En Koahiekla Sewese Aramas Teikan en Wehwehki Duwen Padahk Mehlel
1. Mehnia iren Paipel kan kitail pahn kasawih, oh dahme kahrehda?
1 Pwuhken Wie. 13:16-41 kasalehda duwen padahk me wahnpoaron Pohl wia nan sinakoke en Andiok nan Pisidia. Ma kitail kasawih padahk wet, kitail kak sukuhliki iaduwen kitail kak sewese aramas teikan en wehwehki duwen padahk mehlel. Ni ahnsou me Pohl kin padahk ong aramas akan, e kin medemedewe duwen arail madamadau kan oh wasa me irail kin tikida ie, oh e kin kawekihla sapwellime padahk kan pwe irail koaros pahn kak wehwehki duwen Rongamwahu. Ni atail kin tehk mwahu iren Paipel pwukat, kitail pahn medemedewe iaduwen kitail kak wia met ni ahnsou kitail kin iang kalohk.
2. Dahme kitail sukuhliki sang tepin koasoi kan en Pohl?
2 Pilada Padahk Ehu me Kumwa kak Pwungkipene: Mendahki sapwellimen Pohl padahk kin pid duwen sapwellimen Sises pwukoa me kin pid kupwuren Koht, Pohl sohte tepikihda koasoiong irail duwen Sises. Ahpw, Pohl koasoi duwen mehkot me ih oh irail mehn Suhs akan kin pwungkihpene—iei poadoapoad en mehn Suhs akan. (Wie. 13:16-22) Eri, pil duwehte kitail, kitail pahn kak pweida mwahu nan kalohk ma kitail pahn kak pilada padahk ehu me kitail oh tohnihmw kan pahn kak pwungkihpene. Ele mwein kitail anahne kangoange tohnihmw kan en kasalehda pein arail pepehm akan. Kitail kak wia met ni atail kin doadoahngki peidek konehng kan oh rong kanahieng pwe kitail en kak wehwehki dahme irail kin kesempwaliki nan arail mour.
3. Dahme kahrehda aramas akan kin apwaliki kamehlele me Sises iei Mesaia?
3 Ni ahnsou me Pohl kasalehda duwen poadoapoad en mehn Suhs akan, e kataman ong aramas akan duwen sapwellimen Koht inou me pid emen me pahn wia sounkomour emen me kohsang kadaudok en Depit. Ahpw, mehn Suhs tohto kin awiawih aramas kehlail emen en kasaledekirailla sang kaunda en Rom oh irail men pein arail wehi en siksang meteikan. Irail ese me kaun en pelien lamalam mehn Suhs akan nan Serusalem uhwong Sises oh irail me kahrehong kaun en Rom akan en kemehla Sises. Iaduwen Pohl kak sewese mehn Suhs akan en kamehlele me Sises iei Mesaia?
4. Iaduwen Pohl ni ahl koahiek sewese mehn Suhs akan en kamehlele padahk mehlel?
4 Kawekila Ahmw Padahk: Ni ahnsou me Pohl kin ese duwen madamadau en aramas me kin rong ah padahk, e kin koasoaiong irail duwen padahk kan me irail pwungkier, oh e doadoahngki iren Paipel kan ni ahl me pahn kahrehong irail en wehwehki padahk mehlel. Karasepe, e kawehwehda me Sises kohsang kadaudok en Depit oh me Sohn Sounpapidais pil kalohk ong aramas koaros duwen Sises. Oh aramas tohto kin kamehlele me Sohn Sounpapidais nin duwen sapwellimen Koht soukohp. (Wie. 13:23-25) Pohl kasalehda me ahnsou me kaun en pelian lamalam kan soikala Sises oh kadeik ih, irail “kapwaiada mahsen en soukohp ako ni ahr kemehla Sises.” (Wie. 13:26-28) Oh pil e kawehwe me mie aramas me pein kilang Sises mwurin ah iasada sang mehla, oh e doadoahngki iren Paipel kan me irail esehier me pweidaher me pid iasadahn Sises.—Wie. 13:29-37.
5. (a) Iaduwen Pohl kawekila ah padahk ni ahnsou me e koasoiong irail mehn Krihk kan? (b) Iaduwen kitail kak kahlemengih mehn kahlemeng mwahu en Pohl ni ahnsoun kalohk?
5 Ni ahnsou me Pohl padahk ong mehn Krihk kan nan Areopakus nan Adens, e kin sewese irail en wehwehki padahk mehlel ni ahl tohrohr. (Wie. 17:22-31) Edetehn ah sidail en padahk kin wekpeseng, mouren ah padahk kin duduwehte, oh ah padahk kan koaros kin pweida. (Wie. 13:42, 43; 17:34) Rahnwet, atail doadoahk en kalohk pahn pweida mwahu ma kitail pahn rapahki oaralap ieu me kitail oh sounrongorong kan kak pwungkihpene oh ma kitail pahn medemedewe duwen arail madamadau kan oh soangen mour me re tikida loale, kitail pahn kak kawekila pein atail padahk kan me pahn konehng irail.