Kumwail Kakehlakahda Emenemen Kumwail
1 Wahnpoaron Pohl kin wia uwen me e kak en kakehlailihala ienge tohn kaudok akan. (Wiewia 14:19-22) Kitail kin pwunodki riatail brother oh sister kan ni ahnsou me irail kin lelohng kapwal akan, oh kitail men sewese irail. Pwuhk Sarawi kin kasalehda me kaidehn irail elder kante, ahpw sounkalohk kan koaros, anahne nsenohki meteikan. (Rom 15:1, 2) Tehk duwen ahl riau me kitail kak kapwaiada kaweid limpoak wet: “Kumwail kakehlakahda emenemen kumwail, oh sawaspene, duwen me kumwail wiewia ahnsou wet.”—1 Deselonika 5:11.
2 Dehdehkihla Mwahu Anahn en Mehteikan: Sapwellimen Koht Mahsen kin kasalehda me Dorkas “mweidohng eh ahnsou koaros en wiewia mwahu oh sewese me semwehmwe kan.” (Wiewia 9:36, 39) E kin tehk mwahu ihs irail akan me anahne sawas oh e pil kin wia dahme e kak wia pwen sewese irail. E wia mehn kahlemeng mwahu ong kitail! Mwein ke pahn kilang me brother de sister mah anahne mehn peidaid ong mihding kan. De mwein sohte me pahn iang pioneer men kalohk mwurin souwas nan wihk kan. Medemedewe uwen laud sounkalohk menet pahn peren ni ahnsou me ke pahn kasawih ah anahn akan oh sewese ih!
3 Koasoi ngenen kan: Kitail pil kak kakehlailihala meteikan sang atail lokaia kan. (Episos 4:29) Emen elder koahiek koasoia: “Ma ke men kangoange meteikan, koasoia duwen mehkan me kin pid kakehlailih atail pali ngehn. Ke kak tepida koasoiong irail ni ahmw pahn wia soangen peidek kan duwehte met: ‘Iaduwen ke sukuhliki padahk mehlel?’ ” Kasalehda me ke kin nsenohki irail me pwulopwul kan nan mwomwohdiso. Oh pil nsenohki irail sounkalohk kan me kin pahtoula oh kin namenek. (Lepin Padahk 12:25) Ken dehr mweidong koasoi kan me kin pid mehn kamweit en sampah wet en kihsang atail ahnsoun koasoi duwen mehkan ni pali ngehn rehn iengetail brother oh sister kan.—Rom 1:11, 12.
4 Ahpw, dahme ke kak koasoia pwehn kakehlailihala pwoson en meteikan? Ni ahnsou me ke wia pein ahmw onop Pwuhk Sarawi, ke diarada ire ieu me kaloalehla ahmw limpoak oh kalahnganki dahme Siohwa kin wia? Mie mehkot ke rong sang Kapahrek ong wehi pokon de Onop en Kahn Iroir me kamwekid uhk? De mie ekspiriens ehu me sair ahmw mohngiong? Ma ke kin kesempwaliki ire kan me kin kakehlailihala atail pali ngehn, ahnsou koaros ke kak ehukihong mehteikan duwen ire pwukat pwehn kangoange irail.—Lepin Padahk 2:1; Luk 6:45.
5 Sang ni atail kin kihda atail sawas oh wia koasoi kangoang kan, kitail kak kakehlailihala meteikan.—Lepin Padahk 12:18.