Sewese Meteikan en Wiahla Kompoakepahn Koht
1 Rahnwet, aramas kan sang nan wehi koaros kin sukuhliki ahn Siohwa ahl akan. (Aiseia 2:2, 3) Ahpw, ma irail pwukat men “wa mwahu ni kanengamah,” irail anahne poakohng Siohwa. (Luk 8:15; Mark 12:30) Ma sohte limpoak wet, irail sohte pahn ahneki kehl en pelianda soangen wiewia suwed kan de pil ahneki eimah en wia dahme pwung. Ehu ahl en sewese meteikan en ahneki nanpwung mwahu rehn Siohwa iei en kekeirada loalarail en kalahnganki sapwellimen Siohwa irair akan. Kangoange irail en wadek Paipel kaukaule oh kin doudouloale iaduwen sapwellime irair kan ki sansalda.
2 Ahmw Mehn Kahlemeng: Pein ahmw wiewia kan kak kamwekid laud mohngiong en irail kan me kin onopki Paipel. Ni ahnsou irail pahn kilang me ke kesempwaliki ahmw nanpwungmwahu rehn Siohwa oh iaduwen e kin kamwekid ahmw mour, irail pahn mwekidki en ahneki soangen nanpwungmwahu wet. (Luk 6:40) Ehi, atail mehn kahlemeng kin kamwekid laud meteikan laudsang dahme kitail kin koasoia.
3 Ehu ahl laud me pahpa oh nohno kan kak padahkiong neirail seri kan en poakohng Siohwa iei sang ni arail mehn kahlemeng kan. (Deuderonomi 6:4-9) Ehu pwopwoud me men kekeirada neirail seri kan nan padahk mehlel idek kaweid sang rehn pahpa oh nohno kan me pweida ni ahl wet. Pahpao koasoia, “Soahng ehu me duwehpene nan pasapeng en pahpa oh nohno kan me se peidek rehrail iei mehn kahlemeng en pahpa oh nohno.” Eri, sang ni elen arail mour, pahpa oh nohno kan kak kihong neirail seri kan mehn kahlemeng ong iaduwen arail pahn mour oh ia wehwehn en wiahla “kompoakepahn Siohwa.”—Seims 2:23.
4 Kapakap sang nan mohngiong: Ke kak pil sewese meteikan en wiahla kompoakepahn Siohwa sang ni atail pahn padahkiong irail en kapakap sang nan mohngiongarail. Ke kak kasalehong irail kapakap en Sises, oh pil kapakap teikan nan Paipel. (Madiu 6:9, 10) Ke kak padahkiong noumw seri kan oh pil irail kan me onopki Paipel iaduwen arail pahn kapakap sang ni arail pahn rong ahmw kapakap kan. Ni arail pahn rong ahmw pepehm kan sang ahmw mohngiong, irail pahn pehm ahmw pepehm kan ohng Siohwa. Kangoange irail en “poadidiong kapakap ahnsou koaros” ni ahnsou irail pahn lelohng kahpwal kan. (Rom 12:12) Ni arail pahn pehm sapwellimen Siohwa sawas nan ahnsoun anahn kan, irail pahn kak likih Siohwa oh limpoak ohng ih nin duwen kompoakepah.—Melkahka 34:8; Pilipai 4:6, 7.