Kapwaiada Atail Inou Ong Siohwa

¹ E sohte lipilipil ma ke ahpwtehn papidaisla de ke papidais pahr eisek kei samwalahr oko, ele ke wie tamatamante irair kesempwal wet en ahmw mour. Atail papidais sohte wia imwin atail mour en papah Koht ahpw e wia tepin mour en papah ieu me pahn soutuk. (1 Sohn 2:​17) Dahme pahn kesempwal ong kapwaiada atail inou?

² Alasang Kahlemeng en Krais: Ni en Sises eh papidaisla, e “tepiadahr sapwellime doadoahk” en kalohki “Rongamwahu en Wehin Koht.” (Luk 3:​23; 4:​43) Pil duwehte kitail, ni atail wia kadehdehpen atail inoukihong Siohwa atail mour ni atail papidaisla, kitail wiahla sounpapah kei me alehdier kamanaman en kalohkiseli Rongamwahu. Mendahki kitail kin kihda ahnsou laud oh kehl laud ong kadoahkehda mehkan me kesempwal on atail anahn en palien dipwisou, ahpw doadoahk me keieu kesempwal nan atail mour iei doadoahk en kalohk nin duwen kitail Kristian kan. (Madiu 6:​33) Kitail sohte kin nannantihong kepwehpwehla de ndandla, ahpw kitail akan me inouda ong Koht kin rapahki “kalinganahla atail doadoahk en kalohk” me duwehte me Wahnpoaron Pohl kin wia. (Rom 11:13) Ke kin kesempwaliki pwais kaselel me ke ahneki ong papah Siohwa oh wia uwen omw kak pwehn papah Ih?

³ Me duwehte Sises, kitail en “pelianda Tepil.” (Seims 4:7) Sehdan kasongosongehr Sises mwurin ah papidaiso, oh e kin wia met ong ladu en Siohwa kan rahnwet. (Luk 4:​1-​13) Pwehki ahn Sehdan sampah a kapilkitailpene, kitail anahne pein kaiahneikitailda oh liksang sohte lipilipil dah me kak kasaminehla atail madamadau oh mehkan me kak kauwehla mohngiongatail. (Lepin Padahk 4:​23; Madiu 5:​29, 30) Kaweid kohwong Kristian akan me irail “sohte kak mwenge sang ‘tehpel en Siohwa’ oh pil sang ni tehpel en ngehn saut akan.” (1 Kor. 10:​21, New World Translation) Met anahne kitail en pere sang kitail mehn kamweit suwed akan, werek suwed akan, oh mehkan me keper nan Internet. E pil kin anahne kitail en dehr wadek pwuhk kan me ntingda sang rehn irail me kin uhwong padahk mehlel. Sang ni atail pehmitikiong mehpwukat oh pil ahn Sehdan elen widing teikan pahn sewese kitail en kapwaiada atail inou ong Siohwa.

⁴ Doadoahngki Dahme Koht Ketikihda kan: Pwehn sewese kitail kolokol atail inoukihda atail mour, Siohwa kin ketikihda mehn sawas sang ni sapwellime Mahsen oh pil ketikihda mwomwohdiso en Kristian. Wiahkihla wadawad en Paipel oh kapakap ong Siohwa en wiahla kisehn ahnepemw ni wiewiahn ehu ehu rahn. (Sosua 1:8; 1 Deselonika 5:​17) Ken perenki mihding en mwomwohdiso kan. (Mel. 122:1) Ken werekiong irail akan me kin lahn Siohwa oh kolokol sapwellime koasoandi kan.​—Mel. 119:63.

⁵ Sang ni sapwellimen Siohwa utuht, ke kak kolokol ahmw inou ong Ih oh ahneki peren en papah Ih kohkohlahte.​—Mel. 22:26, 27; Pilipai 4:​13.