Mwaren Siohwa—Ia Wehwehn Met ong Sises?

1-2. (a) Dahme Sises ketin wia nipwongo mwohn eh kamakamala? (b) Peidek dah kan me kitail pahn koasoiapene nan iren onop wet?

NI SOUTIK en Niepeng, Nisan 14, pahr 33, Sises oh sapwellime wahnpoaron lelepek ko wia Sak en Soutuk en Kauno. E mwahngih me kereniong Sudas pahn pangala ih, e pahn ketin lokolok oh eri kamakamala. Eri mwurin arail konoto, e ketin kangoangehki sapwellime wahnpoaron ko soahng tohto. Ni eh lelehr ahnsou me irail koaros pahn kohkohla, Sises wia loulou kesempwal ehu. Kitail kak wadek kapakap wet nan Sohn irelaud 17.

² Dahme sapwellimen Sises kapakapo kasalehiong kitail duwen dahme e ketin pwunodki mwohnte eh pwoula? Dahme kin kesempwal ong ih erein eh ketiket nin sampah? Kitail pahn koasoiapene pasapengpen peidek pwukat.

“NGEHI ME KAHREHIONG IRAIL EN ESE MWAROMWI”

3. Dahme Sises mahsanihki duwen mwaren Siohwa, oh ia wehwehn eh mahsen ko? (Sohn 17:​6, 26)

³ Nan sapwellime kapakap, Sises mahsanih: “Ngehi me kahrehiong irail en ese mwaromwi.” Kitail ese me met kesempwal ong ih pwehki e mahsanih met pak riau. (Wadek Sohn 17:​6, 26.) Ia wehwehn eh mahsen ko? Ia duwe, e anahne ketin kawehwehiong sapwellime wahnpoaron ko me mwaren Koht iei Siohwa? Sapwellime wahnpoaron ko wia mehn Suhs kei eri re esehier me mwaren Koht iei Siohwa. Mwar wet mi nan Palien Paipel ni Lokaiahn Ipru kereniong pak 7,000. Eri Sises sohte ketin padapadahkihong irail me mwaren Koht iei Siohwa; ahpw, e padapadahkihong irail soangen Koht dahmen ih. E sewese nah tohnpadahk ko ren esehla mwahu Siohwa, iangahki dahme e ketin kupwurki ong sampah oh aramas akan, dahme e ketin wiadahr oh pahn wia, oh sapwellime irair kaselel kan. Sises kelehpw me uhdahn mwahngih duwen Siohwa.

4-5. (a) Ele ia duwen atail kak karasahda ia wehwehn en esehla eden emen? (b) Ia duwen sapwellimen Sises tohnpadahk ko ar esehla mwahu mwaren Siohwa?

⁴ Pwehn karasahda, medewehla me mie emen elder nan omw mwomwohdiso me adaneki David oh e pil wia toahktehn pwal men. Ke ese brothero erein sounpar tohto. Ahpw ehu rahno, ke soumwahuda laud. Re waiukala ni imwen winio wasa me brothero kin doadoahk oh e doadoahngki eh koahiek pwehn doarehla omw mour. Met ke poakohng brothero laudsang mwoweo, oh ni omw kin rong edeo, ke kin tamanda dahme e wiahiong uhk. David solahr wiahte elder men me ke ese, ahpw pil toahktehn pwal me doarehla omw mour.

⁵ Ni ahlohte, sapwellimen Sises tohnpadahk ko esehier mwaren Siohwa. Ahpw mwar wet uhdahn kesempwalla ong irail pwehki Sises ketin sewese irail en esehla mwahu Siohwa. Dahme kahrehda kitail kak ndahki met? Pwehki Sises ketin kasalehda irair kaselel kan en Semeo ni soahng koaros me e mahsanih oh wia. Eri sapwellime wahnpoaron ko kak ‘esehla’ mwahu Siohwa sang arail rong mwomwen Sises eh ketin padahk oh kilang eh wiewia ong aramas akan.—Sohn 14:9; 17:3.

