Mwaren Siohwa—Ia Wehwehn Met ong Kitail

1-2. Ia duwen atail ese me mwaren Siohwa kin kesempwal ong Sises?

MWAREN Siohwa me keieu kesempwal ong Sises. Sohte emen likin ih me uhdahn ketin kadehdehda mwaren Siohwa. Nan iren onop en mwoweo, kitail sukuhlki me Sises kupwurki pwoula pwehn kadehdehda me Siohwa ketin sarawi oh me sapwellime koasoandi kan koaros kin pwung. (Mark 14:36; Ipru 10:​7-9) Oh mwurin Kaundahn Pahr Kido, Sises pahn kapwurehiong Semeo manaman koaros pwehki e men Siohwa en ketin ale kaping koaros. (1 Kor. 15:​26-28) Soahng koaros me Sises ketin wiahiong Siohwa kadehdehda me e uhdahn poakohng Siohwa.

² Sises ketido nin sampah ni mwaren Semeo. (Sohn 5:43; 12:13) E ketin padahkihong sapwellime tohnpadahk ko duwen mwaren Semeo. (Sohn 17:​6, 26) Ni eh ketin padahkih aramas akan oh wiahda manaman kan, e kasansalehda me Siohwa me ketikihong ih erpit oh manaman en wia soahng pwukat koaros. (Sohn 10:25) Oh ni eh kapakapki Siohwa en ketin sinsile sapwellime tohnpadahk kan, e patohwan peki en ketin wia met ‘pwehki mwaren’ Siohwa. (Sohn 17:11) E sansal me ong Sises, mwaren Koht kesempwalsang soahng teikan. Eri, ia duwen emen eh kak nda me e kin idawehn Sises ahpw e sohte ese de kin doadoahngki mwaren Siohwa?

3. Dahme kitail pahn koasoiapene nan iren onop wet?

³ Pwehki kitail wia Kristian mehlel kei, kitail kin kahlemengih Sises sang ni atail kin kasalehda me kitail poakohng oh wauneki mwaren Siohwa. (1 Pit. 2:21) Nan iren onop wet, kitail pahn kilang ia duwen mwaren Siohwa kin kasansalehda irail kan me kin kalohki “rongamwahu en Wehio.” (Mad. 24:14) Kitail pahn pil koasoiapene ia wehwehn mwaren Siohwa ong pein kitail.

“ARAMAS EKEI ONG MWARE”

4. (a) Dahme Sises ketin padahkihong sapwellime tohnpadahk ko mwohnte eh ketidahla nanleng? (b) Peidek dah kan me kitail pahn koasoiapene?

⁴ Mwohnte Sises ketidahla nanleng, e mahsanihong sapwellime tohnpadahk ko: “Kumwail pahn alehdi manaman ni ahnsou me sapwellimen Koht manaman pahn kohdiong pohmwail, oh kumwail pahn wia ei sounkadehde kan nan Serusalem, nan Sudia pwon oh Sameria, oh pil wasa me keieu doh nin sampah.” (Wiewia 1:8) Eri tohnpadahk ko pahn kalohki rongamwahwo wasa koaros, kaidehnte nan Israel. Kedekedeo, aramas akan sang sampah pwon, pahn ahneki ahnsou mwahu en wiahla tohnpadahk en Sises. (Mad. 28:​19, 20) Ahpw Sises mahsanih: “Kumwail pahn wia ei sounkadehde.” Ia duwe, tohnpadahk kapw pwukat anahne ese mwaren Siohwa, de re pahn wiahte sounkadehdehn Sises? Dahme wiawi nan Wiewia irelaud 15 pahn sewese kitail en sapengala peideko.

5. Ia duwen wahnpoaron kan oh ohl mah kan nan Serusalem ar kasalehda me aramas koaros anahne ese mwaren Siohwa? (Pil kilang kilel.)

