Tiahk Mwahu kan​—Kasalepen Aramas en Koht

¹ Tiahk mwahu sohte kin kalapw wiawi nan rahn pwukat. Dahme kahrehda? Aramas akan kin nohn karuwaru, ihme re sohte kin medeweh­la en nda soahng kan me inenen kesempwal, duwehte “Menlau,” “Ka­lah­ng­an,” oh “Ihieng.” Mahsen en Koht kohpada me tiahk mwahu pahn tik­i­tik­la nan imwen rahn akan ni ahnsou me e ntingihdi me aramas pahn ‘roporop ong pein irail, mehwo, aksuwei, sohte pahn kin ka­sa­pahl­ka­lahng­an­ki mehkot, irail pahn sempoak, lemei, re pahn kailongki me mwahu, oh loaumwohmw.’ (2 Tim. 3:​1-4) Soangen tiahk pwukat kin kah­reh­ong aramas en wia tiahk suwed. Nin duwen aramas akan me men ka­pinga Koht, Kristian kan anahne liksang madamadau en sampah me soh­te kin wauneki aramas teikan.

² Ia Wehwehn Tiahk Mwahu? Tiahk mwahu kin wehwehki nsenohki pepehm en aramas teikan oh soahng kan me kitail kin wia pwehn min­imini­ong mehteikan. Kadek, limpoak, lokaia mwahu, oh medemedewe mehteikan kin kisehn tiahk mwahu. Soangen irair pwukat kin koh­sang atail limpoak ong Koht oh pil mehn mpatail. (Luk 10:27) Tiahk mwahu kin wia mehkot me mwohni sohte kak pwainda, ahpw kin mie katepe ni soahng koaros ong atail wia nanpwung mwahu rehn mehteikan.

³ Sises Krais wia mehn kahlemeng mwahu ni ahl wet. Ahnsou koa­ros, e kin doadoahngki Kosonned Kesempwal wet: “Duwen me ke men aramas en wiahiong uhk, ih duwen me ke pahn wiahiong irail.” (Luk 6:​31) Kitail soh kin pwuriamweikihla duwen Sises a kin kasalehda lim­poak oh kadek ong sapwellime tohnpadahk kan? (Madiu 11:28-​30) Tiahk mwahu me e kin kasalehda sohte kohsang pwuhk ehu me e wadek me kin kawehwe iaduwen aramas kak kasalehda tiahk mwahu. Ahnsou me Sises kin kasalehda limpoak oh kadek, e kohsang mohngiong me diren lim­poak, kadek-sapan oh mehlel ong mehteikan. Kitail en kahlemengih Sises me wia mehn kahlemeng mwahu.

⁴ Iahd me Kristian kan anahne kasalehda tiahk mwahu? Kitail en kasalehda tiahk mwahu ihte ahnsou tohrohr kan, ahnsou me kitail men aramas kilang atail tiahk mwahu oh kapinga kitail nan arail madamadau? De kitail pahn kasalehda tiahk mwahu ihte ahnsou me kitail men kahrehong mehteikan en wia dahme kitail men irail en wia? Soh! Kitail anahne tiahk mwahu ahnsou koaros. Ni ahl dah kan kitail en nsenohki met ni atail kin miniminiong mehteikan nan mwo­mwoh­diso?

⁵ Nan Kingdom Hall: Kingdom Hall kin wia atail wasahn kaudok. Kitail mihmi nan Kingdom Hall pwehki Siohwa Koht luhkekitaildo pwehn kaudokiong Ih. Ni ahl wet, kitail kin wia aramas lukehdo kei. (Mel. 15:1) Kitail aramas me kin wia mehn kahlemeng mwahu ahnsou me kitail kin mihmi nan Kingdom Hall? Kitail kin nsenohki oh koa­soan­eh­di mwahu atail likou oh kapwat? E sohte pahn mwahu ma kitail doa­doahng­ki likou oh kapwat me sohte konehng Kristian. Sohte lipilipil ma kitail iang towehda kapokon kan de iang towehda mihding kan en ehu ehu wihk, aramas kin wehwehki me sapwellimen Siohwa aramas akan kin doadoahngki likou konehng Kristian oh kin tiahk mwahu oh meh­pwu­kat kin kapinga Koht. (1 Tim. 2:​9, 10) Ni ahl wet, kitail kin kasalehda me kitail wauneki Siohwa Koht oh aramas akan me Koht luh­ke en iang towehda tuhpene pwukat.

