Ke Kin Nantihong Kapwaiada Ahmw Inou Ong Siohwa?

“Sohte lipilipil soahng dah me kumwail kin wia, kumwail loalenohng duwehte ma kumwail wie doadoahk ong Siohwa, ahpw kaidehn ong aramas.”​—KOLOSE 3:23, New World Translation.

1. Ong nin sampah wet, ia wehwehn lepin lokaia wet “inou”?

IADUWEN sounmwadong kan kin kak lel uwen koahiek me re kak lel? Nan mwadong en tennis, soccer, basketball, baseball, weiren tang, golf, de mwadong teikan, irail sounmwadong kan me kin dakela pwehki mie arail inou kehlail. Kaiahn en paliwar oh madamadau kin keieu kesempwal. Mehpwukat kin inenen pahrekiong kawehwe ieu en lepin lokaia “inou” me ehu wehwe kin koasoia: “poadidiong ni unsek madamadau ehu de wiewia ehu.”

2. Ia wehwehn “inou” nan Pwuhk Sarawi? Kawehwe.

² Ahpw, ia wehwehn “inou” nan Pwuhk Sarawi? Ni lokaiahn Ipru, “inou” kin wehwehki “katohrohr.”a Nan Israel en mahs, Samworo Lapalap Aaron kin doadoahngki lisoarop me mie “kilel en kasarawi” powe me wehwehki me mie mehkot me katengehdiong lisoaropo me wiahkihda kohl tohr oh mahsen en Ipru kan ntingihdi powe “Kasarawihong Siohwa.” Met kin wia mehn kataman ehu ong samworo lapalapo me e anahne liksang wiewia kan me pahn kasaminehla Tehnpas Sarawio “pwehki kilel en inou, leh sarawi me kohsang Koht me keikidier pohn moange.”​—Eksodus 29:6; 39:30; Lipai 21:12.

3. Iaduwen atail inou pahn anahne kamwekid kitail me kin pid atail tiahk kan?

³ Sang dahme ntingdi nan Pwuhk Sarawi, e sansal me inou kin wia wiewia kesempwal ehu. Pein emen pahn kadehde me ih emen laduhn Koht, oh e pahn anahne kolokol tiahk mwakelekel. Ihme kahrehda, kitail kak kalahnganki kahrepen wahnpoaron Piter doadoahngki sapwellimen Siohwa mahsen oh ndinda: “Kumwail uhdahn pahn sarawihla, pwe ngehi, I me sarawi.” (1 Piter 1:15, 16) Nin duwen Kristian akan me inoukiong Koht atail mour, kitail ahneki pwukoa toutou ehu en kapwaiada atail inou oh lelepek lao lel ni imwi. Ahpw, dahme kin pid inou me Kristian akan kin wiahda?​—Lipai 19:2; Madiu 24:13.

4. Dahme kitail pahn wia mwohn kitail pahn wiahda atail inou, oh dahme met pahn kak karasaiong?

⁴ Mwurin kitail sukuhliki duwen loalokong pwung en Siohwa Koht oh sapwellime kupwur kan oh pil sukuhliki duwen Sises Krais oh sapwellime pwukoa me e kin sapwellimaniki pwehn kapwaiada kupwuren Koht kan, kitail pein wiahda atail pilipil en papah Koht ki mongiongatail unsek, atail lamalam unsek, atail mour unsek, oh atail kehl koaros. (Mark 8:34; 12:30; Sohn 17:3) Met wehwehki me kitail wia pein atail inou ong Koht. Kitail sohte karuwaru wiahda atail inou sang atail pepehm kante. Kitail kin medemedewe oh kapakap, doadoahngki atail kehlen kasawihada dahme pwung. Eri, pilipil wet kaidehn pilipil ong ni ahnsoukiste. Kitail sohte kak en duwehte emen me kin tepihada doadoahk en dei mwetuwel, oh mwurin e pahn doadoahk ekis e ahpw uhdi sang eh doadoahk pwehki doadoahko nohn doadoahk laud ong ih de mwein pwehki ahnsoun dolung mwomwen doh sang ahnsou me e wia doadoahk. Tehk duwen ekei aramas me wia mehn kahlemeng mwahu me ni karasaras re kin ‘doadoahngki mehn deipwel’ oh alehdi pwukoa kan me kohsang powe edetehn irail kin lelohng kahpwal akan.​—Luk 9:62; Rom 12:1, 2.

