Ire Kapw ong Tapihada Onop en Paipel
1. Soangen ire kapw dahieu me pwarada nan Kahn Iroir en February? Ia kahrepen eh wiawihda?
1 Ire kapw ehu pwehn sewese kitail en tapihada onop en Paipel tepida nan Kahn Iroir en February 1, 2012. Oaralap iei “Sukuhlki Sang Mahsen en Koht.” Mwein ekei nan wasahn kalohk pahn perenki wadek ehuehu ire kapw pwukat ahpw ire pwukat uhdahn wiawihda pwe kitail en koasoiaiong tohnihmwo.
2. Dahme kin mihmi nan ire kapw wet?
2 Dahme Pahn Mihmi nan Ire Kapw Wet? Oaralap oh sawaspen oaralap kan ntingdi ni mwomwen peidek kan pwe ken idek rehn tohnihmwo ni amwa koasoiapene. Eden iren Paipel kesempwal kan kin kileldi ahpw audepe kan sohte ntingdi, kahrehda tohnihmwo kak pahkpeseng Paipel oh uhdahn sukuhlki sang Mahsen en Koht. Parakrap kan kin mwotomwot pwe kitail kak kesikesihnente oh koasoiong tohnihmwo. Ehuehu ire kin kasalehda ia wasa nan pwuhken Paipel Padahngki kin koasoia pwe en seweseiuk ken tepida doadoahngki pwuhko ma konehng.
3. Ni atail kin kalohk ihmw lel ihmw, ia duwen atail kak doadoahngki ire kapw wet pwehn tapihada onop en Paipel?
3 Ia Duwen Atail Kak Doadoahngki Met? Ni omw kin kihla Kahn Iroir, ke kak idek ehu peidek me pid oaralapo me pahn kamwakid tohnihmwo. Karasepe, Kahn Iroir en February kin koasoia dahme kitail sukuhlki sang kokohp en Paipel. Ke kak idek: “Ke lemeleme me kokohp kan en Paipel kin pweipweida ahnsouwet? [Rong pasapeng.] I wadek mehkot me pid ire wet.” Kasalehiong ih peidek kesiluh, wadek parakrap kan, oh pahkalahng iren Paipel me kileldi. Pwurehng wadek peideko oh idek rehn tohnihmwo eh madamadau. Koasoiapene uwen peidek kan me kumwa kak ni omw doadoahngki peidek kan me mie nempe. Mwohn omw kohkohla, kasalehiong ih peidek en mwurio oh koasoanehdi ken pwurala oh kumwa koasoiapene. Pwurala pwehn koasoiapene ire kan ehuehu wihk lao ke pahn kak wahla reh Kahn Iroir kapw. Pil ehu me ke kak wia iei en idek rehn tohnihmwo ni omw tepin tuhwong ih ma e men wia onop en Paipel. Kowe eri doadoahngki ire kapw wet oh kasalehiong ih ia duwen amwa pahn onop.
4. Ia duwen atail pahn doadoahngki ire kapw wet ni atail pwurala rehn aramas akan?
4 Ke kak pil doadoahngki ire kapw wet ong irail me ke kin kalapw wahla neirail Kahn Iroir oh pil irail kan me ke kin pwurala rehrail. Ke kak nda: “Mie ire kapw ehu nan Kahn Iroir wet. I kak kasalehiong uhk ia duwen omw pahn doadoahngki.” Se kapakapki me ire kapw wet pahn sewese me tohto ren “marainkihla me mehlel.”—1 Tim. 2:4.