Kasalehda Tiahk Mwahu nin Duwen Laduhn Koht

“Kumwail song en kahlemengih ih [Koht].”—EP. 5:1.

1, 2. (a) Dahme kahrehda tiahk mwahu kin kesempwal? (b) Dahme kitail pahn tehkpene nan iren onop wet?

ME PID duwen tiahk mwahu, sounnting en pwuhk me adaneki Sue Fox ntingihdi: “Kitail anahne kasalehda tiahk mwahu ahnsou koaros. Tiahk mwahu kin kadoadoahk wasa koaros oh ahnsou koaros.” Ni ahnsou me aramas kin ahnla wia tiahk mwahu, kahpwal kan rehn meteikan kin tikitikla oh kalapw sohla mie. Ahpw sohte wia tiahk mwahu ong meteikan pahn kahrehda akamai, kailok, oh nsensuwed.

² Mwomwohdiso en Kristian kin wiawihkihda soangen aramas akan me ahneki tiahk mwahu. Ni ahnsowohte, kitail anahne pere kitail sang soangen wiewia suwed kan me reklahr nan sampah rahnwet. Kitail pahn tehk ia duwen doadoahngki kaweid kan en Paipel me pidada wiewia mwahu eh kak pere kitail oh kahrehdo aramas akan ong kaudok mehlel. Pwehn wehwehki dahme kin pidada atail kasalehda tiahk mwahu, tehk duwen mehn kahlemeng kan en Siohwa Koht oh sapwellime Ohl.

Mehn Kahlemeng en Tiahk Mwahu Iei Siohwa oh Sapwellime Ohl

3. Mehn kahlemeng en wahu dah me Siohwa Koht ketin wiahda?

³ Siohwa Koht ketikihda mehn kahlemeng me keieu unsek duwen wahu. Mendahki Ih me Kaun Lapalap en lahng oh sampah, e kin ketin kasalehiong aramas akan wiewiahn kadek oh wahu. Ni tepin Paipel ntingdi, Siohwa ketin doadoahngki lokaiahn Ipru ehu me wekidala lokaiahn kehkehlik ong ni lokaiahn wahu ehu ni eh mahseniong Eipraam oh Moses. (Sen. 13:14; Eks. 4:6) Ni ahnsou me sapwellime ladu kan kin wiahda dihp, Siohwa kin ketin ‘kalahngan oh Ih Koht limpoak emen, e kin kanengamah, kadek oh loalopwoat ahnsou koaros.’ (Mel. 86:15) E sohte kin ketin duwehte ekei aramas me kin lingeringerda laud ma meteikan sohte wia dahme re kasik.

4. Ia duwen atail kak alasang Siohwa ni ahnsou me meteikan kin lokaiahiong kitail?

⁴ Sapwellimen Koht wiewia mwahu kan pil kin sansalda ni eh kin ketin rong aramas akan. Ni ahnsou me Eipraam kin peidengki duwen aramas akan en Sodom, Siohwa kin ketin kanengamah oh sapengla ehuehu peidek ko. (Sen. 18:23-32) E sohte ketin kilangwohng en Eipraam iren kapwunod kan me e kin kauwehla mwahl sapwellime ahnsou. Siohwa kin ketin karonge kapakap en sapwellime ladu kan oh pil pekipek en irail me koluhla sang arail dihp. (Wadek Melkahka 51:11, 17.) Kitail sou anahne alasang Siohwa oh rong meteikan ni arail kin lokaiahiong kitail?

5. Ia duwen atail alasang sapwellimen Sises wiewiahn wahu eh kak kamwahwihala atail nanpwungmwahu rehn meteikan?

⁵ Soahng tohto me Sises Krais ketin sukuhlki sang Semeo. Ehu iei tiahk mwahu. Mendahki doadoahk en kalohk kin ekei pak kihsang laud sapwellime ahnsou oh kehl, Sises kin ketin kanengamah oh kadek ahnsou koaros. Me tokutok kan, me maskun kan me kin anahne pekipek pwehn ale sawasparail, oh pil meteikan me anahne sawas kin diarada me Sises kin kupwurki sewese irail. E sohte kin ketin pohnsehse irail, mehnda ma re patohla reh ahnsou ehu me kakete kedirepwehla ih. E kin ketin kauhdi dahme e wiewia oh sewese irail akan me ahneki pwunod laud. Sises ketin kasalehda nsenoh mehlel ong irail kan me kin pwoson ih. (Mark 5:30-34; Luk 18:35-41) Nin duwen Kristian kei, kitail kin idawehn sapwellimen Sises mehn kahlemeng ni atail kin kadek oh sewese meteikan. Kisehtail kan, mehn mpatail kan, oh meteikan kin tehk duwen wiewia pwukat. Laudsang met, wiewia pwukat kin kapinga Siohwa oh pil wahdo nsenamwahu.

