Padahkiong Noumw Seri kan en Kapinga Siohwa
1. Me pwulopwul kan kak kapinga Siohwa?
1 Melkahka 148:12, 13 kangoange pwutak kan oh serepein kan en “kapinga mwaren KAUN-O!” Iren Paipel pwukat audaudki mehn karasepe tohto en seri pwulopwul kan me wiahier met. Karasepe, “kisin pwutak Samuel eri usehla eh doadoahk en papah KAUN-O.” (1 Samuel 2:18) “Kisin serepein kis” me ndahng en Nahman eh pwoud me sapwellimen Siohwa soukohp nan Israel kak kamwahwihala en Nahman ah soumwahu tokutok. (2 Nanmwarki 5:1-3) Ni ahnsou Sises pedolongehr nan tehnpas sarawio oh wiahda doadoahk kapwuriamwei kan, “seri ko [kisin pwutak kan]” me werkihla: “Kaping ong ih me kisehn kadaudok en Depit!” (Madiu 21:15) Iaduwen pahpa oh nohno kan kak padahkih neirail seri kan en kapinga Siohwa?
2. Dahme kahrehda e kesempwal pahpa oh nohno kan en wia mehn kahlemeng mwahu ong neirail seri kan?
2 Karasepe: Pahpa kan nan mwehin Israel aleier kaweid en mahs poakohng Siohwa oh sapwellime kosonned akan nan mohngiongarail mwohn arail pahn tepida padapadahkihong padahk mehlel nan mohngiong en neirail seri kan. (Deuderonomi 6:5-9) Ma ke kin wia koasoi en kangoang ong arail doadoahk en kalohk oh wiahki kalohk kisehn omw koasoandi en ehu ehu wihk, noumw seri kan pahn mwekidki en kilang me doadoahk en kalohk kin kesempwal oh kaperen.
3. Iaduwen emen sister paiekihda mehn kahlemeng en ah pahpa oh nohno?
3 Emen sister katamanda: “Ni ahnsou me I lalaudla, en iang doadoahk en kalohk nan imwin wihk kan koaros wia kisehn koasoandi en aht peneinei. I kak kilang me ahi pahpa oh nohno inenen perenki kalohk. Se tikida kilikilang doadoahk wet nin duwen mehkot kapai.” Sister menet wiahla sounkalohk me saikinte papidais ni eh sounpar isuh oh e mihmi nan eh kesilihsek siluhn sounpar en papah en doadoahk en kalohk kaukaule.
4. Ia wehwehn en kaiahne seri kan ni ahl me pweida mwahu?
4 Kaiahn me Pweida Mwahu: Kihong noumw seri kan en iang pidada amwail doadoahk en kalohk. Mwein ele re kak letelet ni wenihmw kan, kihong tohnihmwo ehu kisin doaropwe, de wadek ehu iren Paipel. Met pahn kalaudehla arail perenki oh sewese irail en kamehlele arail koahiek en iang pakairki duwen Wehio. Ni ahnsou me re laudla, arail iang doadoahk en kalohk pahn lalaudla. Ihme kahrehda, sewese irail en kekeirda mwahu oh kihong madamadau ong mehn akadei en pali ngehn.
5. Dahme anahn ong seri men pwehn warohng wiahla emen sounkalohk me saikinte papidais?
5 Ni ahnsou mwadang koasoiong elder kan me ke pehm me noumw seri kan kakehr wiahla sounkalohk me saikinte papidais oh ahnsou me re kasalehda arail ineng en iang kalohk. En wiahla emen sounkalohk pahn kamwekid irail en medewehda pein arail pwukoa en kapinga Siohwa. Tamataman me seri men sohte anahne ese wen me emen me laud ese pwehn kak en wia emen sounkalohk. Noumw serio wehwehki duwen padahk mengei kan en Paipel? E kin kolokol tiahk kan en Paipel? E kin inengieng iang doadoahk en kalohk oh kasalehda me ih emen Sounkadehdehn Siohwa kan? Ma ei, elder kan mwein kak tenekihada me e warohng wiahla emen sounkalohk me saikinte papidais.—See Organized to Do Jehovah’s Will, pp. 79-82.
6. Dahme kahrehda e katapan ong pahpa oh nohno kan en kaiahne neirail seri kan?
6 Padapadahki seri kan en kapinga Siohwa sang mohngiongarail anahne doadoahk laud. Ahpw malaulau soahng kan me kin kahrehiong peren laud ong pahpa oh nohno sang en kilang neira seri kan en kekeirda ni pali ngehn. Kesempwal sang met, Siohwa kin kupwurperenki ni ahnsou me seri kan kin koasoia duwen sapwellime doadoahk kaselel kan.