Pakairki Sapwellimen Siohwa Lingan
1 Sounmelkahkao mahsanih: “Kumwail, tohnsampah pokon, kumwail kouliong Siohwa! . . . Kumwail kalohki duwen sapwellime lingan ong tohn wehi kan, oh wiepen nin lime manaman akan en lohkohng aramas koaros.” Ni ahnsou me kitail kin medemedewe duwen dahme Siohwa ketin wiahdahr mahs, oh met oh pahn wiahiong kitail ahnsou kohkohdo, e pahn kamwekid kitail en kalohkiwei sapwellime lingan!—Mel. 96:1, 3.
2 Nan Atail Doadoahk en Kalohk: E wia kapai ehu ong Sounkadehdehn Siohwa kan en ahdiki mwaren Koht oh pil en kapinga Siohwa wasa koaros nan sampah. (Mal. 1:11) Met weksang kaunen Kristendom, me kin irisasang mwaren Koht sang neirail kawehwehn Pwuhk Sarawi kan! Doadoahk en pakairki mwaren Koht kin wia doadoahk karuwaru oh kesempwal ehu pwe aramas koaros en kak likweriong mware ni pwoson oh ale komourparail ni rahnen Kahn Kamakam Kowahlap. (Rom 10:13-15) Pil laud sang met, popohl nanleng oh pil sampah oh pil nanpwungen tohnsampah kan pahn kak wiawi sang kasarawihlahn mwaren Koht. Met kin kasalehda me doadoahk en Koht koaros kin pid mware.
3 “Siohwa me lapalap oh warohng ale kaping.” Ahpw, pwe aramas en kak “kapinga lingan en mwaren Siohwa,” irail anahne en sukuhliki duwen mehlel en Ih. (Mel. 96:4, 8) Ahpw, ekei aramas sohte kamehlele me mie Koht. (Mel. 14:1) Ekei aramas kin nda me Koht luwet de e sohte kin nsenohki dahme aramas kin wia. Ni ahnsou me kitail kin sewese aramas en sukuhliki duwen Siohwa, kupwure, oh sapwellime irair kan, kitail kin kapinga Ih.
4 Sang Atail Wiewia kan: Kitail kin wauneki Siohwa ni ahnsou me atail wiewia kan kin pahrekiong kupwure. Aramas teikan kin tehk atail wiewia mwahu kan. (1 Pit. 2:12) Karasepe ieu, atail likouki likou me mwakelekel oh soandi mwahu kin kamwekid aramas teikan en kapinga kitail, oh kitail uhd kak kapinga Siohwa ni atail pahn kasalehda duwen kamwahupen doadoahngki iren kaweid kesempwal akan en nan sapwellimen Koht mahsen. (1 Tim. 2:9, 10) Kitail kin perenki kilang aramas akan ni arail kin “kilang atail wiewia mwahu kan oh kapikapingahki Samatail me ketiket nanleng.”—Madiu 5:16.
5 Sang atail koasoi oh wiewia mwahu kan, kitail kin kapinga Koht rahn koaros, oh ni ahl wet, kitail kak kapwaiada mahsen kaperen pwukat: “Kumwail kouliong Kauno, oh kapinga mware! Kumwail lohkiseli rongamwahun sapwellime komour rahn koaros.”—Melkahka 96:2.