6. Mehn kahlemeng dahieu me Sises ketin wiahda me pid kadek?

⁶ Sises pil kin ketin wauneki aramas akan ni eh kin ekerkin irail ederail kan. Ia duwe, kaun en pelien lamalam en mehn Suhs kan kin wia duwehte met? Soh. Re kin wiahki irail akan me sehse Kosonnedo aramas ‘riahlahr’ kei. (Sohn 7:49) Sapwellimen Koht Ohl sohte kin ketin wia met. Marda, Mery, Sakies, oh me tohto teikan kin rong ih ekerkin irail ederail kan. (Luk 10:41, 42; 19:5) Sapwellimen Siohwa ladu kan kin nantihong en kadek ong meteikan mendahki ma mie soangen tiahk oh irair kan rahnwet me pid ia duwen aramas eh pahn kin eker emen.a Re sohte kin mweidohng madamadau en lipilipilki aramas en ire irail sang arail pahn wauneki iengerail tohnkaudok kan oh pil meteikan.—Wadek Seims 2:1-4.

7. Ia duwen kaweid kan en Paipel eh kin sewese kitail en kasalehda wahu ong soangsoangen aramas koaros?

⁷ Wahu me Koht oh sapwellime Ohl kin wiahiong aramas en wehi oh keinek koaros kin kasalehda me re kin wauneki emenemen irail oh kahrehdo irail kan me ahneki mohngiong pwung nan padahk mehlel. Mehlel, dahme kin kahrehda tiahk mwahu kin wekpeseng nan ehuehu wasa. Eri, kitail sohte kin daur kosonned kakos kan me pid tiahk mwahu. Ahpw, kitail kin mweidohng kaweid kan en Paipel en sewese kitail pwehn kak wauneki soangsoangen aramas koaros. Kitail pahn tehkpene ia duwen wauneki aramas akan eh kak kahrehda kitail en pweida nan atail doadoahk en kalohk.   

Rahnmwahwih Aramas oh Koasoiong Irail

8, 9. (a) Soangen wiewia dah me kitail kak nda me kaidehn tiahk mwahu? (b) Dahme kahrehda kitail en mweidohng mahsen kan en Sises nan Madiu 5:47 en kamwakid atail wiewia ong aramas akan?

⁸ Nan ahnsou pwukat, ma aramas riemen kin peserei pohn ahl, re sohla kin kalapw rahnmwahupene. Mehlel, sohte me kasik ken lokaiahng koaros me ke tuhwong wasa ehu me diren aramas. Ahpw mie soangen irair tohto me konehng oh e pil mwahu en rahnmwahwih meteikan. Ia duwe, ke kin wiahkihla tiahk ehu en rahnmwahwih aramas akan? De ke kin daulih aramas akan oh sohte pohkomwokomw de nda mehkot mwahu? Ekei sohte kin medewe en wia mehkot sapwung, ahpw ni mehlel, re kakete ahnla tiahk ehu me sohte kin kasalehda wahu.

⁹ Sises ketikihong kitail mehn kataman ni eh mahsanih: “Ma ihte kompoakepahmwail kan me kumwail pahn kin rahnmwahwih, eri, kumwail sohte siksang meteikan, pwe mehn liki kan pil kin wia soahng wet.” (Mad. 5:47) Me pid duwen met, sounkaweid Donald Weiss ntingihdi: “Aramas akan kin kailongki ma meteikan kin pohnsehsehla irail. Uhdahn sohte kahrepe mwahu ehu en pohnsehsehla emen. Me keieu mwahu iei rahnmwahwih aramas oh koasoiong irail.” E pahn imwila mwahu ong kitail ma kitail kin pohnese meteikan.

