Inou oh Saledek en Wiahda Atail Pilipil
“Kitail maiaudahr-Krais ketin kamaiauwhihkitailda.”—KALESIA 5:1.
1. Lepin lokaia “inou” de “isimwas” ni lokaiahn Ipru oh Krihk kin keieu kadoadoahk ong dah?
SOUNNTING en Paipel kan kin doahdoahngki ekei lepin lokaia kan ni lokaiahn Ipru oh Krihk pwehn kawehwehda lepin lokaia pwukat, katohrohrla de tohrohrla pwehn kak wia mehkot sarawi. Nan Paipel en lokaiahn wai kan, lepin lokaia wet kin kawehwehda ni lepin lokaia pwukat: “inou” de “isimwas” [kasarawihla emen nan ohpis]. Ekei pak, lepin lokaia pwukat kin pidada ihmw akan—pali laud en ahnsou kin pid sapwellimen Koht tehnpas sarawi nan Serusalem en mahs, oh kin pid duwen kaudok me kin wiawi nan tehnpas sarawio. Lepin lokaia pwukat kin pak malaulaute pid mehkot likin sarawi kan.
Inou ong “Koht en Israel”
2. Dahme knhrehda Siohwa kak adanekihla “Koht en Israel”?
2 Nan pahr 1513 B.C.E., Koht kapitasang mehn Israel kan sang kaliduhla nan sahpwen Isip. Mwurin met, e sapwellimanikinirailla, oh wiahda inou ehu nanpwungen ih oh irail. E padahkiong irail: “Eri, ma kumwail pahn peikiong ie oh dadaur ei inou, kumwail pahn wiahla nei aramas kesempwal. Tohn sampah pwon uhdahn nei, ahpw kumwail me pahn wiahla nei aramas pilipil.” (Eksodus 19:5; Melkahka 135:4) Pwe, e ketin sapwellimanikinirailla nin duwen sapwellime aramas kesempwal kei, e konehng Siohwa en mwarenkihla daidel wet “Koht en Israel.”—Sosua 24:23.
3. Dahme kahrehda met sohte kin wehwehki me Siohwa kin lipilipilki aramas ni ahnsou e ketin pilada mehn Israel kan en wiahla sapwellime aramas akan?
3 Ni ahnsou me Siohwa supwellimanikihla mehn lsrael kan nin duwen sapwellime aramas inouda kan, Siohwa sohte kin ketin lipilipilki aramas, pwe e pil kin poakohng mehn liki kan. E kaweidkin sapwellime aramas akan: “Dehr wiakauwe mehn liki kan me kin kousoan nan sapwamwail. Kumwail nsenohkin irail duwehte amwail kin nsenohki riamwail mehn Israel kan, oh poakohng irail duwehte amwail kin poakohng pein kumwail. Kumwail en tamataman me kumwail wia mehn liki kei nan wehin Isip mahso. Ngehi me Kaun—o [Siohwa] amwail Koht.” (Lipai 19:33, 34) Sounpahr epwiki kei mwuri, sapwellimen Koht madamadau ong ire wet sansalda ong wahnpoaron Piter, me koasoia: “Met I wehwehkidahr me Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.”—Wiewia 10:34, 35.
4. Ia koasoandi nanpwungen Koht oh Israel me kin pid duwen mehn Israel akan en wiahla sapwellime aramas akan, oh mehn Israel akan kin kapwaiada met?
4 Pil tehk me irail pahn wiahla sapwellimen Koht aramas inouda kan oh pil “sapwellime aramas tohrohr kan,” ahpw ihte ma irail pahn peikiong sapwellimen Koht mahsan oh kapwaiada sapwellime inou. Ahpw, mehn Israel akan sohte kapwaiada kosonned pwukat. Mwurin irail soikala Mesaia me Koht kadarodo nan keieun senturi C.E., arail pwais kaselel kohsang irail. Siohwa sohlahr wia ahr “Koht en Israel.“ Oh pwiladak en mehn Israel akan sohlahr wia sapwellimen Koht aramas inouda kan.—Pil tehk Madiu 23:23.
