Noumw Seri kan Kak Wiahda Pilipil Koahiek?
1. Soangen pilipil dah me seri kan me nein Sounkadehde kan anahne wiahda me pid duwen nta? Kawehwe.
1 Pilipil koahiek duwen dah? Duwen doken nta. Nan Watchtower (lokaiahn wai) en June 15, 1991, nan artikel me oaralap koasoia: “Kitail en Mourki Kaweid Sang Siohwa,” e kasalehda me seri kan me nein Sounkadehdehn Siohwa kan anahne wiahda arail pilipil pwehn kasalehda ni sansal me irail men kapwaiada sapwellimen Koht kosonned me pid duwen nta oh pilipil wet kesempwal ong irail duwehte ah kesempwal ong arail pahpa oh nohno kan. Ke lemeleme noumw seri kan me pahnangin sounpahr 18 pil pwukoahki met?
2. Soangen kosonned dah me mwoalen kopwung ehu koasoanehdi ong seri kan me sohte men ale doken nta, oh dahme irail Kristian pahpa oh nohno kan oh neirail seri kan kak sukuhliki sang met?
2 Dahme Kosonned Kasalehda? Nan United States, mwoalen kopwung me keieu lapalap me kasalehda me seri pahnangin sounpahr 18 ahneki pwung en wiahda pein ah pilipil duwen doken nta iei Illinois Supreme Court. Ni ahnsou me mwoalen kopwung wet wia kopwung me pid duwen emen sister me sounpahr 17, irail kehkehlingki: “Ma emen seri pahnangin sounpahr 18 kasalehda ni sansal me e wiahdahr ah pilipil koahiek me duwehte aramas laud oh wehwehki duwen imwilahn ah pilipil, e ahneki pwung nin duwen kosonned en sahpw en ale de sohte ale wini de sawas teikan me imwin wini kin kihda.” Ma irail men kasawih ma seri men kakehr wiahda pilipil koahiek, re kak mweidohng toahkte kan de meteikan me ale manaman en koasoiong serio me soumwahu (interview ih) pwehn tehk ma e wiahdahr ah pilipil me pid duwen ah pahn ale doken nta de soh. Serio pahn anahne kasalehda ni sansal me e wehwehki duwen imwilahn sohte ale doken nta oh soahng kan me kakete pwarada me pid sohte ale doken nta oh kasalehda ni sansal me e kamehlele oh men kapwaiada sapwellimen Koht kosonned me pid duwen nta.
3. Soangen peidek dah kan me pahpa oh nohno kan anahne medemedewe, oh dahme kahrehda?
3 Dahme Noumw Seri kan Pahn Nda? Noumw seri kan kak kasalehda pein arail madamadau duwen ire wet? Noumw seri kan kamehlele sang mohngiongarail me Siohwa kehkehlikihong kitail en ‘liksang nta’? (Wiewia 15:29; 21:25) Noumw seri kan kak kawehwe duwen dahme irail kamehlele ni arail kin doadoahngki iren Paipel kan? Irail kak eimah kawehwe ong toahkte kan duwen arail pilipil en dehr ale doken nta ma arail mour mih nan irair keper oh mehnda ma arail pahpa oh nohno sohte mihmi rehrail? Pwehki “paisuwed kin lelohng kitail koaros,” iaduwen atail kak sewese neitail seri kan kaunopada pwehn powehdi kasongosong kan me pahn kak lelohng irail oh kolokol arail lelepek ong Siohwa?—Eklesiasdes 9:11; Episos 6:4.
4, 5. (a) Soangen pwukoa dah me pahpa oh nohno kan ahneki, oh iaduwen irail kak kapwaiada arail pwukoa? (b) Soangen sawas dah kan me Sounkadehde kan wiahda me pahpa oh nohno kak doadoahngki pwehn sewese neirail seri kan?
4 Pahpa oh Nohno kan, Dahme Kumwail Kak Wia? Kumwail pahpa oh nohno kan, kumwail ahneki pwukoa en padahkiong noumwail seri kan duwen sapwellimen Koht koasoandi me pid duwen nta. (2 Timoty 3:14, 15) Nan pwuhken Reasoning, pali 70-74, e kin kawehwe ni sansal duwen sapwellimen Koht kosonned me pid duwen nta. E pahn mwahu ma kumwail pahn onopki wasao nin duwen peneinei. Ni amwail doadoahngki wasa me ntingdi “If Someone Says—” ni pali 74-76, kumwail kak sewese noumwail seri kan en praktis dahme irail pahn nda ni arail pahn kawehwe dahme irail kamehlele oh dahme kahrehda. (1 Piter 3:15) Kumwail kak pil doadoahngki brochure me oaralap koasoia How Can Blood Save Your Life? oh pil Watchtower (lokaiahn wai) en June 15, 2004, pali 14-24 pwehn sewese noumwail seri kan. Oh pil, kumwail kak kilang video prokram pwukat: Transfusion-Alternative Health Care—Meeting Patient Needs and Rights oh pil No Blood—Medicine Meets the Challenge, me kin mihmi nan DVD me oaralap koasoia Transfusion Alternatives—Documentary Series oh prokram pwukat kin kasalehda duwen kamwahupen wini oh pwal me toahkte kan sohte pahn doadoahngki doken nta de wini me dol nta. Ahmw peneinei kilang oh koasoipene duwen video prokram pwukat?
5 Sewese noumw seri kan en ‘esehda dahme kupwuren Koht’ me pid duwen nta, ‘dahme mwahu, oh dahme Koht kin ketin kupwurperenki, oh dahme unsek.’ Ma noumwail seri kan wehwehki duwen koasoandi en Koht oh dahme E kupwurki irail en wia, irail kak wiahda pilipil koahiek oh Siohwa pahn kupwurperenki irail.—Rom 12:2.