⁵ Nan pahr 49, wahnpoaron kan oh ohl mah kan nan Serusalem kohpene pwehn koasoiapene ma irail kan me kaidehn mehn Suhs pahn anahne sirkumsaisla pwehn wiahla Kristian. Ni kaimwiseklahn arail koasoipeneo, Seims rien Siseso, koasoia: “[Piter] kawehwehda mwahu duwen Koht eh tepin sohpeiong mehn liki kan pwe en ketikihsang nanpwungarail aramas ekei ong mware.” Mwaren ihs me Seims koasoakoasoia? E koasoia dahme soukohp Eimwos koasoia: “Pwe aramas akan me luwehdi en kak nantihong rapahki Siohwa, iangahki tohnwehi koaros, aramas akan me kin adaneki mwarei, Siohwa me mahmahsen.” (Wiewia 15:​14-18) Tohnpadahk kapw pwukat sohte pahn esehlahte duwen Siohwa ahpw re pahn pil ‘adaneki mwareo.’ Met wehwehki me re pahn ehukihong meteikan mwaren Koht oh aramas akan pahn esehkin irail mwar wet.

6-7. (a) Dahme kahrehda Sises ketido nin sampah? (b) Ia kahrepe keieu kesempwal me Sises ketikihdohki sampah?

⁶ Mwaren Sises kin wehwehki “Siohwa Iei Sounkomour,” oh Siohwa ketin doadoahngki Sises pwehn kapitala aramas koaros me kin pwoson ih oh sapwellime Ohlo. Sises ketido nin sampah pwehn tounmeteikihla moure ong aramas akan. (Mad. 20:28) Sang ni meirong wet, e ketin kahrehiong aramas akan en kak ale mahkpen diparail oh ahneki mour soutuk.—Sohn 3:16.

⁷ Ahpw dahme kahrehda aramas akan anahne pweinen pweipwei sapahlo? Met pwehki dahme wiawi nan mwetuwel en Eden. Nin duwen me iren onop en mwoweo kasalehda, atail tepin pahpa nohno, Adam oh Ihp, uhwongada Siohwa oh luhssang mour soutuk. (Sen. 3:​6, 24) Ahpw, Sises ketido nin sampah pwehn wia mehkot me kesempwalsang doarehla aramas akan. Sehdan kin koasoia soahng likamw kan duwen Siohwa. (Sen. 3:​4, 5) Eri aramas akan anahne ese me Siohwa sohte ketin wiahda sapwung oh me mwareo sarawi. Oh Sises me keieu konehng kadehdehda met pwehki e wia wiliepen Siohwa oh ni unsek e kapwaiada soahng koaros me Siohwa ketin kupwurki en wia.

8. Dahme irail koaros me kin idawehn Sises anahne pohnese?

⁸ Irail koaros me kin pwoson Sises, mehn Suhs oh mehn liki kan anahne pohnese me Semen Siseso Siohwa Koht, iei uhdahn arail sounkomour. (Sohn 17:3) Patehng met, duwehte Sises, aramas akan pahn kahdanekin irail mwaren Siohwa. Irail pil anahne wehwehki ia uwen kesempwal en kasarawihala mwaro. Re anahne wia met pwe Koht en ketin kupwurkin irail oh ren alehdi mour soutuk. (Wiewia 2:​21, 22) Eri sapwellimen Sises tohnpadahk lelepek kan koaros anahne sukuhlki duwen Siohwa oh pil Sises. Ih kahrepen met me Sises kaimwisengkihla eh loulou me kileldi nan Sohn 17: “Ngehi me kahrehiong irail en ese mwaromwi, oh I pil pahn usehlahte wia met, pwe limpoak me komw ketin wiahiong ie en mi rehrail oh I en miniminiong irail.”—Sohn 17:26.

“KUMWAIL PAHN WIA EI SOUNKADEHDE”

9. Ia duwen atail kak kasalehda me mwaren Siohwa kin kesempwal ong kitail?

⁹ Sang dahme kitail koasoiapenehr, e sansal me pwehn idawehn Sises, kitail anahne kasarawihala mwaren Siohwa. (Mad. 6:​9, 10) Kitail anahne wiahki mwaren Siohwa me keieu kesempwal. Oh kitail anahne kasalehda me kitail ahneki pepehm wet. Eri, dahme kitail anahne wia pwehn kasarawihala mwaren Siohwa oh kadehdehda me dahme Sehdan koasoiahki duwen Siohwa sohte mehlel?