Inou en “Israel en Koht”
5, 6. (a) Ia wehwehn mahsen en Sises me kileledi nan pwuhken Madiu 21:42, 43? (b) Iahd oh induwen “Israel en Koht” tepida wiawihda?
5 Met wehwehki me Siohwa solahr pahn sapwellimaniki aramas inouda kan? Soh. Sises kohpadahr sang nting kan en sounmelkahka: “Dah, kumwail sohte wadek nan Pwuhk Sarawi mahsen pwukat? ‘Takai me sounkou ihmw kan kesepwekelahr, uhd wiahla takain pwukakeimw! Kauno [Siohwa] me ketin wiahda met, meid kapwuriamwei mehlel ong kiht!’ Ihme I ndahkihong kumwail, me Wehin Koht palm kohsang kumwail oh uhd kohieng aramas [wehio] akan me pahn kapwarehda wahn Wehin Koht.”—Madiu 21:42, 43.
6 “Aramas [wehio] akan me pahn kapwarehda wah akan” iei mwomwohdiso en Kristian. Ni ahnsou me e ketiket nin sampah, Sises pilada tepin tohn wehio. Ahpw ni rahn en Pendekos 33 C.E., Siohwa Koht me pein kauwada mwomwohdiso en Kristian ni ahnsou me e ketikihong tepin tohn mwomwohdiso ngehn sarawi, mpen aramas 120. (Wiewia 1:15; 2:1-4) Mwuhr, wahnpoaron Piter ntinghdi me mwomwohdiso kapw me ahpwtehn wiawihda me wiahla “keinek pilipil ehu, pwihn samworo en Nanmwarkio, wehi sarawi ehu, sapwellimen Koht aramas kei.” Pilipil dahieu? Me irail anahne “kalohkiseli wiewia kapwuriamwei kan en nin limen Koht, me ketin malipeikumwaildo sang rotorot ong nan sapwellime marain lingaling.” (1 Piter 2:9) Irail akan me kin idawehnla Krais, keikihdi ngehn sarawi en Koht, me wiahla wehi inoukihda ehu, “Israel en Koht.”—Kalesia 6:16.
7. Dahme tohn Israel en Koht pahn paiekihda, oh peneu dahieu kohwong irail en liksang?
7 Mendahki tohn wehi sarawi me wiahla “sapwellimen Koht aramas kei,” irail sohte pahn kaliduhla. Ahpw, irail pahn paiekihda saledek laudsang dahme wehi inou en pwilidak en mehn Israel kan ahneki. Sises inoukihong irail akan me pahn kak wiahla tohnwehi akan en wehi kapw wet: “Oh kumwail pahn dehdehki dahme mehlel, oh me mehlelo pahn kasaledengkumwailla.” (Sohn 8:32) Wahnpoaron Pohl kasansalehda me Kristian akan pahn saledeksang koasoandi kan en Kosonnedo. Ihme e kihda peneu ong ienge me pwoson akan me mih nan Kalesia: “Kitail maiaudahr—Krais ketin kamaiauwihkitailda. Eri, kumwail tengeteng nan amwail saledek, oh dehr pwurehng wie liduhla.”—Kalesia 5:1.
8. Ni ahl dahieu koasoandi en Kristian kin kihong aramas akan saledek laud sang irail akan me mih pahn Kosonnedo?
8 Weksang mehn Israel en mahs ni pali uduk, Israel en Koht kin peikiong kosonned akan en arail inou lao lel met. Met sohte wia mehkot kapwuriamwei pwehki towe kan kin pein pilada en peikiong Koht. Ahpw, tohn Israel en pali uduk kin wiahla aramas inouda kan pwehki irail ipwidi nin duwen mehn Israel, ahpw tohn Israel en Koht kin pein pilada en wiahda ahr inou. Koasoandi en Kristian weksang Kosonned en Mehn Suhs akan me kin idingkiong aramas akan en wiahda ahr inou kan oh sohte mweidong irail en ni saledek wiahda pein ahr pilipil kan.
