Ke Ese Omw Pilipil kan?
Wahnpoaron kan oh ohl teikan me kin apwalih sapwellimen Sises tohnpadahk kan tuhpene pwehn koasoanehdi mehnia kosonned kan me koaros tohnmwomwohdiso en Kristian anahne peikiong. Iet me irail pwungkidahr: “Pwe [“sapwellimen Koht manaman,” NW] oh kiht pwungkipenehr me se sohte pahn katautauwihkin kumwail mehkot likin soangen kosonned pwukat me konehng: kumwail dehr tungoale mwenge kan me meirongalahr ong dikedik en eni kan; dehr tungoale nta; dehr tungoale mahn mwopwula [pwehki nta mihmihte nan uduken mahno]; oh kumwail en pil liksang nenek.” (Wiewia 15:28, 29; 21:25) Kahrehda kitail en “dehr tungoale nta.” Mwohn silangin Koht, atail wia met inenen kesempwal rasehng atail kin perei kitail sang kaudok ong dikedik en eni kan oh pil atail kin liksang nenek oh wiewia samin teikan.
Kosonned en dehr tungoale nta pil kin pidada en dehr ale doken nta? Ei. Karasepe: Ma toahkte men padahkihong uhk ken liksang sakau en wai, met wehwehki me ke sohte kak nim sakau en wai ahpw ke kak doakoahlong sakau en wai nan selin nta kan? E sansal me soh! Liksang nta pil wehwehki en dehr kihong nan paliwaratail. Kahrehda kosonned en liksang nta pil wehwehki me kitail sohte pahn mweidohng aramas sou lipilipil men en doakoahlong nta nan atail selin nta kan.
A ia duwen ma Kristian emen ohla laud de anahne wia pwal laud ehu? Pwehn kolokol sapwellimen Koht kisakis kesempwal en mour, e pahn kak ale wiepen epwelpen soumwahu teikan me sohte pahn doadoahngki nta. Kahrehda, e pahn rapahki soangen epwelpen soumwahu teikan likin doken nta.
Ke piladahr mehnia wiepen epwelpen soumwahu oh wiepen pwal me ke pwungki kowe oh noumw seri kan en ale oh ke audehdahr doaropwehn nta (DPA)? Pwehn wehwehkihla mwahu ire pwukat, kousapahlih Kahn Iroir en December 1, 2004, pali 9-12. Kowe eri doadoahngki ire kan nan Atail Doadoahk ong Wehio en November 2006 pahnangin oaralap, “Iaduwen Ahi Madamadau ohng Mehkan me Kisehn Nta oh Wiepen Doadoahk en Imwen Wini kan me Pahn Pwurehng Doadoahngki Pein Ahi Nta?” Oh pil tehk pali 246-249 en pwuhken Limpoak en Koht pwe ken kak wiahda pein omw pilipil kan. Oh tehk mwahu ma ke kihong dahme ke pilada nan noumw doaropwehn DPA. Ke anahne padahkihong irail toahkte kan me ke pilada iangahki omw peneinei me sohte iang Sounkadehdehn Siohwa duwen omw pilipil kan.