Kangoang me Kin Kamwekid Kitail en Mwekidki Warning Examples for Our Day
Kitail koaros pahn kak kakehlailih atail nantihong kolokolete atail lelepek ni atail kaloalehla mehn kasukuhl kan me kitail kak sukuhliki sang poadoapoad me kohsang nan Paipel me sansalda nan video cassette wet me oaralap koasoia Warning Examples for Our Day. Mwohn ke pahn kilang video cassette wet, menlau wadek Nempe irelaud 25 oh pil dahme pid poadoapoad wet me mihmi nan pwuhken Insight on the Scriptures, Volume 2, page 419, parakrap 3-5. Mwurin mwo, ke kak song en sapeng peidek pwukat: Ihs irail mehn Mohap, oh dahme kahrehda Siohwa ketin padahkiong Moses en dehr mahwen ong irail? (Deud. 2:9) Iaduwen Palaam kin pilahn en doadoahngki mehn Mohap kan pwehn kauwehla wehin Israel? Dahme kahrehda kitail en dehr manokehla me mehn Israel tohto lohdi pahn kasongosong laud ehu mwohnte irail pedolong nan Sapwen Inou?—1 Kor. 10:11, 12.
Ni ahnsou me kitail pahn kilang video cassette me oaralap koasoia Warning Examples for Our Day, kitail en tehk kanahieng duwen irair pahieu me pid duwen mour oh medemedewe laud duwen mehpwukat ma kitail men kolokol atail lelepek ong Koht oh ma kitail men kenikenla rehn Koht. (1) Madamadau: Iaduwen ekei mehn Israel kasalehda madamadau sapwung me pid Siohwa oh sapwellime koasoandi kan? Soangen madamadau dahieu kitail en ahneki? (2) Werek: Dahme kahrehda Siohwa kupwursuwedki mehn Israel kan en werekiong mehn Mohap kan? (Eks. 34:12; Lepin Padahk 13:20) Dahme kahrehda kitail anahne pilada mwahu ihs me kitail kin werekiong? (3) Tiahk: Werek suwed kahrehong mehn Israel meh 23,000 en wiahda soangen dihp laud dahieu? (1 Kor. 10:8) Rahnwet, dahme kin kahrehong ekei sapwellimen Koht aramas akan en luwetala oh pwupwudiong nan dipen nenek de kamwahl, ahpw iaduwen kitail kak pere pein kitail sang wia soangen dihp pwukat? (4) Kaudok: Dahme wiawiong mehn Israel kan me kin kasalehda ma arail kaudok ong Siohwa kin mehlel de soh? Dahme ekei kin wia rahnwet me kin kasalehda me re lohdiong nan dipen kaudokiong dikedik en eni kan, ahpw iaduwen kitail kak liksang met?—Kol. 3:5.
Nan spai wet, soangen kapai dah kan kohwong Jamin pwehki e kolokol eh lelepek ong Siohwa iangahki tiahk mwahu? Sang dahme kitail kilang nan video cassette wet, soangen kangoang dahieu Governing Body men wia ong Kristian mehlel kan koaros? Ma ke kin wia tapwin peneinei, dahme kahrehda ke pehm me e pahn kesempwal oh wia elen loalokong ahmw peneinei en pwurpwurehng kilang video cassette wet pak tohto?