9, 10. (a) Iaduwen Seremaia kasansalehda me wikidekla ehu pahn wiawi me kin pid duwen inou? (b) Dahme kahrehda komw pahn kak nda me kaidehn Kristian akan koaros me inoukihong ahr mour ong Siohwa kin wia tohn Israel en Koht?
9 Soukohp Seremaia kohpada duwen wukihla ehu me pahn wiawi me kin pid duwen inou ni ahnsou e ntingihdi: “‘Ahnsou ehu pahn kohdo me I pahn wiahda inou kapw ehu ong mehn Israel oh Suda. E sohte pahn duwehte inou en mahso me I wiahiongehr ar pahpa kahlap ako ni ei kol pehrail kan oh kahluwairaildo sang Isip. Likamwete ei pwoud irail, ahpw re sohte loaloapwoatohng inouwo. Inou kapw me I pahn wiahiong mehn Israel pahn duwe met: I pahn kihdi ei kosonned nan kapehdirail kan oh ntingihediong nan mohngiongirail kan. I pahn wiahla ar Koht, oh re pahn wiahla nei aramas.’”—Seremaia 31:31-33.
10 Pwehki Sapwellimen Koht kosonned akan kin mih “nan kapehdirail kan,” oh ntingihdi “nan mohngiongirail kan,“ tohn Israel en Koht kin mwekidki en kolokolte ahr inou kan. Ahr ineng en wia kupwuren Koht me kehlail sang irail pwilidak en mehn Israel kan, me inoukihda ahr mour pwehki irail ipwidihte wia mehn Israel men ahpw kaidehn sang ni pein ahr pilipil en men wia kupwuren Koht. Rahnwet, ineng en wia kupwuren Koht, nin duwen me Israel en Koht kin wia ni kahlemeng mwahu wet, oh pil iangahki tohnkaudok limerar kan nin sampah pwon. Irail pil inoukihong Siohwa Koht ahr mour oh wia sapwellime kupwur kan. Mendahki aramas pwukat sohte ahneki koapworopwoar en mour nanleng nin duwen me Israel en Koht kin ahneki, ahpw re kin perenkihda ahr koapworopwor en mour soutuk nin sampah pahn kaunda en sapwellimen Koht Wehin nanleng. Irail kin kalahnganki Israel en ngehn ni ahr utungada luwen Israel en ngehn en kapwaiada ahr pwukoa en “kalohkiseli wiewia kapwuriamwei kan en nin limen Koht, me ketin malipeikumwaildo sang nan rotorot ong nan sapwellime marain lingaling.”
Doadoahngki Saledek me Kohsang rehn Koht ni Loalokong
11. Aramas wiawihda oh ahneki irair dahieu, oh iaduwen kitail pahn doadoahngki met?
11 Koht kapikada aramas akan pwe irail kak kesempwaliki saledek. E ketikihong irail ahr pwung en wiahda pein arail pilipil kan. Tepin pwopwoudo doadoahngki ara saledek en pilipil. Ahpw, ni soaloalokong oh sempoak ira wiahda ara pilipil me imwila suwed ong ira oh kadaudokara. Met kin kasansalehda me Siohwa sohte kin idingkihong kapikapik loalokong kan en keid nan ehu ahl ehu me tohrohr sang dahme irail kin pein inengieng. Oh pwehki “Koht kin ketin poakohng me kin perenki kihwei mehkot,” ihte inou me e pahn ketin kupwurki, iei inou me kin poahsoanda pohn 1impoak ahpw kaidehk ni mehnseiren ahpw ni peren, oh pil poahsoanda pohn saledek en pilipil. (2 Korint 9:7) Soangen inou me poahsoanda pohn mehkot tohrohr, Koht sohte kin kupwurki.