“MWAROMWI ME KOMW KETIKIHONG IE”

6. Ia wehwehn en Sises eh mahsanih me Siohwa ketikihong ih Mwareo? (Sohn 17:​11, 12)

⁶ Sises ketin kapakapki sapwellime tohnpadahk kan, mahsanih: “Komw ketin sinsile irail pwehki mwaromwi me komw ketikihong ie.” (Wadek Sohn 17:​11, 12.) Ia duwe, met wehwehki me Sises pil kak mwarenki Siohwa? Soh. Ni Sises eh mahsanih “mwaromwi,” e mahmahsanih mwaren Siohwa. Eri mwar wet Siohwa sohte wiahla mwaren Sises. Ahpw, ia wehwehn en Sises eh mahsanih me mwaren Koht kohwong ih? Keieu, Siohwa ketin poaronehdo Sises pwehn wia wiliepe oh koasoiki ih. E ketido ni mwaren Semeo oh wia manaman kapwuriamwei kan ni mwar wet. (Sohn 5:43; 10:25) Patehng met, mwaren Sises kin wehwehki “Siohwa Iei Sounkomour.” Eri wehwehn mwaren Sises kin pidadahte mwaren Siohwa.

7. Dahme kahrehda Sises kak ketin koasoiki Siohwa? Menlau kihda ehu karasaras.

⁷ Pwehn wehwehki dahme kahrehda Sises kak ketin wia wiliepen Siohwa, medewehla duwen karasaras wet. Kaun emen kak kadarala emen pwehn wiliandi ih koasoiong meteikan. Eri ni aramaso eh wiliandi ih koasoi, e ahneki manaman duwehte eh kauno. Duwehte met, Sises ahneki manaman en koasoiki Siohwa pwehki Siohwa me ketin poaronehdo.—Mad. 21:9; Luk 13:35.

8. Ni ahl dah me Sises ketin “weuwa” mwaren Siohwa pil mwohn e ketido sampah? (Eksodus 23:​20, 21)

⁸ Paipel kahdaneki Sises “Mahseno” pwehki Siohwa ketin doadoahngki ih pwehn mahsanihong tohnleng kan oh aramas akan dahme Siohwa ketin kupwurki ren ese oh wia. (Sohn 1:​1-3) Sises ele wia tohnlengo me Siohwa ketin poaronehla pwehn apwalih mehn Israel ko ni ar mi nan sapwtehno. Ni Siohwa eh ketin mahsanihong mehn Israel ko ren peikiong tohnlengo, e mahsanih: “Pwehki e kin weuwa mwarei.”a (Eks. 23:​20, 21, NW.) Siohwa ketin mahsanih met pwehki Sises iei wiliepe oh ih me kadehdehda me Siohwa kin ketin wia mehkoaros ni pwung oh me E ketin sarawi.

“SEMEI, KOMW KETIN KALINGANAHDA MWAROMWI”

9. Ia uwen Sises eh kin ketin kesempwalki mwaren Siohwa? Menlau kawehwehda.

⁹ Duwehte me kitail ahpwte koasoiapene, pil mwohn Sises eh ketido nin sampah, mwaren Siohwa kin uhdahn kesempwal ong ih. Ni eh ketiket sampah, e pil kasalehda uwen eh kesempwalki mwaren Siohwa sang ni soahng koaros me e kin ketin wia! Ni imwilahn sapwellime doadoahk en kalohk, Sises patohwan peki rehn Siohwa: “Semei, komw ketin kalinganahda mwaromwi.” Sohte pwand, ngihl ehu ahpw kohdihdo sang nanleng mahsanih: “I kalinganahdahr edei oh I pahn pil pwurehng kalinganahda.”—Sohn 12:28.

10-11. (a) Ia duwen Sises eh kin ketin kasarawihla mwaren Siohwa? (Pil kilang kilel.) (b) Dahme kahrehda mwaren Siohwa anahne sarawihla oh dehdehda?

¹⁰ Sises pil kin ketin kasarawihla mwaren Semeo. Ia duwen? Ehu ahl iei sang ni eh ketin kasalehiong meteikan irair kaselel kan en Semeo oh soahng kapwuriamwei kan me Siohwa kin ketin wia. Ahpw, pil mie mehkot me e ketin wia. Sises anahne kadehdehda me Siohwa ketin wiadahr mehkoaros ni pwung oh me mwareo sarawi.b E ketin kasalehda uwen kesempwal en met ni eh padahkihong sapwellime tohnpadahk kan kapakap en Samato. E mahsanih: “Samat me ketiket nanleng, mwaromwi en sarawihla.”—Mad. 6:9.

