Prokram Kapw en Kapokon en Circuit
1 Pwehn kesihnenda teng nan pwoson nan sampah liseliping wet, kitail anahne likih Siohwa. Iaduwen kitail kak kasalehda me kitail kin likih Siohwa nan atail mour en ehuehu rahn? Iaduwen atail kin likih Siohwa kin sewese kitail nan pein atail mour oh mour en peneinei? Iaduwen e kin sewese kitail en dehr lohdi pahn kasongosong kan me kin kohsang rehn ahn Sehdan sampah? Prokram en Kapokon en Circuit ong pahr en kalohk en 2003 pahn sapeng peidek pwukat. Oaralap en kapokon wet iei “Likih Siohwa oh Wia Dahme Mwahu.”—Melkahka 37:3.
2 Atail kin likih Siohwa kaidehn ongete ahnsou tohrohr kan de ahnsou kan me kitail anahne sawas. Atail likih Siohwa pahn kaunda atail wiewia kan en ehuehu rahn. Met pahn sansal nan tepin padahk en kapokono me oaralap koasoia: “Likih Siohwa Ahnsou Koaros.” (Mel. 62:8) Oh pil, padahk pahieu pahn wiawi me pahn koasoia oaralap wet: “Kasalehda Ahmw Likih Siohwa” oh padahk pwukat pahn kasalehda iaduwen kitail kak diar oh doadoahngki kaweid nan Paipel me pahn sewese kitail en wiahda atail mour en pwopwoud en kak pweida mwahu, dahme kitail kak wia ma kahpwal kan kin pwarada nanpwungen tohnpeneinei kan, oh iaduwen kitail kak kaitarala atail anahn en paliwar kan.
3 Ahn Sehdan sampah kin song en “kawekila” atail madamadau pwe kitail pahn ahneki madamadau sapwung duwen dahme pwung oh dahme sapwung oh kahrehda kitail en pingkihda dahme kesempwal nan atail mour oh dahme sohte kesempwal. (Aiseia 5:20) Padahk kan me oaralap kan koasoia “Pere Pein Uhk Sang Soahng kan me Sohte Katepe Nan Mour” oh “Liksang Dahme Suwed—Wia Dahme Mwahu”—padahk pwukat pahn sewese kitail en men kolokol sapwellimen Siohwa kosonned akan nan atail mour.—Eimwos 5:14.
4 Ni ahnsou me Siohwa pahn kauwehla koasoandi suwed wet, sapwellimen Koht ladu kan anahne likih Siohwa ni unsek. Met pahn sansal nan Kapahrek ong Wehi Pokon me oaralap koasoia: “Pitsang Kahpwal Laud kan en Sampah Kerendohr.” Mwurin mwo, kitail pahn kak kasawihada pein kitail ahnsou me kitail pahn rong padahko me oaralap koasoia: “E Konehng Ken Mihmi Pahn Kaundahn Wehin Koht?” Prokram en rahno pahn imwisengkihla kaweid wet: “Likih Sapwellimen Siohwa Inou kan.”
5 Mehkot kaperen me kin wiawi nan ehuehu kapokon iei padahk en papidais. Ma emen men papidaisla, e pahn anahne mwadang kehsehki Presiding Overseer duwen met pwe elder kan kak koasoanehdi koasoandi kan duwen met.
6 Nan ahnsou wet me kitail sehse dahme pahn wiawi lakapw pali, Siohwa kin wia emen me kitail kak likih unsek. (Mel. 118:8, 9) Kitail koaros kak kakehlailih atail likih Siohwa ni atail pahn iang towehda prokram en Kapokon en Circuit pwon.