12, 13. Iaduwen mouren Timoty wia kahlemeng mwahu ong pahpa oh nohno kan me kin pid duwen kaiane seri kan, oh eh kahlemeng mwahu kin kahrehong pwulopwul tohto en wia dah?
12 Sounkadehdehn Siohwa kan kin wehwehki duwen irair wet, ihme kahrehda irail kin padahkiong aramas akan me pein emen emen kitail pahn inoukihong atail mour Koht, ahpw irail sohte kin idingkiong aramas akan en wiahda inou wet, oh pil sohte kin idingkihong neirail seri kan. Me weksang, pelien lamalam tohto, Sounkadehde kan sohte kin papidaisih neirail seri pwelel kan ni mwomwen me re kak idingkihong seri kan en wiahda ahr inou ahpw kaidehn sang ni pein arail pilipil. Nting en Paipel kan kin mahsanih duwen ohl pwulopwul men, Timoty. Nin duwen ohl mehlel men, wahnpoaron Pohl padahkiong ih: “Ahpw kowe, ke en nantihong ni me mehlelo me ke padahngkiher oh uhdahn kamehlele. Pein kowe ese ihs me omw sounpadahk, oh ke pil ese me sang ni omw kisin seri ke pil kin ese Pwuhk Sarawi, me kak kasalehiong uhk erpit me kak kahluweiukalahng nan mour soutuk sang ni omw pwoson Krais Sises.”—2 Timoty 3:14, 15.
13 Timoty esehla nting sarawi kan pwehki e ale kasukuhl sang ni ahnsou me e wia kisin seri pwelel. E ale kasukuhl sang rehn eh nohno oh nohno kahlap en kamehlele padahk en Kristian akan, oh e kamehlele dahme e sukuhliki—kaidehn sang ni idihd. (2 Timoty 1:5) Imwilahn met, Timoty kilang duwen erpit en idawehnla Krais oh pein ih wiahda eh pilipil en wia eh inou nin duwen Kristian men. Nan atail ahnsou, ohl oh lih pwulopwul kid kei me arail pahpa oh nohno kan kin iang Sounkadehdehn Siohwa kan kin kahlemengih kahlemeng mwahu wet. (Melkahka 110:3) Mehteikan sohte kin wia met. Met iei pilipil me pein emenemen kitail anahne wia.
Wiahda Atail Pilipil en Wia Lidu men ong Ihs?
14. Dahme pwuhken Rom 6:16 padahkiong kitail duwen saledek unsek?
14 Sohte emen aramas me ahneki saledek ni unsek. Aramas koaros sohte ahneki saledek unsek sang koasoandi en irairen audepen lahng oh sampah, duwehte kosonned en kehl me kapilpene weren sampah (lokaiahn wai: gravity), sohte me pahn kak pohnsehsehla kosonned wet oh sohte lellohng kahpwal. Duwehte ni pali ngehn, sohte aramas men me saledek sang koasoandi kan ni pali ngehn. Pohl mahsanih: “Pwe mehlel kumwail eseier met: ni amwail mweidohng pein kumwail pwe en wiahla 1idun emen oh peikiong, eri, mehlel kumwail me lidun me kumwail kin peikiong-ma ong dihp, me imwilah mehla, de ong peik, me imwilah pwung rehn Koht?”—Rom 6:16.
15. (a) Ia pepehm en aramas akan me kin pid duwen wiahla lidu kan, ahpw dahme pali laud en arangas akan kin wia? (b) Mehnia peidek kan e konehng kitail en pein kalelepek rehtail?
