Sewese Meteikan en Kalinganahda Siohwa
1 Rohng kesempwal ehu kin wia lohkseli ong aramas akan nan sampah pwon ahnsou wet: “Kumwail lemmwiki Koht oh kapinga sapwellime roson lapalahpie! Pwe e lelehr ahnsoun eh pahn ketin kadeikada tohn sampah kan. Kumwail poaridi mwohn silangi oh pwongih me ketin kapikada nanleng, sampah, madau, oh utuhnpihl kan!” (Kaudiahl 14:6, 7) E kin wia pwais kaselel kitail en iang lohkiseli rohng wet. Dahme aramas akan anahne wehwehki duwen Siohwa pwe ren kak lemmwiki oh kaudok ong Ih?
2 Mwaren Koht: Aramas akan anahne ese me Koht mehlelo mie mware oh e wekpeseng koht likamw tohto me aramas kin kaudokiong rahnwet. (Deud. 4:35; 1 Kor. 8:5, 6) Ni mehlel, irail soun nting en Paipel kan doadoahngki mwaren Koht pak tohto sang pak 7,000. Mehlel, kitail anahne doadoahngki atail loalokong oh padahkiong aramas akan duwen mwaren Koht ni ahl me konehng oh wahu, ahpw kitail en dehr ekihla mwaren Koht oh dehr namenek en doadoahngki mwaren Koht. Koht kin ketin kupwurki aramas koaros en ese mware.—Melkahka 83:18.
3 Sapwellime Irair kan: Pwehn kalinganahda Siohwa, aramas akan anahne ese soangen Koht dah Ih. Kitail anahne sewese aramas akan en wehwehki me Siohwa Koht kin sapwellimaniki limpoak laud, erpit, kopwungpwung oh manaman kehlail, oh pil irair kaselel teikan. (Eksodus 34:6, 7) Aramas akan anahne pil sukuhliki iaduwen re kak lahn Koht, wauneki Ih, oh pil wehwehki me ihte ma re pahn kenikenla rehn Koht, re kak ale komourparail.—Melkahka 89:7.
4 Karanih Koht: Ma aramas akan men pitsang sapwellimen Koht Rahn en Kadeik me pahn wiawi ni ahnsou kohkohdo, re anahne likweriong Siohwa ni pwoson. (Rom 10:13, 14; 2 Deselonika 1:8) Met kin wehwehki laudsang esehte mwaren Koht oh sapwellime irair kan. Kitail anahne sewese aramas teikan en ehuiong Siohwa, likih Ih ki mohngiong unsek. (Lepin Padahk 3:5, 6) Ahnsou me irail kin doadoahngki dahme re sukuhliki, sohpeiong Ih ni arail kapakap ngidingid, oh pein kilang iaduwen Siohwa kin sewese irail nan arail mour, arail pwoson pahn laudla, oh met pahn sewese irail en karanih Siohwa.—Melkahka 34:8.
5 Kitail en ngoangki kalohki mwaren Koht oh sewese meteikan en likih Ih ni unsek oh lahn Ih. Mwein kitail pahn kak sewese aramas tohto en esehla Siohwa oh kalinganahda Ih nin duwen “Koht me kin kupwurki komourala aramas akan.”—Melkahka 25:5.