Ke Kin Doadoahngki Iren Artikel kan Koaros nan Makasihn?
1 Iren artikel kan me wiawihda ong atail doadoahk en kalohk kin mi nan neitail makasihn. Ekei artikel pwukat pilipildahng doadoahk nan Micronesia iangahki neitail makasihn en lokaiahn Pohnpei. Ke diaradahr ahl akan en doadoahngki artikel pwukat nan doadoahk en kalohk?
2 “Dahme Kitail Sukuhliki Sang Sises”: Mwein ke diarada iren artikel wet pwehn sewese tepida wia onop Paipel. Ma ke saikinte wia met, song en doadoahngki oaralap en artikel ong tohnihmwo oh kasalehiong dahme Sises mahsanih duwen ireo nin duwen tepin parakrap kasalehda. Ma tohnihmwo perenki rong, nantihong pousehlahte koasoiaiong ih doadoahngki sawaspen oaralap me mwomwen peidek kan pwehn kak kamwakid arail madamadau. Luke ih en iang koasoia duwen peideko. Kawehwehda ni mwotomwot kilel kan, oh doulahng parakrap mwuri. Ke kak kanekehla elep en artikel ni tepin tuhwong tohnihmw oh mwuri ni ahmw pahn pwurala reh ke kak kanekehla artikelo pwon. Kaunopada en uhd wia onop en pwuhken Kupwurki, de sawaspen Paipel teikan ni lokaiahn Pohnpei.
3 “Sawas kan ong Peneinei Pwehn Kak Ahneki Nsenamwahu”: Artikel wet men sewese ohl pwopwoud kan, lih pwopwoud kan, oh pahpa oh nohno kan ong iaduwen re kak doadoahngki kaweid en Paipel kan ni arail pahn apwalih kahpwal kan me kak kauwehla popohl nan peneinei. Ke pil kak doadoahngki artikel pwukat en sewese irail kan me kaidehn Sounkadehde kan en wehwehkihla erpit me dierek nan Paipel.—2 Tim. 3:16, 17.
4 Ire kan ong me Pwulopwul kan: Iren artikel en “Ong Neitail me Pwulopwul kan” kin kihong sounwadawad kan en medemedewe oaritik en ehuehu iren Paipel. Ke kak doadoahngki artikel pwukat en sewese me pwulopwul kan me ke tuhwong nan wasahn kalohk en wehwehki kesempwalpen onopki Mahsen en Koht. (Mel. 119:105) Ni omw pahn koasoiong pahpa oh nohno kan, ke kak kasalehda artikel me koasoia “Padahki Noumw Seri kan.” Artikel pwukat kak sewese seri kan en sukuhliki mehn kahlemeng mwahu en irail kan nan Paipel. Ke koasoanehdier ahnsou mwahu en wadek artikel pwukat ong noumw seri kan?
5 Ire Teikan: “Peidek kan Sang Sounwadawad kan” kin kihda peidek me irail me kaidehn Sounkadehde kan kak idek. Ke kak kasalehda artikel wet ni ahmw kihla makasihn kan ni ihmw lel ihmw. Iren artikel me oaralap koasoia “Kisinlikou Sang . . .” iei koasoiepen mouren aramas akan me kasalehda apwal kan me re kin lelohng nan ahnsoun kalohk. Artikel pwukat kak sewese me perenki rong kan en ese me rongamwahu lohkselier nan sampah pwon nin duwen pweidahn kilel en ketier en Krais.—Mad. 24:3, 14.
6 Artikel me koasoia “Karanih Koht,” me poahsoankihda wadawad en Paipel en Theocratic Ministry Sukuhl ele kak kamwakid irail kan me uhdahn men wehwehkihla laud duwen Siohwa. Artikel me koasoia “Kahlemengih Arail Pwoson” kin wiawihda en sewese aramas akan en medemedewe irair en aramas akan nan Paipel—arail pilipil kan, arail kahpwal kan, arail pwoson—met kak wehwe mwahu ong irail sounwadawad kan nan rahnwet.
7 Ia uwen atail perenkihda en alehdi artikel pwukat nan Kahn Iroir me wiawihda ong doadoahk en kalohk! Kitail nantihong esehla artikel pwukat koaros oh doadoahngki nan kalohk.