¹¹ Dahme kahrehda mwaren Siohwa anahne sarawihla oh dehdehda? Pwehki nan mwetuwel en Ihden, Sehdan koasoia soahng likamw kan duwen Siohwa Koht. Sehdan kose me dene Siohwa iei sounlikamw men oh me e ketin irehdihsang Adam oh Ihp mehkot mwahu. (Sen. 3:​1-5) E pil koasoia me sapwellimen Siohwa wiewia kan sohte kin pwung. Pwehki Sehdan koasoia soahng likamw kan duwen Siohwa, aramas akan kakete medewe me Siohwa ketin wia Koht suwed men. Mwuhr ni mwehin Sohpo, Sehdan kose me irail kan me kin papah Siohwa kin wiahte met pwehki dahme re kak alehsang Reh. Sounlikamwo pil koasoia me aramas akan pahn uhdi papah Siohwa ni arail lelohng kahpwal pwehki re sohte uhdahn poakohng ih. (Sohp 1:​9-11; 2:4) Aramas akan anahne ahnsou pwehn kadehdehda ihs sounlikamwo, Siohwa de Sehdan.

‘I TOUNMETEIKIHLA EI MOUR’

12. Dahme Sises kupwurki wia pwehki eh poakohng mwaren Siohwa?

¹² Pwehki e ketin poakohng Siohwa, Sises kupwurki wia soahng koaros me e kak pwehn kasarawihla oh kadehdehda mwaren Siohwa. E mahsanih: ‘I tounmeteikihla ei mour.’ (Sohn 10:​17, 18) Ei, e uhdahn kupwurki pwoula pwehki mwaren Siohwa.c Tepin pwopwoud unseko, Adam oh Ihp, sapeikiong Siohwa oh idawehnla Sehdan. Weksang met, Sises kupwurki ketido nin sampah oh kadehdehda eh limpoak ong Siohwa. Sises ketin wia met sang ni eh peikiong Siohwa ni soahng koaros me e ketin wia oh mahsanih. (Ipru 4:15; 5:​7-10) E ketin lelepekohngete Siohwa erein eh mour, lao e pwoula ni tuhkehn kalokoloko. (Ipru 12:2) Ni ahl wet, e kadehde eh poakohng Siohwa oh mwareo.

13. Dahme kahrehda Sises me kak keieu ketin kadehdehda me Sehdan sounlikamw men? (Pil kilang kilel.)

¹³ Soahng koaros me Sises ketin wia kasalehda me Sehdan iei sounlikamwo, kaidehn Siohwa! (Sohn 8:44) Sises uhdahn mwahngih duwen Siohwa laudsang koaros. Ma mie mehkot mehlel me Sehdan koasoiahki duwen Siohwa, Sises pahn mwahngih duwen met. Ahpw e ketin koasoanehdi teng en pere mwaren Siohwa. Pil ni Siohwa eh mwomwen sohla ketin pere ih, Sises kupwurkihte pwoula ah kaidehn en sapeikiong Seme limpoako.—Mad. 27:46.d

“I . . . KAIMWISEKALAHR DOADOAHK ME KOMW KETIKIHONG IE”

14. Ia duwen Siohwa eh ketin katingih en Sises lelepek?

¹⁴ Nan sapwellime kapakap pwohngo mwohn eh pwoula, Sises kak mahsanih: “I . . . kaimwisekalahr doadoahk me komw ketikihong ie I en wia.” E patohwan likih me Siohwa pahn ketin katingihki eh lelepek. (Sohn 17:​4, 5) Oh e pwung Sises en likih Semeo. Siohwa sohte ketin mweidohng en mihmihte nan eh sousowo. (Wiewia 2:​23, 24) E ketin kaiasada Sises oh ketikihong ih nan dehu lapalap ehu nanleng. (Pil. 2:​8, 9) Kedekedeo, Sises tepida kaun nin duwen Nanmwarki en Wehin Koht. Dahme Wehi wet pahn kapwaiada? Sises ketikihda pasapengo ni eh padahkihong sapwellime tohnpadahk ko ren kapakapki: “Sapwellimomwi Wehi en ketido. Kupwuromwi [kupwuren Siohwa] en kin wiawi nin sampah duwen eh kin wiawi nanleng.”—Mad. 6:10.

