Kasalehong Aramas Koaros Mwaren Koht
1. Iaduwen aramas akan kin mwekidki arail sukuhliki mwaren Koht?
1 Ia mwomwen ahmw pepehm kan ni ahmw tepin sukuhliki mwaren Koht? Aramas tohto kin ahneki soangen pepehm duwehte lih menet me koasoia: “Ni ahi tepin kilangada mwaren Koht nan Paipel, I sengiseng. Ahi sukuhliki oh kak doadoahngki mwaren Koht inenen kamwekid ie.” Ong liho, sukuhliki mwaren Koht wia ewen kahk kesempwal ieu en esehla Siohwa oh pil wiahda nanpwung mwahu reh.
2. Dahme kahrehda e kesempwal oh karuwaru kitail en padahkihong aramas teikan duwen Siohwa?
2 Dahme Kahrehda Kitail en Kasalehong Aramas Koaros Mwaren Koht? Wehwehn mwaren Koht kin pid duwen sapwellimen Koht irair kan, kupwur kan, oh wiewia kan. E pil kin pid duwen komourpatail. Wahnpoaron Pohl ntingihdi: “Koaros me kin likweriong mwaren Siohwa pahn mourla.” Ahpw, Pohl pil kapataiong: “A ia duwen arail pahn kak likweriong” ma re sohte mahs sukuhliki duwen Siohwa oh pwoson Ih? Kahrehda, e inenen kesempwal oh karuwaru Kristian kan en kasalehong meteikan mwaren Koht oh pil ia wehwehn mwaro oh iaduwen e pid atail mour. (Rom 10:13, 14, NW) Ahpw, mie pil ehu kahrepe kesempwal me kitail anahne kasalehong aramas teikan duwen mwaren Koht.
3. Ia kahrepe keieu kesempwal me kitail kin kalohk?
3 Nan pahr en 1920 samwa, sapwellimen Koht aramas akan kasawihada sang nan Pwuhk Sarawi duwen kesempwalpen uhpahiong sapwellimen Koht kaundahn lahng oh sampah oh pil kesempwalpen kasarawi mwaren Koht. Mwohn Siohwa pahn kasohrala me suwed kan me kin kauwehla mware, padahk mehlel anahne en “lohkseli wasa koaros nin sampah.” (Aiseia 12:4, 5; Esekiel 38:23) Ihme kahrehda, kitail wehwehki me kahrepe keieu kesempwal me kitail kin kalohk iei en kapinga Siohwa oh kasarawi mware mwohn aramas koaros. (Ipru 13:15) Limpoak ong Koht oh mehn mpatail pahn kamwekid kitail en wia uwen atail kak en iang doadoahk me Koht koasoanehdi ong kitail.
4. Dahme kahrehda aramas kin mwadang tamanda Sounkadehdehn Siohwa kan ni ahnsou me irail kin rong mwaren Koht?
4 “Aramas Kei Me Wa Mwaren Koht”: Nan pahr 1931, kitail alehda ahd wet: Sounkadehdehn Siohwa kan. (Aiseia 43:10) Sangete ahnsowo lel met, sapwellimen Koht aramas akan kin pakairkihong aramas koaros mwaren Koht oh pwehki met, pwuhken Proclaimers, pali 124, ntingihdi: “Wasa koaros nin sampah, ma aramas pahn kilang emen kalap doadoahngki mwaren Siohwa, aramas akan pahn mwadang nda me ih emen Sounkadehdehn Siohwa kan.” Iaduwen—aramas akan kin ese iuk nin duwen emen Sounkadehdehn Siohwa kan? Atail kalahnganki sapwellimen Siohwa kamwahu pahn kamwekid kitail en ‘kapinga mware,’ oh koasoia duwen ih ni ahnsou mwahu koaros.—Melkahka 20:7; 145:1, 2, 7.
5. Iaduwen atail tiahk kan kin pid atail wa mwaren Koht?
5 Nin duwen “aramas kei me wa mwaren Koht,” kitail anahne kapwaiada sapwellime koasoandi kan. (Wiewia 15:14; 2 Tim. 2:19) Pali laud en ahnsou, aramas kin mwadangete kasawihada me Sounkadehdehn Siohwa kan kin tiahk mwahu. (1 Pit. 2:12) Kitail sohte men kauwehla mwaren Koht ni atail pahn mwamwahleki kaweid me kin kohsang rehn Koht de mweidohng atail kaudokiong Koht en keriau nan atail mour. (Lipai 22:31, 32; Malakai 1:6-8, 12-14) Weksang met, kitail men kasalehda sang atail elen mour me kitail kesempwaliki pwais kaselel me kitail ahneki en kin wa mwaren Koht.
6. Pwais kaselel dahieu me kitail ahneki met oh pil pahn kohkohlahte?
6 Rahnwet, kitail kin kilang mahsen en Siohwa wie pweipweida: “Aramas akan sang wasa koaros nin sampah kin kapinga mwarei.” (Mal. 1:11) Kitail en nantihong kasalehong aramas koaros padahk mehlel duwen Siohwa oh “kapinga mware sarawi ahnsou koaros kohkohlahte.”—Melkahka 145:21.