Siohwa Kin Sewese Irail me Kin Likih Ih
1 Aramas tohto kin kilangwong mwohni, manaman, oh koahiek en aramas me iei kahrepe kan me mour kak pweida mwahu. (Melkahka 12:4; 33:16, 17; 49:6) Ahpw, irail kan me kin lemmwiki Siohwa oh likih Ih kin ahneki koapworopwor me Paipel kin kasalehda me “Siohwa pahn wia sawasparail oh sileparail.” (Mel. 115:11, New World Translation) Kitail en koasoiapene soahng riau me kitail anahne kasalehda atail likih Siohwa.
2 Nin Duwen Sounkalohk Kristian kan: Ahnsou koaros me kitail kin wia atail padahk nan Kingdom Hall de wia atail padahk nan kalohk, kitail anahne likih atail Koht. Medemedewe mehn kahlemeng mwahu en Sises. Mendahki ih sapwellimen Koht Ohl, e sohte kin likih pein ah loalokong de koahiek ahpw e kin likih ni unsek Semeo nanleng. (Sohn 12:49; 14:10) E pil kesempwal kitail en likih Siohwa ni unsek! (Lepin Padahk 3:5-7) Ihte ma kitail pahn ale sawas sang rehn Siohwa me atail nannanti papah Ih pahn kak pweida mwahu ni atail kak kawahuwih Ih oh sewese meteikan.—Mel. 127:1, 2.
3 Kitail kin kasalehda atail likih Siohwa sang ni atail kapakap ong Ih oh peki sapwellime kaweid oh sawas en ngehn sarawi. (Mel. 105:4; Luk 11:13) Oh pil, kitail kin kasalehda atail likih Koht sang ni atail wia padahk me poahsoanda pohn sapwellime Mahsen, Paipel. Mahsen en Koht kin sair mohngiong en aramas oh kak kamwekid irail en wekidala arail mour. (Ipru 4:12) Ni atail kin “padahk nin duwen sounpadahk me kin kehlki sapwellimen Koht sawas,” kitail kin kalinganala mwaren Siohwa.—1 Pit. 4:11.
4 Powehdi Kahpwal akan: Kitail pil anahne likih Siohwa en sewese kitail ni atail kin lelohng kahpwal de kasongosong kan. (Mel. 46:1) Karasepe, mwein atail kaun en doadoahk sohte men mweidohng atail ahnsoun kommoal pwehn iang towehda kapokon, de kitail lelohng kahpwal kan nan atail peneinei. Kitail kin kasalehda atail likih Siohwa ni atail kin nannanti kapakap ong Ih oh doadoahngki sapwellime kaweid me kin kohsang sapwellime Mahsen oh sapwellime pwihn. (Mel. 62:8; 119:143, 173) Ni arail kin wia met, sapwellimen Siohwa ladu kan kak kilang sapwellime sawas nan arail mour.—Mel. 37:5; 118:13, 16.
5 Pein Siohwa kin kamehlelehiong kitail mahsanih: “I pahn kupwuramwahuwih aramas me kin koapworopworkin ie oh likih ie.” (Seremaia 17:7, NW) Kitail en nantihong kasalehda atail likih Siohwa nan soahng koaros me kitail wia.—Mel. 146:5.