Ke Kaunopadahngehr Irair Karuwaru Ehu me Pidada Soumwahu de Aksident?
Kahpwal me soh kasikpe kakete mwadang pwarada. (Seims 4:14) Ihme kahrehda, emen me ahneki koahiek en madamadau pahn kaunopada mwahu. (Lep. Pad. 22:3) Ke piladahr mehnia epwel de wiepen wini me ke pahn doadoahngki oh kasalehda met ni nting? Pali keriau en DVD Transfusion-Alternatives—Documentary Series me oaralap koasoia Transfusion-Alternative Health Care—Meeting Patient Needs and Rights (ni lokaiahn wai), wiawihdahr pwehn seweseiuk. Ni omw kilang, song en sapengala peidek pwukat me kileldi pah. Pwehki mie wasa kan nan DVD wet me kin kasalehda duwen wiepen pwalang aramas, pahpa oh nohno kan anahne pilada ma neirail seri kan pahn iang kilang de soh.
(1) Dahme kahrehda ekei toahkte kan oh pwihn en apwalih roson en aramas kin tehk sapahlih duwen doadoahngki doken nta? (2) Kihda karasepe siluh me pid duwen soangen pwal laud kan me sohte doadoahngki doken nta. (3) Ia kahrepen toahkte oh sounpwal tohto nan sampah pwon kin kasalehda me re men apwalihala aramas soumwahu kan ni arail sohte doadoahngki doken nta? (4) Dahme ekei imwen wini kasalehda nan arail roporop kapw kan me pid duwen doadoahngki nta? (5) Ia keperpen doadoahngki doken nta? (6) Dahme irail me samanih palien wini kan pwungkipene me pid kamwahupen doadoahngki wiliepen doken nta? (7) Dahme kin kahrehda sohte itar en nta, oh dahme kak apwalihala met? (8) Dahme kin kamwakid wiawihdahn red blood cell nan paliweren aramas? (9) Soangen wiepe dah kan kin kadoadoahk pwehn katikala uwen nta me kin kohsang nan paliwar ni ahnsoun pwal? (10) Ia duwe, wiliepen doken nta kan kak doadoahk ong seri kan oh soumwahu laud kan? (11) Ia ehu ire kesempwal me pid epwel mwahu en palien roson?
Pwehki en doadoahngki ekei wiepen epwelpen wini kan me pwarada nan video kin pidada pein en emenemen pilipil me poahsoanda sang kadeikpen loalarail, kitail en dehr awih lao kitail loiong kahpwal pwehn pilada dahme kitail pahn de sohte pahn doadoahngki. Irelaud 7 en pwuhken “Limpoak en Koht” oh oaritik kan loale oh pil pali 3-6 nan Atail Doadoahk ong Wehio en November 2006 pahn seweseiuk en wiahda omw pilipil poahsoanda sang dahme ke sukuhlkier. Ma ke papidaisehr, kilelehdi dahme ke piladahro nan doaropwehn DPA, oh wahda doaropwe wet ahnsou koaros.
[Kilel nan Pali 3]
Ke piladahr mehnia epwel de wiepen wini me ke pahn doadoahngki oh kasalehda met ni nting?