10. Dahme Aiseia irelaud 42 lel 44 kasalehda? (Aiseia 43:9; 44:​7-9) (Pil kilang kilel.)

¹⁰ Nan Aiseia irelaud 42 lel 44, kitail sukuhlki dahme kitail kak wia pwehn kasarawihala mwaren Siohwa. Nan irelaud pwukat, Siohwa ketin keinemwe rehn aramas akan me sohte kin kaudokiong ih ren kadehdehda ma arail koht kan uhdahn mehlel. Duwehte kopwung me kin wiawi, Koht ketin keinemwe ma mie sounkadehde kan me kak kadehdehda met. Ahpw sohte emen me kak!—Wadek Aiseia 43:9; 44:​7-9.

11. Nin duwen me Aiseia 43:​10-12 mahsanih, dahme Siohwa ketin mahsanihong sapwellime aramas akan?

¹¹ Wadek Aiseia 43:​10-12. Siohwa ketin mahsanihong sapwellime aramas akan: “Kumwail me iei ei sounkadehde, . . . oh . . . ngehite, me Koht.” Siohwa ketin keinemwe ren sapengala peidek wet: “Mie emen koht tohrohr?” (Ais. 44:8) Kitail ahneki pai kaselel en sapengala peideko. Sang dahme kitail nda oh wia, kitail kin kadehdehda me sohte emen Koht likin Siohwa. Mwareo lapalapasang mwar teikan koaros. Oh sang mwomwen atail mour, kitail kin kasalehda me kitail uhdahn poakohng oh loalopwoatohng ih, mendahki Sehdan kin song en kauhkitaildi. Ni ahl wet, kitail ahneki pai kaselel en sewese kasarawihala mwareo.

12. Ia duwen kokohpo nan Aiseia 40:​3, 5 eh pweida?

¹² Ni atail kin kadehdehda mwaren Siohwa, kitail kin kahlemengih Sises Krais. Aiseia pil kohpada me mie me pahn “kaunopadahng KAUN-O sapwellime ahl.” (Ais. 40:3) Ia duwen met eh pweida? Sohn Sounpapidais kaunopada elen Sises, me ketido oh koasoi ni mwaren Siohwa. (Mad. 3:3; Mark 1:​2-4; Luk 3:​3-6) Kokohpohte koasoia: “Lingan en KAUN-O ahpw pahn sansalda.” (Ais. 40:5) Ia duwen met eh wiawi? Ni Sises eh ketido nin sampah, e wia wiliepen Siohwa ni unsek me kahrehda e mwomwen me Siohwa pein ketido nin sampah.—Sohn 12:45.

13. Ia duwen atail kak kahlemengih Sises?

¹³ Duwehte Sises, kitail wia sounkadehdehn Siohwa. Kitail kin kalohki mwaren Siohwa oh padahkihong koaros duwen sapwellime wiewia kaselel kan. Ahpw, pwehn pweida ni atail wia met, kitail anahne pil mweidohng aramas akan en ese soahng koaros me Sises ketin wia pwehn kasarawihala mwaren Siohwa. (Wiewia 1:8) Sohte emen me kadehdehda mwahu duwen Siohwa duwehte Sises, oh kitail kin idawehn eh mehn kahlemeng. (Kaud. 1:5) Ahpw ia wehwehn mwaren Siohwa ong pein kitail?

IA WEHWEHN MWAREN SIOHWA ONG KITAIL

14. Nin duwen me 1 Korint 1:31 mahsanih, ia atail pepehm duwen mwaren Siohwa?

¹⁴ Kitail kin pohlki mwaren Siohwa. (Wadek 1 Korint 1:31.) Siohwa kin uhdahn ketin kupwurperenki ni atail kin suweiki mwareo. (Ser. 9:​23, 24; 2 Kor. 10:17) Kitail kin wiahki pai kaselel en padahkihong meteikan me e ketin sarawi oh pwung ni sapwellime wiewia kan koaros. Kitail en dehr namenengki padahkihong iengatail tohndoadoahk, tohnsukuhl, mehn mpatail, oh meteikan me kitail Sounkadehdehn Siohwa! Tepilo men kitail en uhdihsang padahkihong meteikan duwen mwaren Siohwa. (Ser. 11:21; Kaud. 12:17) Ni mehlel, Sehdan oh irail kan me kin kihpeseng eh likamw kan kin men wiahiong aramas akan en manokehla mwaren Siohwa. (Ser. 23:​26, 27) Ahpw pwehki kitail poakohng mwaren Siohwa, kitail men kapinga ih ahnsou koaros.—Mel. 5:11; 89:16.