15 Pali laud en aramas akan sohte kin perenki rong duwen en wiahla liduhn aramas men. Ahpw ni mehlel, nan rahnpwukat, aramas tohto kin ahnsou koaros mweidong pein irail en liduwih mehkot de emen ni ahl me sohte nohn sansal oh irail kin imwikihla sasairki wia dahme mehteikan mwahuki irail en wia. Karasepe ieu, palien kapware kepwe kan oh palien mehn kamweit kan kin nantiong kahrehong aramas akan en idawehnla ahr koasoandi kan. Pwihn en palien politik kan oh pelien lamalam kan kin kangoange aramas akan en utungada arail madamadau kan oh mehn akadei kan, kaidehn ahnsou koaros sang ni lokaiahn kamehlel kan, ahpw pali laud en ahnsou sang ni ehupene nin duwen pwihn ehu de lelepek ong pwihno. Pohl ntingihdi me ‘kumwail me lidun me kumwail kin peikiong,’ eri, kitail anahne pein idek rehtail, ‘Ihs me I kin wia lidu ong? Ihs me kin kamwekidada pali laud en ei pilipil kan oh ai elen mour? Kaun en pelien lamalam kan, kaun en politik kan, aramas kepwehpwe kan, de aramas ndand kan nan mehn kamweit akan? Ihs me I kin peikiong—Koht de aramas?’
16. Ni ahl dahieu me Kristian akan wia lidun Koht, oh ia madamadau pwung ong koasoandi en lidu wet?
16 Kristian akan sohte kin kilangwong peikiong Koht nin duwen mehkot me kin kawehla pein atail pilipil. Irail kin perenki doadoahngki ahr saledek nin duwen me ahr Sounkahlemeng, Sises Krais kin wia, kaiahne pein ahr ineng kan oh dahme me kesempwal nan ahr mour en ehuong kupwuren Koht. (Sohn 5:30; 6:38) Irail kin “audaudki kupwur en Krais,” oh uhpaiong ih nin duwen Tapwin mwomwohdiso. (1 Korint 2:14-16; Kolose 1:15—18) Met duwehte lih emen me pwoudkihda ohl men me e kin poakohng oh men wia sewesepe. Oh ni mehlel, pwihn en Kristian keidi kan ni karasaras kin duwehte lih meipwon men me inoun pwopwoud ong Krais.—2 Korint 11:2; Episos 5:23, 24; Kaudiahl 19:7, 8.
17. Dahme Sounkadehdehn Siohwa kan koaros pein pilada en wiahla?
17 Sounkadehdehn Siohwa kan, emenemen irail koaros, edetehn ahneki koapworopwor en mour nanleng de sampah, irail koaros pein wiahda ahr pilipil en inoukihong Koht arail mour oh kapwaiada sapwellime kupwur kan oh peikiong ih nin duwen Kauno. Ong pein emenemen Sounkadehde kan koaros, irail pein wiahda ahr inou kan en wiahla 1idun Koht, oh sohlahr wia lidun aramas. Met kin pahrekiong kaweid en wahnpoaron Piter: “Koht ketin pwainkumwaildahr sang ni pwei lapalap ehu; eri kumwail dehr kin wiahla 1adun aramas akan.”—1 Korint 7:23.
Emenemen Kitail pahn Sukusukuhliki en Ale Kamwahupen Kitail
18. Iahd me emen me men wiahla Sounkadehde men, kak papidaisla?
18 Mwohn emen kak wiahla emen Sounkadehdehn Siohwa, e anahne kapwaiada iren Paipel kan. Elder kan kin tehk mwahu ma emen me men wiahla Sounkadehde men kin uhdahn wehwehki duwen dahme e pahn anahne wia ma e pahn wiahda inou en Kristian. E kin uhdahn men wiahla emen Sounkadehdehn Siohwa kan? E men kapwaiada? Ma soh, e sohte kak papidaisla.
