Ke Kin Kapwakapwande?
Ke kin kapwakapwande audehda doaropwehn DPA (durable power of attorney) me kowohng irail Sounkadehdehn Siohwa kan me papidaislahr? Pwehki ‘ke sehse dahme pahn wiawihong uhk ni rahn kohkohdo kan,’ e uhdahn kesempwal en wiahda pilipil kan mwowe oh kasalehda ni nting epwel en soumwahu dah kan me ke pahn ale ni ahnsou me ke lelohng kahpwal laud. (Seims 4:14; Wiewia 15:28, 29) Video wet Wiliepen Doken Nta Kin Kaitarala Anahn akan oh Pwuhng en me Soumwahu kan (Transfusion-Alternative Health Care—Meeting Patient Needs and Rights) wiawihdahr pwehn sewese iuk. Kilang video wet oh kapakap ni omw pahn kousapahlih dahme ke sukuhlkier oh doadoahngki peidek kan me kileldi pah.—Tehk: Pwehki mie wasa kan nan video wet me kin kasalehda duwen wiepen pwalang aramas, pahpa oh nohno kan anahne pilada ma neirail seri kan pahn iang kilang de soh.
(1) Dahme kahrehda ekei toahkte kan oh irail pwihn en apwalih roson en aramas akan kin tehk sapahlih duwen doadoahngki doken nta? (2) Kihda karasepe siluh me pid duwen soangen pwal laud kan me sohte doadoahngki doken nta. (3) Toahkte oh sounpwal depe nan sampah me kin kasalehda arail men apwalih aramas soumwahu ni arail sohte doadoahngki doken nta? Dahme kahrehda re men wia met? (4) Dahme ekei imwen wini kasalehda nan arail roporop kan me pid duwen doadoahngki nta? (5) Ia keperpen doadoahngki doken nta? (6) Dahme irail me samanih palien wini kan pwungkipene me pid kamwahupen doadoahngki wiliepen doken nta? (7) Dahme kin kahrehda sohte itar en nta (red blood cell)? Ia duwen paliweren aramas kak powehdi met? Dahme kak wiawi pwehn sewese me soumwahwo? (8) Dahme kin kamwakid wiawihdahn red blood cell nan paliweren aramas? (9) Soangen wiepe dah kan kin kadoadoahk pwehn katikala uwen nta me kin kohsang nan paliwar ni ahnsoun pwal? (10) Ia duwen, wiliepen doken nta kan kak doadoahk ong seri kan oh soumwahu laud kan? (11) Ia ehu ire kesempwal me pid epwel mwahu en palien roson? (12) Dahme kahrehda e kesempwal Kristian akan en wiahda arail pilipil mwowe me pid duwen sohte doadoahngki nta? Ia duwen atail kak wia met?
En doadoahngki ekei wiepen epwelpen wini me pwarada nan video pahn wia pein en emenemen pilipil me poahsoanda sang kadeikpen loalarail me pahrekiong kaweid en Paipel. Ke piladahr mehnia epwel de wiepen wini me kowe oh noumw seri kan pahn doadoahngki oh audehda doaropwehn DPA? Pwehn kalaudehla omw wehwehki ire pwukat kilang pali 3 lel 6 en Atail Doadoahk ong Wehio, November 2006, oaralap mahsanih “Iaduwen Ahi Madamadau ohng Mehkan me Kisehn Nta oh Wiepen Doadoahk en Imwen Wini kan me Pahn Pwurehng Doadoahngki Pein Ahi Nta?” Tehk kanahieng me ke kasalehda omw pilipil kan ni pwung nan noumw doaropwehn DPA. Me wilian uhk oh irail kisehmw kan koaros me sohte wia Sounkadehdehn Siohwa kan anahne ese duwen omw pilipil kan.
[Kilel nan Pali 7]
• Ke piladahr mehnia epwel de wiepen wini me kowe oh noumw seri kan pahn doadoahngki?
• Ke kin wa doaropwehn DPA me ke audehdahr ong ahnsoun apwal?