Irail Sohte Kesehla Arail Inou

5. Iaduwen Seremaia wiahla mehn kahlemeng mwahu en sapwellimen Koht ladu inouda men?

⁵ Doadoahk en kokohp me Seremaia wia nan Serusalem me wiawi mpen sounpar 40 (647-607 B.C.E.), oh met kaidehn doadoahk mengei ehu. E wehwehki me mie soahng kan me e sohte kak wia. (Seremaia 1:2-6) E anahne eimah oh kanengamah pwehn kak tuhwong aramas keptakai kan en Suda rahn koaros. (Seremaia 18:18; 38:4-6) Ahpw, Seremaia kin likih Siohwa Koht, me kakehlahda ih pwehn sewese Seremaia en wiahla sapwellimen Koht ladu inouda mehlel men.​—Seremaia 1:18, 19.

6. Mehn kahlemeng dahieu me wahnpoaron Sohn wia ong kitail?

⁶ Eri, dahme kitail kak sukuhliki sang dahme wiawi ong wahnpoaron lelepek Sohn, me ni ahnsou e mahlahr, e selidi ni deke me adaneki Padmos, wasa me aramas soh-kadek kan kin mie, pwehn “kapahrengki mahsen en Koht oh wiewiahier doadoahk en sounkadehdehn Sises”? (Kaudiahl 1:9) E dadaurete oh kapwaiada e pwukoa nin duwen emen Kristian me inoukiong Koht eh mour oh e papah Siohwa erein sounpar 60. E pil momour mwurin sounkaris kan en Rom kalowehdi Serusalem. E ale kapai laud kan duwehte: ntingihdi pwuhken Rongamwahu ehu, kisin likou siluh, oh pil pwuhken Kaudiahl, me e kilangada kasansal me pid mahwen en Armakedon. E kesehla eh pwukoa ni ahnsou e sukuhliki me Armakedon sohte pahn kohdo ni ahnsou e momour? Eri, e uhd soukautihla wia e doadoahk? Soh, Sohn lelepek lao lel e mehla, edetehn e wehwehki me ‘ahnsoun eh pahn pweida, kerendohr,’ pweipweidahn kasansal kan me e kilangada pahn wiawi ni ahnsou mwuhr.​—Kaudiahl 1:3; Daniel 12:4.

Mehn Kahlemeng Mwahu kan en Atail Ahnsou Ong Irail Akan me Wiahda Ahr Inou kan

7. Iaduwen emen brother wia mehn kahlemeng mwahu nin duwen Kristian men me inoukihong Koht eh mour?

⁷ Nan atail ahnsou, Kristian lelepek kid kei kin ngoangki kapwaiada ahr inou mendahki re sohte pahn kadehde ahnsou me Armakedon. Emen me kin wia met iei Ernest E. Beavor me kohsang England. E wiahla Sounkadehde men nan pahr 1939 ni ahnsou me Mahwen Keriau en Sampah ahpwtehn tepida, oh e kesehla eh pisnes (me kin pweida mwahu) en wia kilel kan ahnsowo oh e tepida wia doadoahk en kalohk kaukaule. Pwehki e nantihong en sohpoupalih nin duwen Kristian men, e selidi nan imweteng erein sounpahr riau. Eh peneinei kin ni lelepek utungada ih, oh nan pahr 1950 nah seri silimen iang Watchtower Bible School of Gilead ong kasukuhl en wiahla misionari, nan kahnimw en New York. Pwehki Brother Beavor kin ngoangki iang kalohk, kompoakepah kan kin likweriki ih Armakedon Ernie. Ni lelepek, e kin kapwaiada eh inou, oh pil lel ni ahnsou e mehla nan pahr 1986 e kin kalohkiseli me sapwellimen Koht mahwen en Armakedon kerendohr. E sohte kin kilangwong eh inou nin duwen inou ong Koht me pahn wiawi ong ahnsoukiste!b​—1 Korint 15:58.

