Kasalehda Ahmw Kalahngan
1 Mendahki kitail kin mihmi ni “ahnsou apwal akan,” kitail ahneki kahrepe tohto en kasalehda kalahngan ong Siohwa. (2 Tim. 3:1) Kahrepe me keieu kesempwal iei kisakis kaselel me Siohwa ketikihong kitail iei sapwellime Ohl me matkinkitailla. (Sohn 3:16) Oh pil, mendahki irail me iang kaudok likamw kin duhpek ni pali ngehn, kitail kin paieki diren mwengehn ngehn. (Aiseia 65:13) Kitail kin wia kisehn pirien en pali ngehn me mihmi wasa koaros nan sampah oh kitail ahneki pwais kaselel en iang kilang aramas tohto iangala kaudok mehlel. (Aiseia 2:3, 4; 60:4-10, 22) Iaduwen kitail kak kasalehda atail kalahngankihong Siohwa kapai kan me E kin ketikihong kitail ni mwuledek?—Kolose 3:15, 17.
2 Papah Siohwa Ni Peren oh Mohngiong Unsek: Ni ahnsou me wahnpoaron Pohl koasoia duwen kisakiski dipwisou kan, e ntingihdi: “Koht kin ketin poakohng me kin perenki kihwei mehkot.” (2 Kor. 9:7) Kaweid wet pil kin dokedoke atail papah Koht. Kitail kak kasalehda kalahngan ni atail pahn ngoangki koasoia duwen padahk mehlel, atail peren ni ahnsou me kitail kin iang towehda mihding kan, atail ngoangki kalohk, oh pil atail peren ni ahnsou me kitail kin wia kupwuren Koht.—Melkahka 107:21, 22; 119:14; 122:1; Rom 12:8, 11.
3 Nan wehin Israel en kawao, Kosonnedo sohte kin idingkihong emen uwen me e pahn kihda ni ahnsou me e kin wia ekei meirong kan. Emen emen tohnkaudok pahn kak kasalehda ah kalahngan ni e pahn kihda “uwen me e kakong, sang ni pai kan me Kauno [“Siohwa,” New World Translation], amwail Koht, ketin kupwuramwahwiheki.” (Deud. 16:16, 17) E pil duwehte rahnwet, emen me ahneki mohngiong me direki kalahngan pahn mwekidki met oh e pahn wia uwen ah kak koaros nin duwen ah irair kan pwehn iang doadoahk en kalohkiseli Wehin Koht oh pil katohnpadahk. Sounpwong en June, July, August (sounpwong en summer) kin kihda ahnsou mwahu kan en kasalehda atail kalahngan. Ekei kin kommoal sang doadoahk de sukuhl oh irail kin kalaudehla arail ahnsoun kalohk, oh pil ekei kin iang doadoahk en Auxiliary Pioneer. Ke kak kalaudehla ahmw ahnsoun kalohk nan summer wet (June, July, August)?
4 Audaudki Kapingkalahngan: Ehu ahl me kesempwal me kitail kak kasalehda atail kalahngan ong Siohwa iei kapakap. (1 Dese. 5:17, 18) Mahsen en Koht kin kangoange kitail en “audaudki pwoson oh kapingkalahngan.” (Kol. 2:7) Mendahki kitail kin kedirepw de ahneki pwunod, kitail uhdahn pahn kapakap rahn koaros oh kasalehda atail kapingkalahngan ong Siohwa ahnsou koaros. (Pilipai 4:6) Ei, ni atail kin iang doadoahk en kalohk iangahki kapakap, kitail en “ahnsou koaros kasalehda atail kalahngan ong Koht.”—2 Kor. 9:12.