⁶ Pil ehu ahl me kitail kak kasalehda tiahk mwahu ni ahnsoun mihding kan iei en kohdohng mihding kan mwohn mihding tepida. Ni mehlel, met sohte kin wia mehkot mengei en wia. Ekei kin mihmi doh sang Kingdom Hall oh ekei kin naineki seri tohto oh met kin kah­reh­da re kin pwand en kaunopada. Ahpw, nan ekei mwomwohdiso kan, per­sent 25 de pahkis ehu en sounkalohk kan kin kalapw lel King­dom Hall mwurin tepin koul oh kapakap nekier. Met kin wia mehkot en mede­me­de­we laud duwe. Kitail anahne tamataman me atail tiahk mwahu kin pid duwen atail nsenohki pepehm akan en mehteikan. Siohwa, me kin luhke kitail ong tuhpene pwukat, Ih me koasoanehdi mihding pwukat me kin dirkihla mwengehn ngehn ong kamwahupatail. Kitail kin kasa­leh­da atail kalahnganki oh nsenohki sapwellime pepehm kan ni atail kin mwadang lel Kingdom Hall mwohn mihding pahn tepida. Oh pil, ma kitail kin lel Kingdom Hall pwand, mwurin mihding tepidahr, met kin kauwehla ahn mehteikan arail rongorong oh pil sohte kin kasalehda wahu ong irail akan me mihmihier nan Kingdom Hall oh rong kanahieng padahk kan.

⁷ Ahnsou me kitail kin iang towehda mihding kan, kitail kin kasamwo irail me kapw kan? Atail kasamwo irail kin kisehn atail tiahk mwahu. (Madiu 5:​47; Rom 15:7) Atail rahnmwahuwih irail, itik peh­rail, de atail pohkomwokomw ong irail​—⁠soahng pwukat kin mwomwen tikitik, ahpw e kin kasalehda me Kristian mehlel kan kin kasalehda limpoak oh kadek. (Sohn 13:35) Mwurin keieun mihding me e iang to­weh­da nan Kingdom Hall, emen ohl koasoia: “I tuhwong aramas tohto rahno me kasalehong ie limpoak mehlel, ahpw, dahme kapwuriamwei: me aramas pwukat I ahpwtehn tuhwong irail, oh irail tohto sang irail koaros me I tuhwong nan pein ahi sarawi me I tikida loale me kin kasalehong ie limpoak. E sansal mwahu me I diarada padahk mehlel.” Imwilahn met, ohlo kawekila eh mour oh sounpwong isuh mwuri, e pap­i­dais­la. Ei, atail tiahk mwahu kak imwila mwahu!

⁸ Ma kitail kin kadek ong aramas me kitail ahpwtehn tuhwong, kitail soh pahn pil kadek ong “irail kan me kisehn atail pwoson”? (Kal. 6:​10) Iren kaweid wet pil kesempwal: “Kahkahki oh wauneki me mah kan.” (Lipai 19:32) Kitail en dehr manokehla irail me mah kan ahnsou me kitail kin tuhpene ong mihding kan oh kapokon kan.

⁹ Rong Kanahieng: Ahnsoun mihding kan, irail Kristian kan me kin papah Koht kin wia padahk kan pwehn sewese kitail en kekeirada ni pali ngehn. (Rom 1:​11) E sohte pahn kasalehda tiahk mwahu ma kitail pahn memeir, de katairong kangkang pwilis, de kalapw koasoiong emen me mwohndi limwahn kitail, de kohla imwen kai­nen pak tohto ahpw sohte uhdahn anahne, de wadek mehkot me sohte pid padahko me wiwiawi, de wia soahng teikan me sohte kin pid mihd­ing ahnsou me mihding wiawi. Elder kan anahne kasalehda mehn kahlemeng mwahu ni ahl wet. Ma kitail men kasalehda tiahk mwahu en Kristian mehlel, met pahn kamwekid kitail en wauneki irail me wia padahk kan oh pil wauneki Siohwa me kin ketikihda kaweid wet oh mehpwukat pahn sansal ni atail pahn rong kanahieng padahk kan me wiawi ahnsoun mihding.

¹⁰ Oh pil, kitail pahn kasalehda me kitail wauneki irail me wia padahk kan iangahki irail sounrongorong kan ni atail pahn kapiridi neitail pager kan oh cellular telephone kan pwehn dehr kauwehla mihding kan.

