Sounpei Soundak Oahs akan Tangwei ong Mahwen oh Iaduwen Met kin Pidada Komwi
1, 2. Iaduwen sapwellimen Koht ladu kan en nan rahnwet kin pid pweidahn kokohp en kaudiahl me ntingdi nan pwuhken Kaudiahl 9:13-19?
1“Tohnleng kewenemeno ahpw peuk nah sowio.” Mwurin mwo, “sounpei soundak oahs akan,” irail me “rar (million) riepwiki,” kin mwomwen ngihl kehlail duwehte nahnsapwe. Met kaidehn pwihn en sounpei mwahl ieu. “Moangen oahs ako duwehte moangen laion.” Kisiniei, ediniei, oh suwepel kin kusieisang ni ewen oahs ako, oh “ikirail kan duwehte sineik kan me mie moange. Karasaras wet me pid duwen sounpei soundak oahs akan kin pid duwen kasorehlahn soahng koaros. (Kaudiahl 9:13-19) Ke ese iaduwen ke kin pid pweidahn kokohp en kaudiahl kapwuriamwei wet?
2 Pwihn en luwen me keidi kan oh iangerail sihpw teikan kin ehupene kalohkiseli duwen sapwellimen Koht kadeik kan. Met kin imwikihla kasalepen pelien Kristendom ah kin mehla ni pali ngehn. Kitail pahn kasawihada ire kesempwal riau en kokohp en kaudiahl wet me kin kasansalehda kahrepen doadoahk en kalohk me irail sapwellimen Koht ladu kan kin inenen pweida mehlel.
3. Kaweid oh kaiahn dahieu ke kin ale pwen sewese iuk en pweida ni ahmw kin kalohkiseli Mahsen en Koht?
3 Aleier Kaiahn oh Sawas ong Kalohki Mahsen en Koht: Ki Theocratic Ministry Sukuhl oh mihding en mwomwohdiso teikan, sapwellimen Koht sounpapah kan kin lohkiseli mahsen en Koht ni manaman. Irail kin kahlemengih Sises oh sapwellime tohnpadahk kan, ni ahr kin kohwei oh rapahki aramas me kin perenki rong oh kalohk wasa koaros aramas akan kin mih ie. (Madiu 10:11; Mark 1:16; Luk 4:15; Wiewia 20:18-20) Koasoandi en kalohk me mih nan Pwuhk Sarawi kin pweida mehlel!
4. Dipwisou en doadoahk dah kei sounkalohk kan kin doadoahngki pwen sewese irail en kapwaiada arail doadoahk en kalohk?
4 Kristian soun papah kan kin kapwaiada sapwellimen Koht doadoahk en kalohk oh irail kin kihseli Pwuhk Sarawi, pwuhk, brochure oh makasihn lik kei. Pwuhk pwukat kin wiawihda ni kereniong lokaia 400, oh audepe kan kin pid soangsoangen oaralap kan oh kin wiawihda pwen kaperenda soangen aramas tohto. Ke kin doadoahngki pwuhk pwukat ni ahl me pahn pweida mwahu?
5, 6. Dahme kin kadehdehda me sapwellimen Siohwa aramas akan kin ale sawas sang nanleng?
5 Kaweid oh Sawas me kin Kohsang Nanleng: Kokohp en kaudiahlo kin pil kawehwe ni sansal me Koht kin ketin sewese doadoahk me sounpei soundak oahs akan kin wia. (Kaudiahl 9:13-15) Doadoahk en kalohk me kin wiawi wasa koaros nan sampah kin pweida mwahu, kaidehn pwehki erpit de kehl me kohsang aramas akan, ahpw sang rehn sapwellimen Koht ngehn sarawi. (Sekaraia 4:6) Siohwa kin doadoahngki tohnleng kan en apwalihada doadoahk wet. (Kaudiahl 14:6) Eri, sapwellimen Siohwa aramas Sounkadehde kan kin nantiong en wia doadoahk wet, ahpw Siohwa kin pil ketikihda sawas sang nanleng pwen kahre aramas opampap kan en kohla rehn Koht.—Sohn 6:45, 65.
6 Sapwellimen Siohwa aramas akan kin aleier kaiahn oh kaunopada mwahu pwen kalohkiseli Mahsen en Koht, oh tohnleng kan kin pil apwalih irail, ihme kahrehda sohte mehkot pahn kak kauhdi irail. Kitail en kapwaiada atail pwukoa oh kilang pweidahn kokohp en kaudiahl wet.