Ke Kin Wie Kasakasau oh Kapwakapwande?
Kasakasau oh kapwakapwande dah? En audehda kisin doaropwe DPA (durable power of attorney) me kodahng irail Sounkadehde kan me papidais. Pwehki ‘ke sehse dahme pahn wiawiong uhk ni rahn kohkohdo kan,’ e uhdahn kesempwal en wiahda pilipil kan mwowe oh kasalehda ni nting duwen soangen wiepen epwel soumwahu dah kan me ke pahn ale ni ahnsou me ke lelohng nan soumwahu karuaru. (Seims 4:14; Wiewia 15:28, 29) Video wet Transfusion-Alternative Health Care—Meeting Patient Needs and Rights (Wiliepen Doken Nta—E Kin Kaitarala Anahn akan oh Pwung en me Soumwahu kan) wiawidahr pwehn sewese uhk. Kilang video wet oh kapakap ni ahmw pahn kousapahlih dahme ke sukuhlikier oh doadoahngki peidek kan me kileldi pah pwehn kak sewese iuk.—Tehk: Pwehki mie wasa kan nan video wet me kin kasalehda duwen wiepen pwalang aramas, pahpa oh nohno kan anahne pilada ma neira seri kan en iang kilang de soh.
(1) Dahme kahrehda ekei irail pwihn en apwalih roson en aramas akan kin tehk sapahlih duwen doadoahngki doken nta? (2) Kihda karasepe siluh me pid duwen soangen pwal apwal akan me sohte doadoahngki doken nta. (3) Toahkte oh sounpwal depe nan sampah me kin kasalehda arail men apwalih aramas soumwahu ni sohte doadoahngki doken nta? Dahme kahrehda re men wia met? (4) Dahme ekei imwen wini kasalehda nan arail roporop kan me pid duwen doadoahngki nta? (5) Ia keperpen doadoahngki doken nta? (6) Dahme irail me samanih palien wini kan pwungkihpene me pid kamwahupen doadoahngki wiliepen doken nta? (7) Dahme kin kahrehda sohte itar en nta? Iaduwen paliweren aramas kak powehdi met? Dahme kak wiawi pwehn sewese soumwahu men me sohte itar nta nan paliwere? (8) Dahme kin kamwakid wiawihdahn red-cell nan paliweren aramas? (9) Soangen wiepe dah kan me kin doadoahk pwehn katikala uwen nta me kin kohsang nan paliwar ni ahnsoun pwal? (10) Iaduwen, wiliepen doken nta kan kak doadoahk ong seri kan oh soumwahu karuaru kan? (11) Ia ehu kosonned en doadoahk pwuhng me pid epwel mwahu en pali en roson? (12) Dahme kahrehda e kesempwal Kristian emen en wiahda eh pilipil mwowe me pid duwen sohte doadoahngki nta? Iaduwen kitail kak wia met?
Pwehn doadoahngki ekei wiepen epwelpen wini me pwarada nan video pahn wia pein en emenemen pilipil me poahsoandasang arail nsenmwakelekel me pahrekiong kaweid en Paipel. Ke piladahr mehnia epwel de wiepen wini me kowe oh noumw seri kan pahn doadoahngki? Ong Kalaudepen koasoipen ire wet, kilang “Peidek kan Sang Sounwadawad kan” nan The Watchtower en June 15, 2004, oh October 15, 2000, oh pil insert en Atail Doadoahk Ong Wehio en November 2006 me koasoia “Iaduwen Ahi Madamadau ong Mehkan me Kisehn Nta oh Wiepen Doadoahk en Imwen Wini kan me Pwurehng Doadoahngki Pein Ahi Nta?” Me wilian uhk oh ahmw peneinei oh irail kisehmw kan koaros me sohte wia Sounkadehdehn Siohwa kan anahne ese duwen ahmw koasoandi kan.