19. Dahme kahrehda sohte kahrepe mwahu en kauwe emen me wia eh pilipil en wiahla ladu en Koht inouda men?
19 Ahpw, ma aramas men kin kapwaiada koasoandi kan koaros, dahme kahrehda e sohte konehng en kauwe ih pwehki e pein wia eh pilipil en mweidong Koht oh sapwellime Mahsen en kamwekidada ih? E pahn suwed en mweidong Koht en kamwekidada ih sang mweidong aramas en kamwekid ih? Sounkadehdehn Siohwa kan sohte kin pwungki met. Irail kin ni mongiongirail unsek pwungki Sapwellimen Koht mahsen me Aiseia ntinghdier: “Ngehi me Kauno [Siohwa] omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.”—Aiseia 48:17.
20. Ni ahl dah kei me aramas akan saledekla pwehki padahk mehlel kan en Paipel?
20 Padahk mehlel kan en Paipel kin kasaledengkitailla sang padahk kan en kaudok likamw akan, duwehte kalokolok soutuk nan lehn kisiniei. (Eklesiasdes 9:5, 10) Padahk mehlel kin audekihla mongiongarail kalahnganki koapworopwor en irail me mehlahr akan—kaiasada pahn kak wiawi pwehki tomw meirong en Sises Krais. (Madiu 20:28; Wiewia 24:15; Rom 6:23) Padahk mehlel kan en Paipel kin kasaledengkitailla sang kapwunod kan en liki inou kan en palien politik me ahnsou koaros sohte kin pweida. Ahpw, padahk mehlel kin kahrehong ahr mongiong kan en dirkihla peren pwe irail ese me Wehin Siohwa tepiadahr kakaun nanleng oh pahn kereniong kaunda sampah pwon. Padahk mehlel kan en Paipel kin kasaledengkitailla sang wiewia kan, edetehn wiewia kan kin mwomwen kaperen, ahpw met sohte kin kawauwih Koht oh e kin imwikihla pwopwoud kan me sohte pweida, soumwahu, oh mehla. Ni mwotomwot, mie kapai tohto kan en wiahla lidu en Koht sang wiahla lidun aramas akan. Ni mehlel, en wiahda atail inou ong Koht kin wahdohng kitail kapai kan “nan mouren dih wet . . . a nan mour me pahn kohdo, e pahn ale mour soutuk.”—Mark 10:29, 30.
21. Iaduwen Sounkadehdehn Siohwa kan kin kilangwong ahr inou ong Koht, oh dahme re men wia?
21 Sounkadehdehn Siohwa kan en nan rahnpwukat sohte wiahla kisehn wehi inoudao pwehki re ipwidi nin duwen met, me rasehng mehn Israel kan en mahsie. Sounkadehde kan kin wia kisehn mwomwohdiso ehu me wiahkihda Kristian inouda kan. Emenemen Sounkadehde kan kin papidaisla, pwehki pein emenemen irail kin doadoahngki ahr pilipil en wiahda ahr inou ong Koht. Ni mehlel, ong Sounkadehdehn Siohwa kan, inou kin imwikihla atail ahneki nanpwung mwahu rehn Koht oh met pahn sansal sang atail men oh perenki papah ih. Sang ni mongiongarail unsek, irail men kolokol ahr nanpwung mwahu rehn Koht oh ni ahnsou kohkohlahte kolokolte saledek me Sises Krais kasaledengirailla.
Iaduwen Komw Pahn Sapeng?
◻ Dahme kahrehda Koht sohte lipilipil ki emen ni ahnsou me e pilada mehn Israel kan en wiahla sapwellime “aramas kesempwal kei”?
◻ Dahme kahrehda aramas akan sohte pahn kesehla ahr saledek ma re kin wiahda ahr inou en Kristian?
◻ Ia ekei kapai kan en wiahda atail inou ong Siohwa Koht?
◻ Dahme kahrehda e mwahu en wiahla emen lidun Siohwa sang lidun aramas?
[Kilel nan pali 12]
Nan Israel en mahs, inou ong Koht kin poahsoanda pohn ipwidi en aramas akan
[Kilel nan pali 13]
Inou en Kristian iei pilipil en emen