15. Pil soahng dah kan me Sises pahn ketin wia?

¹⁵ Ni ahnsou keren, Sises pahn ketin mahweniong sapwellimen Koht imwintihti kan oh kasohrehla me suwed kan nan Armakedon. (Kaud. 16:​14, 16; 19:​11-16) Mwurin mwo, e pahn ketin kesehdiong Sehdan nan “pwoahr loalo me soh kapi,” wasa me e pahn selidi oh sohte kak wia mehkot. (Kaud. 20:​1-3) Sises pahn ketin kapwurehdo popohl nin sampah oh sewese aramas akan ren unsekla erein sapwellime Kaundahn Pahr Kido. E pahn ketin kaiasada me melahr akan. E pahn ketin kaparadaisihala sampah pwon. Kupwuren Siohwa pahn pweida!—Kaud. 21:​1-4.

16. Dahme pahn pweida ni imwin Kaundahn Pahr Kido?

¹⁶ Dahme kitail kak kasik ni imwin Kaundahn Pahr Kido? Dipen aramas akan oh ar soh unsek pahn sohrala. Aramas akan solahr pahn anahne peki mahkpen diparail kan pwehki pweinen pweipwei sapahlo; de re solahr pahn anahne emen en wia arail samworo de sounkadokepene irail ong Siohwa. Oh “imwintihti me keieu mwuhr, iei mehla, pahn kasohrala.” Me melahr akan pahn iasada. Aramas koaros nin sampah pahn unsekla.—1 Kor. 15:​25, 26.

17-18. (a) Dahme pahn wiawi ni imwin Kaundahn Pahr Kido? (b) Dahme Sises pahn ketin wia ni ahnsowo me eh kaunda pahn imwisekla? (1 Korint 15:​24, 28) (Pil kilang kilel.)

¹⁷ Dahme pahn pil wiawi ni imwin Kaundahn Pahr Kido? Ni ahnsowo, mehkot uhdahn kesempwal pahn wiawi. Solahr me pahn pwurehng peikasalki ma Siohwa ketin sarawi oh wia Koht pwung men. Dahme kahrehda? Nan mwetuwel en Ihden, Sehdan kose me Siohwa wia sounlikamw men oh me E sohte kin ketin kaunda aramas akan ni limpoak. Sang ahnsowo, irail kan me kin wauneki Siohwa kin pwurupwurehng kasarawihla mwareo oh kasalehda me sapwellime elen kaunda iei me keieu mwahu. Eri ni imwin Kaundahn Pahr Kido, mwaren Siohwa pahn dehdehda ni unsek. E pahn kadehde me e ketin wia Sahm limpoak men nanleng.

¹⁸ Mwurin imwin Kaundahn Pahr Kido, aramas koaros pahn ese me soahng koaros me Sehdan koasoiahki duwen Siohwa likamw. Dahme Sises pahn ketin wia ni ahnsowo me eh kaunda pahn imwisekla? E pahn ketin alasang Sehdan oh uhwongada Siohwa? Soh! (Wadek 1 Korint 15:​24, 28.) Sises pahn ketin kapwurehiong Semeo Wehio. E pahn ketin utung sapwellimen Siohwa kaunda. Ei, weksang Sehdan, Sises pahn kupwurki tounmeteikihla soahng koaros pwehki e poakohng Siohwa.

19. Ia uwen kesempwal en mwaren Siohwa ong Sises?

¹⁹ Siohwa uhdahn ketin kupwurki ketikihong Sises Mwareo! Ni unsek, Sises ketin kasalehda duwen Semeo. Eri, ia wehwehn mwaren Siohwa ong Sises? Sises uhdahn ketin kesempwalki mwar wet laudsang soahng teikan koaros. E kupwurki pwoula pwehki mwar wet, oh e pil pahn kupwurki kapwurehiong Siohwa soahng koaros ni imwin Kaundahn Pahr Kido. Ia duwen atail kak kahlemengih sapwellime mehn kahlemeng? Kitail pahn koasoiapene pasapengpen peidek wet nan iren onop en mwuhr.