Wekidekla Kaperen kan ong Kahn Iroir!
1 Tepin pahr wet, mwomwohdiso kan alehda pakair kaperen ehu: Tepida sang January 2008, soangen The Watchtower makasihn riau en lokaiahn wai pahn mie, ehu ong wehipokon oh pil ehu ong riatail Kristian akan! Mwein ke kin medemedewe: ‘Ia mwomwen makasihn riau pwukat wekpeseng? Ia kamwahupen mie soangen makasihn riau? Mie ire kapw kan nan makasihn pwukat?’
2 Ia Mwomwen Wekpeseng: Makasihn me kileledi ong keieun sounpwong pahn wia Makasihn ong Wehipokon. Artikel koaros nan makasihn wet pahn wiawihda ong kamwahupen wehipokon. Makasihn me kilelehdi ong kaeisek limau en sounpwong pahn wia Makasihn en Onop oh e sohte pahn wia mehn kihla nan doadoahk en kalohk. E pahn audaudki artikel en onop kan ong sounpwong ehu oh pil ekei artikel teikan ong kamwahupen irail Kristian me inouda kan. Makasihn en The Watchtower ong Wehipokon pahn mwahu kaidehn ongete Sounkadehde kan ahpw e pahn pil mwahu ong irail akan me kaidehn Sounkadehde kan ahpw me kin wauneki Paipel. Ni pali teio, makasihn en Awake! pahn wiawihda ong soangsoangen aramas akan, iangahki irail akan me sohte kamehlele Paipel oh irail akan me kaidehn Kristian.
3 Kamwahupe kan: Nan Makasihn ong Onop, sohlahr pahn anahne kawehwe lepin lokaia kan duwehte “pioneer” ong irail me kaidehn Sounkadehde kan en kak wehwehki. Makasihn wet kak audaudki ire kan me onopadahr keieu ong Sounkadehdehn Siohwa kan oh Paipel study kan me kin kekeirada ni pali ngehn. Iaduwen Makasihn ong Wehipokon? Pwehki oaralap kan me pilipilda oh mwomwen nting kan pahn wiawihda ong wehipokon, emen me kaidehn Sounkadehde pil pahn perenki wadek makasihno pwon. Ahpw ni mehlel, Sounkadehdehn Siohwa kan koaros pahn paiekihda arail kin wadek ehu ehu makasihn.
4 Ire Kapw kan: Ekei ire kaperen kan pahn wiawihda nan Makasihn ong Wehipokon en The Watchtower. Ehu ire pahn koasoiapene padahk mengei kan en Paipel ni elen mengei. Pil ehu pahn kasalehda iaduwen Paipel kak sewese peneinei kan. E pahn kasalehda koasoandi en onop en Paipel ong me pwulopwul kan. Ehu ehu makasihn pahn mie artikel me pahn kasalehda ekei padahk en Paipel kan me pahn padahkiong kitail soangen Koht dah Siohwa.
5 Pil nan Micronesia pwon, wekidekla kaperen ehu pahn wiawi ong makasihn en The Watchtower (Kahn Iroir). Tepida sang makasihn en January 2008, neitail makasihn me kin wiawi sounpwong koaros ni lokaiahn Chuuk, Kosrae, Palau, Pohnpei, oh Yap pahn wiawihda ni ahnsou me makasihn en lokaiahn Wai pahn wiawi. Met wehwehki me kitail pahn kak onopki artikel en Watchtower (Kahn Iroir) ehu ehu wihk ni ahnsowohte me mwomwohdiso kan en sampah pwon kin wia.
6 Kitail kin kapakapki me Siohwa pahn ketin kapaiada koasoandi kapw wet me pid duwen makasihn en The Watchtower. Kitail koapworopworki me makasihn wet, oh Awake! pahn lel aramas tohto me warohng ale rongamwahu.—Madiu 10:11.