¹¹ Tiahk Mwahu oh Seri kan: E pahn mwahu ma pahpa oh nohno kan pahn ahnsou koaros tehk duwen tiahk en neirail seri kan. Ma emen seri pahn tepida sengiseng de mwekimwekidseli oh ma ke kilang me met kin kauwehla ahn mehteikan rongorong, e pahn mwahu ma ke pahn kahre serio likin Kingdom Hall mwadang pwehn kameleileidi serio. Mehlel, mwein ekei pak met pahn apwal pwe ke men rongo­rong­ete padahko, ahpw tamataman me met kin kasalehda me ke nsenohki pepehm en mehteikan oh ke sohte men kauwehla arail rong kanahieng padahko. E pahn mwahu ma pahpa oh nohno kan me naineki seri tiki­tik kan me kin kalapw sengiseng de katairong de mwekidseli pahn mwohndi ni sehr kan me keieu mwuri pwehn dehr kauwehla ahn pali laud en tohnmwomwohdiso arail rongorong ma re anahne pedoisang mihding pwehn kameleileidi seri kan. Ahpw, ni mehlel, e pahn kasalehda lim­poak oh wahu ma ke pahn mwohndi mwowe nan Kingdom Hall pwehn mweidohng peneinei kan me naineki seri tikitik en mwohndi ni sehr kan me keieu mwuri.

¹² Pahpa oh nohno kan anahne tehk duwen tiahk en neirail seri kan mwohn oh mwurin mihding kan. E sohte konehng seri kan en tang­seli nan Kingdom Hall, pwe met kin kahrehda aksident kan. Tangseli likin Kingdom Hall pil kin keper, keieu ni pwong kan, pwe re sohte kak kilang mwahu likin ihmw. Ma kitail koasoakoasoi ngihl laud lik­in Kingdom Hall, e kak kauwehla onepek en mehn mpatail kan oh arail madamadau kan me pid Sounkadehdehn Siohwa kan sohte pahn mwahu. Se men kapinga irail pahpa oh nohno kan me kin tehk neirail seri kan nan King­dom Hall oh likin Kingdom Hall pwehki met kin kahrehda mini­min­pene oh nsenamwahu nanpwungen koaros.​—Mel. 133:1.

¹³ Ni Wasahn Pwuhk Study: Kitail kin kalahnganki kadek en brother oh sister kan me kin mweidohng tohnmwomwohdiso en tuhpene ni imwarail pwehn iang towehda Pwuhk Study en Mwomwohdiso. Ni ahn­sou me kitail kin iang towehda Pwuhk Study, kitail anahne kasa­leh­da wahu ong irail oh arail wasa. Mwohn kitail pahn pedolong nan imw­arail, kitail en irisla mwahu neitail suht kan pwehn dehr ka­samin­eh­la nan imwarail. Pahpa oh nohno kan anahne tehk mwahu neirail seri kan, oh tehk me re kin mihmi wasao me Pwuhk Study kin wiawi. Mendahki pwihn en Pwuhk Study kin tikitik, oh irair en wasao kin weksang nan Kingdom Hall, kitail en dehr isaneki kadek en tohnihmwo oh lemeleme me kitail mihmi nan pein imwatail. E pahn konehng pahpa de nohno en iang neira seri kan ahnsou me re kin doadoahng­ki imwen kainen. Oh pil, pwehki Pwuhk Study kin kisehn mihding kan, met weh­weh­ki me kitail anahne doadoahngki likou oh kapwat duwehte me kit­ail pahn wia nan Kingdom Hall.

¹⁴ Tiahk Mwahu Kin Kesempwal: Atail kasalehda tiahk mwahu en Kristian kin kak sewese mehteikan en medemedewe mwahu duwen atail doadoahk en kalohk oh pil e kin kak sewese kitail en miniminiong mehteikan. (2 Kor. 6:​3, 4, 6) Pwehki kitail kin papah Koht peren men, e pahn mengei ong kitail en pohkomwokomw, mengei en doadoahk rehn mehteikan oh koasoiong mehteikan, oh pil wia soahng kan, iang­ahki soahng tikitik kan, pwehn kaperenda mehteikan. Atail tiahk mwahu kin kamwahuwihala atail mour nin duwen aramas akan me men kaperenda kupwuren Koht.