Kahn Iroir Kin Wiawihda Pwehn Kamwakid Soangsoangen Aramas akan

1. Ia duwen pwihn en ladu lelepek oh loalokong arail kin alasang wahnpoaron Pohl?

¹ Wahnpoaron Pohl kin wekid mwomwen eh kalohki rongamwahwo pwehn kak lel mohngiong en “aramas koaros.” Pwihn en ladu lelepek oh loalokong pil kin doadoahngki neitail pwuhk kan pwehn lel soangsoangen aramas akan me arail irair oh dahme re kamehlele kin wekpeseng. (1 Kor. 9:22, 23) Pwe kitail en kak doadoahngki mwahu Kahn Iroir, kitail anahne wehwehki oh tamataman soangen aramas dah me kisin pwuhk wet kin wiawihda ong.

2. Dahme kahrehda kitail anahne kin tehk mwahu ni atail kin kihla Kahn Iroir?

² Atail kin tehk oh rong kanahieng kak sewese kitail en wiahla “soahng koaros rehn aramas koaros.” (1 Kor. 9:22) Ma mie omw ahnsou en tehk mwahu aramas akan mwohn omw pahn koasoiong irail, eri mwein ke pahn kak kilangada dahme irail kin mwahuki oh dahme kin wiawi rehrail. Ni omw kin kihla Kahn Iroir, kangoange tohnihmwo en kasalehda arail madamadau. Kihda ehu peidek me konehng oh mweidohng irail ahnsou ren koasoi. Rong mwahu. Omw kin rong kanahieng pahn sewese irail en koasoi ni saledek. Arail pasapeng kan pahn kak kasalehda dahme irail kin perenki. Ke kak pilada ehu oaralap me pahn keieu kamwakid irail sang ni omw pahn kin tehk oh rong irail mwahu.

3. Oaralap me mi ni kilin neitail Kahn Iroir iangahki iren onop kan kin wiawihda ong ihs?

³ Oaralap me mi ni kilin neitail Kahn Iroir kin wiawihda ong soangen aramas me kin wauneki Koht oh sapwellime Mahsen ahpw sohte nohk wehwehki mwahu padahk mehlel kan. Irail duwehte aramas akan me Pohl kin koasoia me kin lemmwiki Koht. (Wiewia 13:14-16) Iren onop kan nan Kahn Iroir kin wiawihda ongete Sounkadehdehn Siohwa kan. Pohl ese me irail kan me kin wadek nah kisinlikou kan eselahr iren Paipel kan oh wehwehkilahr padahk mehlel. (1 Kor. 1:1, 2) Iren onop kan pil kin wiawihda ong irail kan me kin iang towehda mihting kan oh me kin eselahr lepin lokaia kan oh padahk en Sounkadehde kan.

4. Dahme kahrehda kitail anahne esehla ehuehu oaralap en neitail Kahn Iroir me kitail kin doadoahngki nan kalohk?

⁴ Nantihong esehla ehuehu oaralap en neitail Kahn Iroir. Eri ke kak ese mehnia me pahn keieu mwahu ong irail kan me ke koasoiong.