Padahkiong Aramas Aktikitik kan Iaduwen Irail Kak Keid nan Sapwellimen Koht Ahl akan
1. Doadoahk en katohnpadahk kin pidada dah?
1 Irail tohnpadahk kan en Krais me memour nan keieun senturi kin idawehn “Ahl en Kauno.” (Wiewia 9:2) Ma aramas emen men wiahla Kristian mehlel, e anahne kawekila ah mour pwon. (Lepin Padahk 3:5, 6) Kahrehda, ni ahnsou me kitail kin onop Paipel rehn aramas akan, kitail anahne wia laudsang ihte padahkiong irail duwen padahk mehlel en Paipel. Kitail anahne sewese irail en kekeid nan sapwellimen Siohwa ahl akan.—Melkahka 25:8, 9.
2. Dahme kak kamwekid irail me onop Paipel en peikiong sapwellimen Koht kosonned akan?
2 Limpoak ong Siohwa oh Sises: Mehlel, e kin apwal ong aramas soh unsek kan en kawekila arail madamadau kan, arail lokaia, arail wiewia kan, arail mour pwon en pahrekiong kupwuren Koht! (Rom 7:21-23; Episos 4:22-24) Ahpw, limpoak ong Koht oh sapwellime Ohl pahn kak kamwekid aramas aktikitik kan en wia met. (Sohn 14:15; 1 Sohn 5:3) Iaduwen kitail kak sewese atail Paipel Study kan en kakairada limpoak ong Siohwa oh Sises?
3. Iaduwen kitail kak sewese atail Paipel Study kan en kakairada limpoak ong Siohwa oh Sises?
3 Sewese ahmw Paipel Study en sukuhliki duwen soangen Koht dah Siohwa. Emen brother koasoia, “Aramas sohte kak poakohng emen me irail sehse, kahrehda sangete nin tepio I kin kasukuhlih ahi Paipel Study kan duwen mwaren Koht sang nan Paipel, oh I kin pil rapahki ahnsou mwahu kan en kasalehda duwen sapwellimen Siohwa irair kan.” Ni atail kin kasalehda duwen mehn kahlemeng mwahu en Sises, kitail kin kasalehda duwen sapwellimen Siohwa irair kan. (Sohn 1:14; 14:9) Oh pil, doadoahngki koakon en kousapahl ni imwin irelaud koaros en pwuhken Loalokong pwehn kak kasalehda irair kan en Koht oh sapwellime Ohl, Sises Krais.
4. (a) Dahme kahrehda irail Paipel Study tohto kin apwaliki kalohk? (b) Iaduwen kitail kak sewese atail Paipel Study ni ahnsou me irail tepin iang kalohk?
4 Sewese Ahmw Paipel Study kan ni Ahmw Kin Wia Mehn Kahlemeng Mwahu: Ni atail kin wia sounpadahk kan oh sounkaweid kan, kitail kin kasalehda sang pein atail wiewia kan iaduwen irail pil kak keid nan sapwellimen Koht ahl akan. (1 Korint 11:1) Karasepe, pali laud en irail me kin onop Paipel rehtail sohte kin ahn tuhwong aramas me irail kin sehse pwehn ehukihong irail dahme kitail kamehlele sang nan Paipel. Kahrehda, kitail anahne kanengamah oh doadoahngki koahiek en sewese irail en kakairada soangen pwoson, limpoak oh eimah me irail anahne pwe ren kak iang doadoahk en kalohk oh katohnpadahk. (2 Korint 4:13; 1 Deselonika 2:2) Ma kitail men sewese atail Paipel Study kan oh kaweid irail nan kalohk, kitail eri pahn iang irail ni ahnsou me irail tepin iang kalohk.
5. Iaduwen atail mehn kahlemeng mwahu kin kak sewese atail Paipel Study kan en wehwehki duwen idawehn sapwellimen Koht koasoandi kan?
5 Ahmw mehn kahlemeng mwahu pahn sewese ahmw Paipel Study kan duwen soangen mour me Kristian mehlel kan kin ahneki. Ni ahnsou me ke kin mwemweit rehn irail me soumwahu kan, oh pil ni ahnsou me ke kasamwo aramas akan ni mihding en mwomwohdiso kan, ahmw Paipel Study kan pahn kilang iaduwen ke kin kasalehiong meteikan limpoak. (Sohn 15:12) Ni ahnsou me ke kin iang kamwakel Kingdom Hall de sewese meteikan, ke kin kasalehiong ahmw Paipel Study kan iaduwen Kristian mehlel kan kin sewese meteikan. (Sohn 13:12-15) Ni ahnsou me irail kin kilang me ke kin kihsang nan ahmw mour soahng soh katepe kan, irail pahn wehwehki ia wehwehn ‘rapahki mahs Wehin Koht.’—Madiu 6:33.
6. Atail sewese irail me aktikitik kan en papah Siohwa pahn imwikihla dah?
6 Doadoahk en padahkihong aramas akan sang Mahsen en Koht oh katohnpadahk kin doadoahk laud. Ahpw, e kin kaperen en kilang irail me aktikitik kan “mourki padahk mehlel”!—3 Sohn 4.