Ngenen Toukihda Pein Kitail Kin Wahdo Kapai kan
1. Iaduwen Depit oh Nehmaia kasalehda ngenen toukihda pein ira?
1 Ni ahnsou me Kolaiad mwamwahleki karis en sounpei kan en Israel, sounpei pwukat koaros kak toukihda pein irail en peiong ih. Ahpw sohte emen sounpei me wia met, ihte emen pwutak me kin wia silepen sihpw, emen me sohte alehda kaiahn en mahwen, me toukihda pein ih. (1 Samuel 17:32) Ni ahnsou me mehn Suhs kalipilipalahr akan pwuralahngehr Serusalem ahpw sohte kanekehla doadoahk en onehda sapahl kehl kan, emen sounkohwahn wain en nanmwarki en Persia me tounmeteikihla ah pwais me e ahneki nan imwen nanmwarkio oh seiloaklahng Serusalem pwehn koasoanehdi doadoahk. (Nehmaia 2:5) Siohwa kapaiada ohl pwukat, Depit oh Nehmaia, pwehki ara irair me re kasalehda.—1 Samuel 17:45, 50; Nehmaia 6:15, 16.
2. Dahme kahrehda Kristian akan anahne kasalehda ngenen toukihda pein irail?
2 Rahnwet, aramas tohto sohte kin kasalehda ngenen toukihda pein irail. Nan “imwin rahn akan,” aramas akan kin uhdahn soupisek, oh re kin “roporop ong pein irail,” (2 Timoty 3:1, 2) E mengei ong emen en soupisengki pein ah wiewia kan oh sohte tehk ahnsou mwahu kan en toukihda pein ih pwehn papah meteikan ni ahnsou me mie anahn en sewese irail. Ahpw, nin duwen Kristian akan, kitail men kahlemengih Sises, me tiengla mwowe pwehn sewese meteikan. (Sohn 5:5-9; 13:12-15; 1 Piter 2:21) Iaduwen kitail kak kasalehda ngenen toukihda pein kitail, oh soangen kapai dah kan kitail pahn kak ale?
3. Iaduwen ngenen toukihda pein kitail kin kihda sawas ong mihding en mwomwohdiso kan?
3 Ong Riatail Brother kan: Kitail kak ehukihong meteikan “kisakis en pali ngehn” ni atail kin iang pasapeng kan ni ahnsou me padahk kan en mihding anahne pasapeng kan. (Rom 1:11) Iang pasapeng kin kawauwih Siohwa, katengehdi padahk mehlel nan atail madamadau oh mohngiongitail, oh kalaudehla atail peren en mihding kan. (Melkahka 26:12) Kitail pil kak toukihda pein kitail en wia padahk nan Theocratic Ministry School ni ahnsou me emen me pahn wia padahk sohte kak wia. Met pahn sewese kitail en kamwahuiala atail koahiek en wia padahk.
4. Ia ekei ahl teikan me kitail kak kasalehda ngenen toukihda pein kitail?
4 Brother kan kak kasalehda ngenen toukihda pein irail sang ni arail kin nantiong kakehr ale pwukoa kan nan mwomwohdiso. (Aiseia 32:2; 1 Timoty 3:1) Koaros kak kihda sawas pwe kapokon kan en kak wiawi ni soandi mwahu ni arail kin toukihda pein irail en wia doadoahk nan soangsoangen pwihn en doadoahk kan. Ni ahnsou me kitail toukihda pein kitail en iang sounapwalih en mwemweit kan nan kalohk oh kaunopada kene mwenge, met pahn imwikihla “ehukihpenehn mehn kangoang kan.” (Rom 1:12) Ni ahnsou me kitail kihda sawas ohng sepwoupwou kan, liohdi kan, me soumwahu kan, nohno kan me naineki seri tikitik kan, oh meteikan nan mwomwohdiso, kitail pahn ahneki peren oh sapwellimen Siohwa kapai kan.—Lepin Padahk 19:17; Wiewia 20:35.
5. Soahng dah kan duwen Kingdom Hall kahrehda anahn en irail kan me perenki toukihda pein irail?
5 Pil ehu ahl me kitail kak toukihda pein atail ahnsou oh nanti iei en sewese kamwakele oh apwalih Kingdom Hall. Kapataiong met, pwehki aramas tohto kin pidelong nan padahk mehlel, mie anahn laud en Kingdom Hall kapw kan oh tohndoadoahk kan en kauwada Kingdom Hall pwukat. Ehu pwopwoud toukihda pein ira en iang doadoahk en Regional Building Committee (pwihn en wiahda Kingdom Hall kan) nan ara wasa mendahki pwopwoudo sohte koahiek en wia ihmw. Ekis ekis, pwopwoudo ale kasukuhl oh met ira kak sewese kihdi brick kan. Lih pwopwoudo koasoia: “Iang meteikan doadoahk imwikihla kerenpene nanpwungatail. Ni imwin ehu ehu rahn, kitail kin pwangada ni pali war ahpw nsenamwahu ni pali ngehn.”
6. Dahme kahrehda kalohk iei doadoahk en toukihda pein kitail me keieu kesempwal me kitail kak wia?
6 Ni Kalohk: Doadoahk en toukihda pein kitail me keieu kesempwal me kitail kak wia rahnwet iei doadoahk en kalohki Wehio. Ni aramas akan kin ale sawas pwehn wehwehki oh kapwaiada kaweid en Paipel, re kin ale katepen mour oh kehl en powehdi tiahk kan me kin kauwehla pein irail. Irail kin sukuhliki koapworopwor en Paipel me kin kakehle irail ong ni ahnsou kohkohdo. Ni atail kin ehukihong aramas akan kasukuhl en Paipel, kitail kin perenki wia doadoahk kesempwal ieu me kak kihong meteikan kamwahuparail me kak mihmi rehrail ahnsou reirei. (Sohn 17:3; 1 Timoty 4:16) Mwein atail irair kak mweidong kitail en kalaudehla atail iang doadoahk wet ni atail wia auxiliary de regular pioneer, ni atail pahn kosoula nan wasa me anahnepen kalohk laud mie, de ni atail pahn sukuhliki ehu lokaia tohrohr.
7. Dahme kahrehda en toukihda pein kitail inenen kesempwal rahnwet?
7 Nanmwarki Depit kohpadahr me ni ahnsou me Mesaia pahn tepida ah kaunda, sapwellimen Koht aramas kan pahn “toukihda pein irail.” (Melkahka 110:3, NW) Pwehki Siohwa kin ketin kamwadangahla kaimwiseklahn rahk en pali ngehn, mie doadoahk tohto me kitail kak toukihda en wia. (Aiseia 60:22) Mie pak me ke nda: “Iet ngehi! komwi ketin poaroneiehla”? (Aiseia 6:8) Mehlel, ni atail kin kasalehda ngenen toukihda pein kitail, kitail kak kaperenda Siohwa oh ale kapai laud kan.