15. Ia wehwehn en kin likweriong mwaren Siohwa?

¹⁵ Kitail kin pousehlahte likweriong mwaren Siohwa. (Soel 2:32; Rom 10:​13, 14) En likweriong mwaren Siohwa kin pidada laudsang en esehte oh doadoahngki mware. Kitail esehla me Koht iei emen me kitail kak kompoakepahnki, likih, oh kak peki sapwellime sawas oh kaweid. (Mel. 20:7; 99:6; 116:4; 145:18) Kitail pil kin lohkihong meteikan mwareo oh sapwellime irair kaselel kan, oh sewese irail en wekidala arail mour pwe ren kak kaperenda ih oh komourla.—Ais. 12:4; Wiewia 2:​21, 38.

16. Ia duwen atail kak kadehdehda me Sehdan sounlikamw?

¹⁶ Kitail kin perenki wiahda tounmetei pwehki mwaren Siohwa. (Seims 5:​10, 11) Ni atail kin loalopwoatohngete Siohwa ni atail lelohng kahpwal kan, kitail kin kadehdehda me Sehdan sounlikamw. Ni mwehin Sohpo, Sehdan koasoiahki irail me kin papah Siohwa: “Aramas kin mweidala mehkoaros me e ahneki pwe en doarehla pein eh mour.” (Sohp 2:4) Sehdan kose me aramas akan kin papah Siohwa ihte ni ahnsou me re nsenamwahu ahpw irail pahn kesehla ih ma irail lelohng kahpwal kan. Sohp kadehdehda me met sohte mehlel. Rahnwet, kitail pil kak kadehdehda me mehnda ma atail mour uhdahn apwalla de ni Sehdan eh song en kaluweteikitailla, kitail sohte pahn uhdihsang papah Siohwa. Kitail kak uhdahn kamehlele me Siohwa pahn ketin apwalih kitail pwehki mwareo.—Sohn 17:11.

17. Nin duwen me 1 Piter 2:12 mahsanih, ia pil ehu ahl me kitail kak wahdo kaping ong mwaren Siohwa?

¹⁷ Kitail kin wauneki mwaren Siohwa. (Lep. Pad. 30:9; Ser. 7:​8-11) Pwehki aramas akan ese me kitail Sounkadehdehn Siohwa, kitail kak wauneki mwareo de kauwehla. (Wadek 1 Piter 2:12.) Eri, kitail men wia uwen atail kak koaros en kapinga Siohwa sang ni atail koasoi oh wiewia. Ni atail kin wia met, mendahki atail sohte unsek, kitail pahn wahdohte kaping ong mwaren Siohwa.

18. Ia ehu ahl me kitail kak kadehdehda me mwaren Siohwa kin kesempwal ong kitail? (Pil kilang nting tikitik me mi pah.)

¹⁸ Kitail kin uhdahn nsenohki mwaren Siohwa laudsang pein adatail. (Mel. 138:2) Dahme kahrehda met kesempwal? Pwehki ni atail kin wia soahng kan me kin kaperenda Siohwa, aramas akan kakete sohte perenki oh kauwe kitail.a Ni Sises eh pwoula, aramas akan kin wiahki ih loallap men oh kailongki. Ahpw Sises kupwurki pwoula ni ahl wet pwehn kawauwihala mwaren Siohwa. E “sohte namenengki” me wehwehki e sohte uhdahn pwunodki dahme meteikan medewehki ih. (Ipru 12:​2-4) E kin ketin medemedewehte en wia kupwuren Koht.—Mad. 26:39.

19. Ia omw pepehm duwen mwaren Siohwa, oh dahme kahrehda?

¹⁹ Kitail kin pohlki papah Siohwa oh kin wiahki pai kaselel ehu en adaneki Sounkadehdehn Siohwa kan. Pwehki met, kitail pahn pousehlahte kapinga ih mendahki meteikan kin kilengdiong kitail. Mwaren Siohwa uhdahn kesempwal ong kitail laudsang pein adatail. Eri kitail en koasoanehdi teng en pousehlahte kapinga mwaren Siohwa mendahki Sehdan kin song kauhkitaildi. Ni ahl wet, kitail pahn kadehdehda me mwaren Siohwa me keieu kesempwal ong kitail, duwehte Sises Krais.