8, 9. (a) Mehn kahlemeng dahieu me ohl pwulopwul tohto nan Spain kasalehda erein kaundahn Franco? (b) Mehnia peidek kan me konehng en wia ni ahnsouwet?

⁸ Pil ehu mehn kahlemeng mwahu me pid duwen ngoang kin kohsang sapwen Spain. Erein kaundahn Franco (1939-1975), Sounkadehde pwulopwul epwiki kei me inoukihong Koht ahr mour kin kolokolete teng arail sohpoupali nin duwen Kristian akan. Tohto irail me selidi nan imweteng en sounpei kan daulih sounpar eisek. Emen Sounkadehde, Jesús Martín, ale kadeik kan oh ah selidi kan koaros kin patpene kin lel sounpar 22 nan imweteng. E ale kalokolok laud ni ahnsou me e selidi nan imweteng en sounpei nan North Aperika. Edetehn dahme e lelohng sohte mengei, e sohte lohdi.

⁹ Pali laud en arail ahnsou nan imweteng, ohl pwulopwul pwukat sehse iahd me re pahn saledeksang imweteng, pwe irail kin ale kadeik kan me irerekla. Ahpw, re kin kolokolete arail lelepek oh arail ngoang en wia doadoahk en kalohk nan imweteng. Ni ahnsou me irairo mwahula nan pahr 1973, tohto en Sounkadehde pwukat, me mahki mpen sounpar 30, sapwadeklasang nan imweteng oh irail mwadangete iang doadoahk en kalohk kaukaule, ekei me wiahla Special Pioneer kan oh Sounapwalih en Circuit oh District kan. Re kin kolokolete ahr inou ni ahnsou re kin mihmi nan imweteng, oh pali laud en irail pousehla kolokolete ahr inou mwurin arail sapwadeksang nan imweteng.c Iaduwen kitail nan rahnpwukat? Kitail kin kahlemengih aramas lelepek pwukat en pil kolokolete atail inou ong Koht?​—Ipru 10:32-34; 13:3.

Madamadau Pwung ong Atail Inou

10. (a) Iaduwen kitail pahn kilangwong atail inou ong Koht? (b) Iaduwen Siohwa kin kilangwong atail kin papah ih?

¹⁰ Iaduwen kitail kin kilangwong atail inou en wia kupwuren Koht? Met wia mehkot keieu kesempwal nan atail mour? Sohte lipilipil ma kitail pwulopwul de mah, pwopwoud de kiripw, kehlail de soumwahu, kitail anahne en kolokolete atail inou ahpw nin duwen dahme pein emen emen kitail pahn kak wia. Mwein emen kin mih nan irair ehu me pahn mweidong ih en iang wia doadoahk kaukaule nin duwen pioneer men, de pein toukihda eh ahnsou pwehn doadoahk nan rahn ohpis en Watch Tower Society, de wiahla emen misineri, de doadoahk nin duwen Sounapwalih en Circuit de District. Ahpw, mwein ekei pahpa oh nohno kan kin inenen soupisengki apwalih anahn akan en paliwar oh pali ngehn en neirail seri kan. Eri, awa malaulau kan nan doadoahk en kalohk me irail kin wia ni ehu ehu sounpwong kin mwomwen sohte katepe ong Siohwa sang awa tohto me irail me kin iang doadoahk en kalohk kaukaule? Soh. Koht sohte pahn kupwurperenki atail kihwei mehkot ma kitail sohte kakong. Wahnpoaron Pohl mahsanih duwen kosonned wet: “Pwe ma kumwail pahn kin ngoangki kihwei, Koht pahn kin kupwurperenki uwen me kumwail pahn kak kihwei, ahpw e sohte pahn kupwurperenki amwail kihwei mehkot me kumwail sohte kakohng.”​—2 Korint 8:12.

