Kasalehda Atail Nsenohki Aramas —Ni Atail Kasalehda Kadek
1 “Siohwa kin ketin kasalehda kadek.” (Melkahka 145:8, NW) Mendahki ih me Kaunepen Lahng oh Sampah, e kin kasalehda kadek, limpoak oh nsenohki irail aramas soh unsek kan. (Senesis 13:14; 19:18-21, 29) Kitail kak kalaudehla atail lohki Rongamwahu en Wehio sang ni atail pahn kahlemengih atail Koht me kadek. (Kolose 4:6) Met kin wehwehki laudsang ihte kadek oh kasalehda wahu ni atail lokaia kan.
2 Sang Ihmw lel Ihmw: Iaduwen ma kitail tuhwong irail tohnihmw kan ni ahnsou sohte mwahu de ahnsou me e nohn kedirepw en lokaiahiong kitail? Kitail kak kasalehda atail medemedewe duwen ah irair ni atail pahn koasoi ni mwotomwot de padahkihong ih me kitail nek pwurala ehu ahnsou tohrohr. Kitail en dehr idingkihong aramas akan en ale neitail pwuhk, brochure, makisihn de tract ma irail sohte mwahuki. Nsenohki meteikan pahn pil kamwekid kitail en kasalehda wahu ong arail dipwisou kan, duwehte kitail en kanahieng ni atail ritingehdi arail kehl kan oh wenihmw kan oh sang ni atail pahn kaiahne neitail seri kan en wia soahngohte. Kitail en tehk pwe tract kan me kitail pwilikihdi ni ihmw akan me sohte towe en dehr mih wasa me pahn kedirepwei irail. Kadek pahn kamwekid kitail en wiahiong meteikan dahme kitail men irail en wiahiong kitail.—Luk 6:31.
3 Kalohk Ni Keilen Ahl akan: Ni atail kin kalohk ni keilen ahl akan, kitail kak kasalehda kadek sang ni atail sohte pahn perehla de kedirepwihala ahn aramas akan wasahn alialu, oh pil kitail en dehr pokonpene mwohn wasahn pisnis kan. Kitail en tehk mwahu duwen en meteikan irair kan, oh met kak wiawi sang ni atail pahn lokaiahiong irail kante me mie ekis arail ahnsou oh kaidehn irail akan me inenen karuwaru. Ekei pak, kitail pahn anahne lokaia ni ngihl laud pwehki katairong en pohn ahl akan. Ahpw, kitail en wia met ni ahl konehng pwe en dehr kerempwa onepek en meteikan.—Madiu 12:19.
4 Kalohk Ni Atail Doadoahngki Telephone: Nsenohki meteikan pahn kamwekid kitail en kalohk ni atail doadoahngki telephone ni wasa ieu me sohte nohn katairong. Kitail kin kasalehda tiahk mwahu ni atail kin kasalehda ihs kitail oh kawehwe kahrepen atail call irail. En lokaiahiong nan wasahn lokaia en telephone oh kolokolete ngihl mwahu kak sewese kitail en kangoange de kamwekid madamadau en meteikan en iang koasoia iren Paipel kan. (1 Korint 14:8, 9) Sang ni atail kadek, limpoak oh nsenoh ni ahl pwukat, kitail kak kahlemengih atail Koht, Siohwa, me kadek.