10. Ia duwen wiewia mwahu kan ar kak sewese kitail en pweida nan atail kalohk? (Kilang kakon “Tepikihda Pohkomwokomw.”)

¹⁰ Medewehla Tom oh Carol, pwopwoud Kristian ehu me kousoan nan kahnimw laud ehu nan paliepeng en wehin Amerika. Ara kin kapehse mwahu rehn mehn mpara kan kin wiahla kisehn ara doadoahk en kalohk. Ia duwen ara kin wia met? Tom doadoahngki Seims 3:18: “Se kin song koasoiong aramas akan oh ahneki popohl rehrail. Se kin kohla rehn irail kan me se kilang likin imwarail kan oh irail kan me kin doadoahkseli wasao. Se kin kouruhr oh rahnmwahwih irail. Se kin koasoia dahme re perenki me duwehte neirail seri kan, neirail kidi kan, imwarail akan oh arail doadoahk. Kedekedeo irail wiahla kompoakepaht.” Carol pil nda: “Ni aht pwurehng tuhwong irail, se kin ndaiong irail adat oh idek ederail. Se kin padahkihong irail dahme se wia wasao ni mwotomwot. Mwuhr se kakehr kalohk ong irail.” Tohto mehn mpen Tom oh Carol kakehr likih ira. Tohto irail ale sawaspen Paipel kan oh ekei kasalehda arail men kalaudehla arail sukuhlki padahk mehlel.

Kasalehda Wahu ni Ahnsou Apwal

11, 12. Dahme kahrehda kitail kin kasik wiewia soh kadek ni atail kalohki rongamwahwo? Dahme kitail pahn wia?

¹¹ Ekei pak, kitail kin tuhwong irail kan me sohte kin kadek ong kitail ni atail kalohki rongamwahwo. Kitail kin kasik met pwehki Krais Sises padahkihong sapwellime tohnpadahko: “Ma irail kalokeieier, re pil pahn kalokei kumwail.” (Sohn 15:20) Ma kitail pil lemeiong aramas akan, e sohte pahn imwila mwahu. Dahme kitail pahn wia? Wahnpoaron Piter ntingihdi: “Kumwail lemmwiki Krais nan kapehdomwail kan, oh wiahki amwail Kaun. Onopada ahnsou koaros pwe kumwail en kak sapeng mehmen me peki rehmwail kumwail en kawehwehiong koapworopwor me mi rehmwail. Ahpw kumwail wia ni tiahk en kadek oh wahu.” (1 Pit. 3:15, 16) Atail kasalehda kadek oh wahu kak kahrehiong irail kan me kin kasarowe kitail en perenki rong rongamwahwo.—Taitus 2:7, 8.

¹² Kitail kak onopada pwehn sapeng aramas akan ni ahl ehu me Koht pahn kupwurki ahnsou me re kin lemei ong kitail? Ei. Pohl kaweidki: “Amwail koasoi mwohn aramas en katapan oh kansenamwahu.” (Kol. 4:6) Ma e wia tiahk ehu ong kitail en kasalehda wahu ni atail lokaia oh wiewia ong koaros nan atail peneinei, wasahn doadoahk, nan mwomwohdiso oh ong mehn mpatail kan, e pahn kaunopada kitail nin duwen Kristian men ong irail kan me pahn kapailoke oh kasarowe kitail.—Wadek Rom 12:17-21.

13. Menlau kihda ehu karasaras ong ia duwen atail kasalehda wahu eh kak kansenamwahwihala emen me kin uhwong kitail.

¹³ Kasalehda tiahk mwahu ni ahnsou apwal akan kin imwila mwahu. Karasepe, nan Sapan, tohnihmw men oh iengeo kapailoke emen Sounkadehde. Ni wahu, brothero kohkohlahsang ira. Ni eh pousehlahte oh kalohk nan wasao, e tehkada me iengen tohnihmwo wie kilikilang ih. Ni en brothero kohla reh, ohlo nda: “Mahk pwehki dahme se wiahiong uhk. I kilang me mendahki se lokaia lemei ong uhk, ke kasalehdahte mas kadek. Dahme I anahne wia pwehn duwehte iuk?” Pwehki sohla en ohlo doadoahk oh eh nohno ahpwtehn mehla, sohla eh koapworopwor en men peren. Brothero idek ma e men onop Paipel oh ohlo pwungki. Sohte pwand e tepida onop pak riau nan wihk ehu.