11. Dahme atail pahn komourala kin poahsoankihda?

¹¹ Poahsoanpen atail pahn kak komourala sohte kin pid dahme pein kitail pahn wia, ahpw e kin poahsoanehda pohn sapwellimen Siohwa kupwurkalahngan oh sapan pwehki Krais Sises, atail Kaun. Pohl, ni sansal, kawehwehda met: “Aramas koaros wiadahr dihp, oh irail koaros dohsangehr sapwellimen Koht lingan me e kin ketikihong aramas. Eri, sang ni kupwurkalahngan oh sapan en Koht, irail koaros kin pwungla reh pwehki Krais Sises me kin ketin kamaiauwihirailda.” Ahpw, atail doadoahk kan kin kasalehda me atail kin pwoson sapwellimen Koht inou kan me kehlail.​—Rom 3:23, 24; Seims 2:17, 18, 24.

12. Dahme kahrehda kitail en dehr kapahrekiong kitail ong meteikan?

¹² Kitail sohte anahne kapahrekiong pein atail awa en kalohk kan ong awa depe meteikan kin kalohk, de ia uwen tohto sawaspen Pwuhk Sarawi kan me kitail kin kihla, de aramas depe me kitail kin onop Paipel rehrail. (Kalesia 6:3, 4) Sohte lipilipil ia uwen laud de tikitik doadoahk me kitail kin wia nan doadoahk en Kristian, kitail koaros anahne tamanda sapwellimen Sises mahsen aktikitik kan: “Ih pil duwen kumwail: kumwail pahn kin kapwaiada mehkoaros me kileldiong kumwail en wia, oh kumwail pahn kin nda, ‘Kiht, lidu soh katepe kei; ihte pwaisat, se en kapwaiada at pwukoa.’ ” (Luk 17:10) Pak depe kitail kak nda me kitail kin “kapwaiada mehkoaros me kileldiong kitail en wia”? Eri, iet peidek ong kitail, Ia mwomwen atail pahn anahne papah Koht?​—2 Korint 10:17, 18.

Wia Ehu Ehu Rahn en Katapan

13. Soangen madamadau dahieu kitail anahne ahneki ni ahnsou kitail kin kapwaiada atail inou?

¹³ Mwurin Pohl kihong lih pwopwoud kan, ohl pwopwoud kan, seri kan, pahpa oh nohno kan, oh ladu kan: kaweid, e ntinghidi met: “Sohte lipilipil soahng dah me kumwail kin wia, kumwail loalenohng duwehte ma kumwail wie doadoahk ong Kauno, ahpw kaidehn ong aramas. Kumwail en tamataman me Kauno pahn ketin katingih kumwail; kumwail ahpw pahn ale dahme e ketin nekinekidohng sapwellime aramas akan, pwe Krais, iei ih Kaun mehlel me kumwail ki papah.” (Kolose 3:23, 24) Kitail sohte kin wie sapwellimen Siohwa doadoahk pwehn kaperenih aramas akan. Kitail kin song en papah Koht ni atail kin kalemengih mehn kalemeng en Sises Krais. E kin ngoangki wia doadoahk en kalohk mendahki eh ahnsoun kalohk mwotomwot.​—1 Piter 2:21.

14. Me pid duwen imwin rahn akan, kaweid dahieu me Piter kihda?

¹⁴ Pil wahnpoaron Piter kin kasalehda me e ese me eh ahnsoun kalohk mwotomwotlahr. Nan keriaun kisin likou me e ntingihdi, e kihda kaweid duwen imwin rahn akan, pahn mie aramas akan me pahn kin kepit​—irail akan me kin lahlahwe padahk mehlel oh aramas peikasal kan—​oh irail kin kihda peidek kan duwen ahnsou me Krais ketiket nan mwoale nanleng. Ahpw, Piter mahsanih: “Kauno sohte kin pwapwand ni wiepen sapwellime inou, duwen ekei ar kin lemeleme. Ahpw e kin ketin kanengamahiong kumwail, pwehki eh sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan. Eri, Rahnen Kauno pahn leledo duwehte lipirap emen.” Ei, Rahnen Siohwa pahn uhdahn leledo. Ihme kahrehda, rahn koaros kitail anahne tehk uwen kehlail pein atail pwoson sapwellimen Koht inou.​—2 Piter 3:3, 4, 9, 10.

