Ire kan me Pahn Sewese Atail Doadoahk en Kalohk

1. Ia kahrepe riau ong ire wet me adaneki “Koasoakoasoiong Mehn Mpatail” eh pahn kohda?

¹ Ahnsou keren, neitail Kahn Iroir pahn kin kihda ire ehu me adaneki “Koasoakoasoiong Mehn Mpatail.” Mie kahrepe riau ong ire wet eh pahn kohda; en kasalehda padahk kan en Paipel ni ahl ehu me pahn kaperen en rong, oh en kasalehiong kitail ia duwen atail kak koasoia oh mweidohng emen en medemedewe duwen ekei oaralap kan. (1 Pit. 3:15, 16) Ia duwen atail kak doadoahngki ire pwukat?

2. Ia duwen atail kak doadoahngki ire wet nan doadoahk en kalohk?

² Doadoahngki nan Doadoahk en Kalohk: Ke kak nekidala ekei Kahn Iroir me audaudki ire wet. Ma tohnihmw men de aramas me perenki rong de tohnsukuhl en Paipel men idek ehu peidek de kasalehda eh sapwungki oaralap ehu oh oaralap wet mieier nan Kahn Iroir pwukat, kihong ih oh kasalehiong me kumwa pahn kak koasoiapene. Ma sohte noumw Kahn Iroiro me koasoia oaralap wet, mwein ke kak download sang jw.org.

3. Ia duwen atail kak doadoahngki ire pwukat pwehn koasoiong tohnihmw men?

³ Ia duwen omw kak doadoahngki ire pwukat pwehn koasoiong emen? Ekei kin mweidohng tohnihmw en wadek lepin lokaia kan en ‘mehn mpatail’ oh re kin wadek lepin lokaia kan en ‘Sounkadehde.’ Re diarada me wiepe wet kak pweida pwehki met kin mweidohng emen en kasawih atail padahk kan ni ahl ehu me e sohte pahn soansuwedki.​—Deud. 32:2.

4. Ia duwen atail kak doadoahngki ire pwukat pwehn kasukuhlih kitail?

⁴ Kasukuhlih Pein Kowe oh Meteikan: Ni omw pahn wadek ire pwukat, tehk iren Paipel kan, karasaras kan oh mwomwen ar kin kawehwehda ire kan. Pil tehk mwomwen ar koasoi. Kowe eri alasang met nan doadoahk en kalohk. (Lep. Pad. 1:5; 9:9) Emen sister koasoia: “En wadek ire pwukat duwehte en sukuhlki sang emen pioneer koahiek me ese dahme keieu konehng en nda!”

5. Ia duwen atail kak sewese neitail tohnsukuhl en Paipel kan ren kaunopada doadoahk en kalohk?

⁵ Ke pil kak doadoahngki ire pwukat pwehn sewese noumw tohnsukuhl en Paipel kan en kaunopada ong kalohk. Wadekpene ire pwukat oh mweidohng tohnsukuhlo en wia sounkalohk. Ni ahl wet, tohnsukuhlo kak ale kaiahn en kawehwehda dahme e kamehlele ni kamantik. (Kol. 4:6) Mehlel, ire pwukat iei ehu ahl me Siohwa kin ketin sewese kitail en uhdahn “kapwaiada” atail doadoahk en kalohk.​—2 Tim. 4:5.