Ahl Keieu Mwahu en Kakairada Tiahk Mwahu

14, 15. Ia duwen ladu kan en Siohwa ni ahnsou me Paipel ntingdi arail kin kaiahne neirail seri kan?

¹⁴ Ni ahnsou me Paipel ntingdi, pahpa oh nohno kan kin tehk kanaiehng pwe neirail seri kan en sukuhlki kasalehda wahu nan imwarail. Tehk duwen en Eipraam oh nah pwutak Aisek ara kin koasoipene ni wahu nan Senesis 22:7. Kaiahn mwahu en eh pahpa oh nohno kin sansalda mwahu rehn Sosep. Ni ahnsou me e wia sensel, e kin kasalehda wahu ong ienge me selidi kan. (Sen. 40:8, 14) Eh koasoi kan ong Parao kin kasalehda me e kin sukuhlki duwen mwomwen eh pahn koasoiong emen me lapalap.—Sen. 41:16, 33, 34.

¹⁵ Kehkehlik wet kin mi nan Kosonned Eisek me mehn Israel kan alehdi: “Kumwail wauneki samamwail oh inamwail kan, pwe kumwail en mour werei nan sahpw me I pahn kihong kumwail.” (Eks. 20:12) Ehu ahl me seri kan kin kasalehda wahu ong arail pahpa oh nohno iei sang ni arail tiahk mwahu nan imwarail. Nein Sepda serepeino kasalehda wahu mehlel ong semeo ni eh kapwaiada inou me eh pahpao wiahda mendahki irairo inenen apwal.—Sounkopwung 11:35-40.

16-18. (a) Ia duwen atail kak padahkihong seri kan duwen tiahk mwahu? (b) Ia ekei kamwahu kan en padahkih neitail seri kan duwen tiahk mwahu?

¹⁶ Kaiahne neitail seri kan pwehn ahneki tiahk mwahu uhdahn kesempwal. Arail pahn kin ehuiong me laud kan, me pwulopwul kan anahne sukuhlki ia mwomwen arail pahn kasamwo aramas, sapeng telephone, oh iang meteikan mwenge. Irail anahne wehwehki dahme kahrehda irail anahne rahnmwahwih aramas akan, kadek ong me mah oh soumwahu kan, oh sewese irail kan me weuwa wisik me toutou. Irail anahne wehwehki kesempwalpen arail pahn nda ni mehlel “menlau,” “kalahngan,” “komw dehr kupwurohki,” “I kak sewese iuk?,” oh “kupwurmahk.”

¹⁷ Kaiahne seri kan en kasalehda wahu sohte anahne apwal. Ahl me keieu mwahu iei en kasalehda mehn kahlemeng mwahu. Kurt me sounpar 25 koasoia duwen ih oh rie pwutak silimeno arail sukuhlkihdi duwen kasalehda wahu: “Se kin kilang oh rong at pahpa oh nohno kin koasoipene ni kadek oh kin kasalehda kanengamah oh nsenohki meteikan. Nan Wasahn Kaudok, pahpa kin kahre ie ien iang ih koasoiong me mah kan mwohn oh mwurin mihting kan. I kin rong eh rahnmwahu kan oh kilang duwen eh waunekin irail.” Kurt pil doula oh koasoia: “Mwuhr, ei tiahk kan duwehla en ei pahpao. I ahnla kasalehda wahu ong aramas. Kitail sohte kin wia met pwehki kitail anahne wia ahpw pwehki kitail kin men wia.”

¹⁸ Dahme pahn wiawi ma pahpa oh nohno kan kin padahkihong neirail seri kan duwen tiahk mwahu? Seri ko pahn kak diarada kompoakparail kan oh kolokol arail popohl rehn meteikan. Irail pahn koahiek en doadoahk rehn arail kaun akan oh iengerail tohndoadoahk kan. Laud sang met, seri kan me ese tiahk mwahu oh pwung pahn wahdo peren oh nsenamwahu ong arail pahpa oh nohno.—Wadek Lepin Padahk 23:24, 25.