15. Iaduwen kitail pahn kilangwong atail mour en ehu ehu rahn?

¹⁵ Ma kitail pahn nsenohki en kapwaiada atail inou, rahn koaros kitail pahn kapinga Siohwa. Ni kaimwiseklahn ehu ehu rahn, kitail kak medemedewe iaduwen kitail kasarawihla mwaren Koht oh kalohkiseli Rongamwahu en Wehin Koht? Mwein kitail wia met sang atail tiahk mwakelekel, de atail koasoiong aramas teikan duwen mehkot me kekehlahda irail ni pali ngehn, de pein atail kin nsenohki atail peneinei oh kompoakpatail kan. Kitail doadoangki atail ahnsou mwahu pwehn ehukihong meteikan atail koapworopwor nin duwen Kristian akan? Kitail sewese emen en medemedewe duwen sapwellimen Koht inou kan? Kitail en nahkpene mehkan me kesempwal ong ni irair en pali ngehn ni ehu ehu rahn, rasehng atail kalakalaudehla neitail “mwohni” nan “pangk” me pahn dirki roson en pali ngehn.​—Madiu 6:20; 1 Piter 2:12; 3:15; Seims 3:13.

Masatail kan en Kilangwei Marain

16. Ni ahl dah kei Sehdan kin song en kaluwetala atail inou me kitail wiaiong Koht?

¹⁶ Kitail kin mih nan ahnsou apwal akan ong Kristian akan. Sehdan oh ienge kan kin song en kahrehong kitail en apwaliki kilang wekpeseng nanpwungen dahme mwahu oh dahme suwed, dahme mwakelekel oh dahme samin, dahme pwung oh dahme sapwung. (Rom 1:24-28; 16:17-19) Sehdan kin kamengeila ong kitail en kak kasaminehla mongiongatail kan oh atail madamadau kan sang dahme kitail pahn pilada nan TV oh pil Internet pwehn kilang oh rong. Masatail kan ni pali ngehn pahn kakete ediedla oh kahrehong kitail en dehr dehdehki widing kan en Sehdan. Atail kin kolokolete atail inou pahn kak luwetala oh atail kin koledi “mehn deipwel” pahn pil kak luwetala ma kitail sohte pahn kapwaiada atail kin kesempwaliki atail pali ngehn.​—Luk 9:62; Pilipai 4:8.

17. Iaduwen kaweid en Pohl pahn kak sewese kitail en kolokolete atail nanpwungmwahu rehn Koht?

¹⁷ Mahsen kan en Pohl ong mwomwohdiso en Deselonika me inenen konehng: “Eri, iet kupwuren Koht ong kumwail: e ketin kupwurki kumwail en sarawihla oh uhdahn mweisang douluhl tiahk samin kan. Emen emen kumwail ohl akan en uhdahn ese duwen eh pahn pwoudikihda lih emen nin duwen mwohmw ehu me sarawi oh wahu. Kaidehn ni ineng suwed, duwehte aramas rotorot akan me sehse Koht.” (1 Deselonika 4:3-5) Ekei me wiahda dipen nenek de dipen kamwahl oh sohte koluhla mehlel oh met kin kahrehong ekei sang mwomwohdiso en Kristian en piskenla sang mwomwohdiso​—irail akan me sohte kin nsenohki arail inou ong Koht. Re kin mweidong arail nanpwungmwahu rehn Koht en luwetala, lao lel irail sohte kin katapanki Koht nan arail mour. Ahpw, Pohl mahsanih: “Koht sohte ketin malipeikitaildohng nan mour samin, pwe nan mour sarawi. Eri, mehmen me pahn soikeweisang reh padahk pwoatet, kaidehn aramas me e kin soikala, pwe Koht me ketikihong kumwail sapwellime Ngehn Sarawi.”​—1 Deselonika 4:7, 8.

