Ke Wehwehki Omw Pilipil kan?
Nan imwen wini tohto nan sampah pwon, toahkte tohto kin wia pwal ni ar sohte kin doadoahngki doken nta. Ke uhdahn wehwehki pilipil kan me ke kak wiahda me pid wiepen epwelpen palien wini me sohte doadoahngki doken nta? Ke anahne wehwehki met pwehn wiahda pilipil kan me poahsoankihda omw wehwehki wiepen epwelpen palien wini oh pwal. Kilang video Epwelpen Palien Wini me Sohte Doadoahngki Nta Kin Powehdi Kahpwal akan (No Blood—Medicine Meets the Challenge). Mwurin mwo, kapakapki omw pilipil kan oh kousapahlih dahme ke sukuhlki ni omw doadoahngki peidek kan me kileldi pah.—Tehk kanahieng: Mie wasa kei nan video wet me kasalehda ekis duwen pwal. Kahrehda pahpa oh nohno kan en koasoanehdi ma neirail seri kan pahn iang kilang video wet.
(1) Ia kahrepe me keieu kesempwal ong Sounkadehdehn Siohwa kan ar sohte kin ale doken nta? (2) Me pid duwen epwelpen palien wini, dahme Sounkadehdehn Siohwa kan men ale? (3) Soangen pwung dah kan me irail me soumwahu kan ahneki? (4) Dahme kahrehda e konehng oh pwung en pilada wiepen wiliepen doken nta kan? (5) Ni ahnsou me nta laud kohkohsang, wiewia kesempwal riau dah kan me toahkte kan anahne mwadang wia? (6) Ia ire kesempwal pahieu en wiepen wiliepen doken nta kan? (7) Ia duwen toahkte kan pahn kak (a) katikitikala uwen laud en nta me pahn kohsang, (b) kasohtikihala red blood cells, (c) kamwakid nta en wiawihda, oh (d) kalaudehla nta me pahrekiong uwen laud en nta me kohsang? (8) Kawehwe duwen wiepe kan me adaneki (a) hemodilution oh (b) cell salvage. (9) Dahme ke men ese me pid duwen wiepen wiliepen doken nta kan? (10) Pwal kan me keper oh apwal kak wiawi ma sohte doken nta? (11) Soangen kekeirda mwahu dah kan en palien wini kin wiawi?
Pwungkihda ale ekei wiepen epwelpen wini kan me pwarada nan video wet wia ahn emenemen pilipil me poahsoankihda ar nsenmwakelekel me kaiahnkihda Paipel. Ke koasoanedier mehnia wiepen wiliepen doken nta kan me ke pahn ale ong kowe oh noumw seri kan, oh audehda doaropwe en DPA? Pwehn wehwehki mwahu ire pwukat, kousapahlih iren onop “Ale Kaweid Sang Rehn Koht Ieias” nan Kahn Iroir en December 1, 2004, oh “Peidek kan Sang Sounwadawad kan” nan The Watchtower, October 15, 2000 (lokaiahn wai). Mwurin mwo, doadoahngki pali 5 oh 6 nan Atail Doadoahk Ong Wehio, November 2006, “Iaduwen Ahi Madamadau ohng Mehkan me Kisehn Nta oh Wiepen Doadoahk en Imwen Wini kan me Pahn Pwurehng Doadoahngki Pein Ahi Nta?” pwehn wiahda omw pilipil kan me pid mehnia wiepe kan me ke pahn ale de sohte pahn ale. Tehk kanahieng me ke ntingihdi omw pilipil kan nan doaropwe en DPA ni pwung. Aramas riemen me ke pilada pwehn wiliandi uhk pwehn utung omw pilipil (health-care agents) oh omw peneinei me kaidehn Sounkadehdehn Siohwa kan anahne wehwehki mwahu omw pilipil kan.
[Kaokon nan Pali 3]
• Ke koasoanedier mehnia wiepen epwelpen palien wini me ke pahn ale ong uhk oh noumw seri kan?
• Ke kin wa doaropwe en DPA me ke audehda ong ahnsou apwal kan?