Tiahk Mwahu Kin Kahrehda Atail Weksang Sampah Wet

19, 20. Dahme kahrehda kitail en koasoanehdi teng pwehn kahlemengih kupwur kadek en atail Koht oh sapwellime Ohl?

¹⁹ Pohl ntingihdi: “Nan amwail wialahr sapwellimen Koht seri kompoak kei, kumwail song en kahlemengih ih.” (Ep. 5:1) En kahlemengih Siohwa Koht oh sapwellime Ohl kin pidada atail doadoahngki kaweid kan en Paipel, duwehte me kitail koasoia nan iren onop wet. Ni atail wia met, kitail pahn soikala wiewiahn mwalaun en natih me lapalap akan de kasalehda kadek pwehn alehdi dipwisou tohto.—Sud 16.

²⁰ Ni imwin rahn akan en eh kaunda suwed, Sehdan kin nantihong en kasorehla tiahk en wahu me Siohwa ketin koasoanehdier. Ahpw Tepilo sohte pahn pweida en kihsang wiewia mwahu en Kristian mehlel kan. Emenemen kitail anahne koasoanehdi teng en kahlemengih kupwur kadek en atail Koht oh sapwellime Ohl. Eri, atail koasoi oh wiewia pahn ahnsou koaros weksang irail kan me sohte kin kasalehda wahu. Kitail pahn wahdo kaping ong mwaren atail Koht, Siohwa, me kin ketikihda mehn kahlemeng keieu unsek duwen tiahk mwahu, oh pahn pil kahrehdo aramas mohngiong mehlel ong kaudok mehlel.

[Nting tikitik me mi pah]

Ke Tamataman?

• Dahme kitail sukuhlki sang Siohwa oh sapwellime Ohl duwen tiahk mwahu?

• Dahme kahrehda en rahnmwahwih aramas kin wia mehkot mwahu ong Kristian akan?

• Ia duwen kasalehda wahu eh kin sewese pweidahn atail doadoahk en kalohk?

• Ia pwukoahn pahpa oh nohno ong kaiahne neirail seri kan duwen tiahk mwahu?

[Kawehwehpen kilel kan nan ehu ehu pali 29]

Tepikihda Pohkomwokomw

Aramas tohto kin pweiek en tepida koasoiong emen me re sehse. Ahpw pwehki arail limpoak ong Koht oh mehn mparail kan, Sounkadehdehn Siohwa kan kin nantihong sukuhlki ia duwen ar pahn koasoiong meteikan pwehn ehukihong irail padahk mehlel en Paipel. Dahme kak seweseiuk en kamwahwihala omw koasoi?

Kaweid kesempwal ehu nan Pilipai 2:4 koasoia: “Kumwail pohnese ineng mwahu en meteikan, kaidehn amwail kante.” Medewehla lepin mahsen pwukat ni ahl wet: Ma ke ahpwtehn pahn tuhwong aramas men, e sohte pahn ahn uhk. Dahme ke kak wia pwe aramaso en perenkin uhk? En sirei oh rahnmwahu kak sawas. Ahpw, pil mie soahng teikan me kitail en tehk.

Kitail kakete kerempwa dahme aramas men wiewia de medemedewe ma kitail song en tepida koasoiong ih. Ma kumwa kin koasoiahte dahme ke medemedewe ah kaidehn dahme e medemedewe, ele e sohte pahn perenki koasoi. Kahrehda, ma ke kak esehda dahme aramaso kin medemedewe, ke sou doadoahngki met pwehn tapiada amwa koasoi? Ih met me Sises ketin wia ni e tuhwong lih en Sameriao ni pwarer ehu. (Sohn 4:7-26) Liho kin medemedewehte idipil. Sises ketin doadoahngki en liho madamadau pwehn tapiada eh koasoi, oh mwuri e kawekila ara koasoi ong mehkan me pid kaudok mehlel.

[Kawehwehpen kilel kan nan ehu ehu pali 28]

En kadek ong aramas kak kahrehda ahnsou mwahu en kalohk

[Kawehwehpen kilel kan nan ehu ehu pali 30]

Tiahk mwahu kin konehng ahnsou koaros