Ke Anahne Kilang Video Cassette me Oaralap Koasoia “No Blood—Medicine Meets the Challenge”
Ke wehwehki duwen soangen wini de wiepen wini me ke kak ale sang toahkte kan me sohte pahn doadoahngki nta ni arail pahn sewese aramas soumwahu kan? Ke wehwehki soangen wini dah de soangen wiepen wini dah kan me ke kak alehdi oh ia mwomwen soangen wini pwukat kin doadoahk? Menlau kilang video cassette wet, oh tehk ma ke wehwehki dahme ke kilang ni ahmw pahn wia peidek pwukat.—Menlau tehk kanahieng: Nan video cassette wet ke pahn kilang kilel kan me kin kasalehda toahkte kan wia pwal kan, kahrehda e pahn mwahu pahpa oh nohno kan en iang neirail seri tikitik ni arail pahn kilang video cassette wet.
(1) Ia kahrepe keieu me kahrehda Sounkadehdehn Siohwa kan sohte kin ale doken nta, oh mehnia iren Paipel kin kasalehda me kitail anahne “liksang nta”? (2) Me pid duwen epwelpen roson en paliwar, dahme kitail kin inengieng? (3) Soangen pwung dahieu me aramas koaros ahneki? (4) Dahme kahrehda e loalokong oh kesempwal kitail en dehr ale doken nta? (5) Ni ahnsou me nta laud kin kohsang aramas emen, soahng riau kesempwal dah kan me toahkte kan anahne wia? (6) Soangen keper dah kan me pid roson en paliwar kak wiawi ma aramas emen pahn ale doken nta? (7) Mehn doadoahk dah kan me toahkte kan kak doadoahngki pwehn katikitikala nta me pahn kohsang aramas emen ni ahnsou me e pahn pwal? (8) Dahme ke anahne ese duwen wini kan me toahkte kan pahn doadoahngki ma ke sohte pahn ale doken nta? (9) Pwal me apwal kak wiawi mendahki toahkte kan sohte pahn doadoahngki doken nta? (10) Dahme toahkte tohto men wia ong Sounkadehdehn Siohwa kan, oh soangen epwelpen roson en paliwar pahn kalap wiawi ong aramas koaros me soumwahu?
E pahn mwahu en kilang video cassette wet rehn irail me kin onop Paipel rehtail, oh atail peneinei me saikinte iang padahk mehlel, oh iengetail tohndoadoahk kan, oh sounpadahk kan, oh iengatail tohnsukuhl akan me kin wia peidek kan duwen dahme kitail kin kamehlele duwen nta. Ma kitail pahn ale soangen wiepen wini kan me kitail kilang nan video cassette wet de soh—emenemen kitail pahn wiahda pein atail pilipil me poahsoankihda atail wehwehki ire kesempwal kan koaros me pid duwen wiepen winio.—Kilang “Questions From Readers” nan Watchtower (lokaiahn wai) en June 15 oh October 15, 2000.