. Pwukoa dahieu me irail Kristian pahpa oh nohno kan kin ahneki ong neira seri me piskenla me tikitik sang sounpar 18 oh me kousoan rehra?
8 Ma emen me pwulopwul (me tikitik sang sounpahr 18) piskenla oh e kin koukousoan rehn ah peneinei, eri, eh pahpa oh nohno me iangala Kristian ahneki pwukoa en apwalih ih. The Watchtower (lokaiahn wai) en November 15, 1988, pali 20, koasoia: “Irail anahne apwalih ih me kin pid mwenge, likou, oh wasahn kousoan, oh irail pil anahne kihong ih kaweid oh kaiahn nin duwen dahme Mahsen en Koht kin kasalehda. (Lepin Padahk 6:20-22; 29:17) Pahpa oh nohno limpoak kan ele kak koasoanehdi en onop Paipel rehn neira seri edetehn e piskenla. Mwein e pahn kak paiekihda laud ma irail pahn onop Paipel reh kelepw. De mwein ira pahn pilada me serio pahn iang koasoandi en onop en peneinei.”—Pil kilang The Watchtower (lokaiahn wai) en October 1, 2001, pali 16-17.
9. Ia uwen laud Kristian emen pahn kak koasoiong emen nan ah peneinei me piskenla ahpw ira sohte kin kousoanpene?
9 Tohnpeneinei kan me Sohte kin Mihpene Nan Ihmw Ehu: The Watchtower (lokaiahn wai) en April 15, 1988, pali 28 koasoia: “Irair pahn weksang ma emen me piskenla de emen me pein katohre ih sang mwomwohdiso sohte kin iang mih rehn ah peneinei. Ele irail pahn kak en koasoanehdi me re sohte pahn ehu ong douluhl kiserail me piskenlao. Edetehn mie mehkot me kin pidada peneinei me re anahne koasoiapene, irail pahn koasoiahte dahme kesempwal irail en koasoia oh sohte pahn doula oh koasoia soahng teikan,” wiewia wet pahn pahrekiong sapwellimen Koht kaweid en “dehr patehng mehmen” me wia dihp oh sohte koluhla. (1 Korint 5:11, New World Translation) Kristian lelepek kan anahne nantihong uhdi sang werekiong kiserail me piskenla, oh sohte pahn nohn daulihala koasoakoasoi duwen pisnes kan.—Pil kilang The Watchtower (lokaiahn wai) en September 15, 1981, pali 29-30.
10, 11. Irair dah kan emen Kristian pahn anahne teneki mwohn e pahn mweidong emen kise me piskenla en pwurodo oh kousoan reh?
10 The Watchtower padahkiong kitail duwen pil ehu irair me pahn kak pwarada: “Eri, dahme pahn kak wiawi ma emen kisetail me keren me rasehng neitail pwutak de atail pahpa de nohno me sohte kin kousoan rehtail ahpw piskenla, oh ehu rahn e men pwurodohng kousoanla rehtail? Peneinei kak wiahda arail pilipil me kin poahsoanda pohn irair me aramas mih loale. Karasepe ieu, pahpa de nohno piskenla ele soumwahuda de solahr kak apwalih pein ih ong mehkan me pid mwohni de paliware. Seri Kristian akan kin ahneki pwukoa ieu me kin poahsoanda pohn Paipel en sewese irail. (1 Tim. 5:8) . . . Pilipilo pahn kak poahsoanda pohn irair pwukat, duwehte anahn en pahpa oh nohno kan, ah elen madamadau oh nsenoh me mie rehn tapwin peneineio me pid kamwahupen tohnihmwo ong ni irair en pali ngehn.”—The Watchtower (lokaiahn wai) en September 15, 1981, pages 28-29.
11 Artikel wet pousehla oh koasoia duwen seri kan: “Ekei pak pahpa oh nohno Kristian akan kin mweidong neira seri pisikenla men en pwurodo oh kousoan rehrail ong lepin ahnsou ma e ahneki soumwahu en paliwar de madamadau. Ahpw, ni ehuehu ahnsou pwukat, pahpa oh nohno anahne teneki irair me seri mih loale. Iaduwen—seri piskenla menet mahs kin koukousoan kelepw ahpw met e mihla nan apwal oh sohte kak apwalih pein ih? De e men pwurehng pwurodo rehn eh peneinei pwehki e pehm me e pahn nsenamwahu wasao sang ah kelekelepw? Iaduwen ah wiewia kan oh ah elen madamadau? E pahn wahdo kasuwed (me rasehng ‘kisin ihs kis’) nan ihmwo?—Kalesia 5:9.”
12. Ia ekei kapai me kin kohsang kapwaiada koasoandi me pid irail me piskensang mwomwohdiso?
12 Kapai kan me kin Kohsang Lelepek ong Siohwa: Kapwaiada iren Pwuhk Sarawi kan me pid dehr patehng irail me piskenlahr akan oh kalekehkin uhk irail me wia dihp laud oh sohte koluhla wia mehkot kapai. Kapwaiada iren Paipel pwukat kin kolokol mwakelekel en mwomwohdiso oh kasalehda me kitail kin kolokol koasoandi en Paipel me pid tiahk mwakelekel. (1 Piter 1:14-16) E kin pere kitail sang irair suwed akan. (Kalesia 5:7-9) E pil kin kihong aramas me wiahda dihp laud ah ahnsou mwahu en alehdi kapai laud sang ni elen kaweid me kohwong ih, oh met pahn kak sewese ih en ahneki “popohl oh mour pwung.”—Ipru 12:11.
13. Wekidala dah kei emen brother oh rie serepein wiahda, oh met imwikihla dah?
13 Brother men oh rie serepein rong kapahrek nan Kapokon en Circuit oh ira wehwehkihda me ira anahne wekidala ara wiewia kan ong ara nohno me kin kousoan wasa tohrohr sang ira oh me pisikenla erein sounpahrehr weneu. Mwurin kapokono, brother menet telephonela ah nohno oh mwurin e kawehwe ong ih mwahu duwen uwen ara poakohng ih, e kawehwe ong ih me ira solahr pahn kak koasoiong ih—ihte ma mehkot kesempwal me pid peneinei me ira pahn anahne kaleleki ih. Mwurinte mwo, ara nohno eri tepida iang towehda mihding kan oh eri kapwuropwurodohng nan mwomwohdiso. Oh eh pwoud me sohte iang padahk mehlel tepida onop oh mwuri papidaisla.
14. Dahme kahrehda kitail anahne ni lelepek kapwaiada koasoandi me pid irail me piskensang mwomwohdiso?
14 Lelepek kolokol koasoandi ong me piskenlahr akan nin duwen me sansal nan iren Pwuhk Sarawi kan wia kasalepen atail limpoak ong Siohwa oh pil kihda pasapeng ong ih me kin karaunlikamwih Siohwa. (Lepin Padahk 27:11) Ma kitail pahn lelepek ong koasoandi pwukat, Siohwa pahn kupwurkin kitailla oh kapaiada kitail. Nanmwarki Depit ntingihdi met duwen Siohwa: “I kin kapwaiada sapwellimomwi kosonned akan koaros; I sohte men kauwehla sapwellimomwi mahsen kan. Komwi kin ketin loalopwoat ong irail kan me kin loalopwoat ong komwi.”—2 Samuel 22:23, 26.