Dahme Ke Pahn Koasoanehdi Nan Kapehdomw Pwe Ken Nantihong Wia?

18. Dahme kitail pahn anahne koasonehdi en nantihong wia?

¹⁸ Ma kitail kin kalahnganki kesempwalpen atail inou ong Siohwa Koht, dahme kitail pahn koasoanehdi pwehn nantihong wia? Kitail anahne koasoanehdi nan kapehdatail en nantihong kolokol atail nsen mwakelekel me kin pid atail tiahk oh atail doadoahk en kalohk. Piter kihda kaweid wet: “Ahpw kumwail wia ni tiahk en kadek oh wahu. Nan kapehdomwail kan en kin mwakelekel, pwe irail kan me kin kinehiong kumwail likamw ni amwail wiewia mwahu rehn Krais, re en sarohdi oh namenengkihla ar likamw akan.” (1 Piter 3:16) Mwein kitail anahne lelohng kalokolok pwehki atail tiahk en Kristian, ahpw tamanda me Krais pil kin lelohng kalokolok pwehki eh pwoson oh lelepek ong Koht. Piter mahsanih: “Pwehki, Krais eh ketin lokolok ni paliwar, kumwail pil kehlailkihda soangen lamalamohte me e sapwellimanki; pwe me kin lokolok ni paliwar, e sohpeisangehr dihp.”​—1 Piter 4:1.

19. Dahme kitail men aramas teikan en koasoiahki duwen pein kitail?

¹⁹ Ni mehlel, atail kin koasoanehdi nan kapehdatail en nantihong kolokolete atail inou pahn kak pere kitail sang lidip kan en ahn Sehdan sampah me inenen suwed ni pali ngehn, tiahk oh paliwar. Ahpw, laud sang met, kitail pahn kakehlahda atail kin likih me kitail kin kenikenla rehn Koht, oh met iei mehkot laud sang dahme Sehdan oh ienge kan pahn kak kihong kitail. Eri, dehr mweidong aramas akan en nda me kitail sohlahr kin poakong padahk mehlel duwehte mahs. Ahpw, e pahn mwahu aramas teikan en nda me kitail duwehte irail akan nan mwomwohdiso en Daiadaira nan keieun senturi: “I ese omw wiewia kan. I ese omw limpoak, omw loalopwoat, omw kohwa doadoahk, oh omw kanengamah. I ese omw doadoahk en ahnsou wet me laudsang mehlel omw doadoahk en mahso.” (Kaudiahl 2:4, 18, 19) Ei, kitail en ngoangki kapwaiada atail inou, oh kitail en “pwerisekiong atail doadoahk,” ngoangkihte wia doadoahk wet lao lel ni imwi​—oh imwio kerendohr.​—Rom 12:11; Kaudiahl 3:15, 16.

[Nting tikitik me mi pahs]

Ke Tamanda?

• Wiewia dah kan me kin pid inou?

• Ia ekei mehn kahlemeng mwahu kan en laduhn Koht inouda kan en mahs oh pil nan atail ahnsou me kitail kak kahlemengih?

• Iaduwen kitail pahn kilangwong duwen pein atail kin papah Koht?

• Dahme kitail anahne koasoanehdi nan kapehdatail pwe kitail en kak kapwaiada me pid atail inou ong Koht?

[Kilel nan pali 25]

Seremaia kolokolete eh lelepek edetehn e lelohng kalokolok laud

[Kilel nan pali 26]

Ernest Beavor wia mehn kahlemeng mwahu ong nah seri kan nin duwen emen Kristian me kin ngoangki wia doadoahk en kalohk

[Kilel nan pali 27]

Sounkadehde pwulopwul epwiki kei nan imweteng kan en Spain kin kolokolete ahr lelepek

[Kilel nan pali 28]

Kitail en nahkpene mehkan me mwahu oh ngehnin nan ehu ehu rahn