Akadeiong en Tepida Onop Paipel Rehn Emen
1 “Kumwail sarada oh kilengwohng mwetuwel kan, wahrail kan mahier oh mwahuwongehr en dondol.” (Sohn 4:35) Sapwellimen Sises Krais mahsen pwukat kin pwungiong irair kan me irail Kristian sounkalohk kan kin lelohng rahnwet.
2 Rahnwet miemiehte irail aramas mehlel kan me kin men sukuhliki duwen Siohwa. Met kin sansalda sang ni uwen tohto en irail me kapw kan me kin papidaisla nan ehuehu pahr. Ma ke uhdahn men onop Paipel rehn emen, dahme ke ele pahn koasoanehdi en wia?
3 Koasoanehdi Mehn Akadei: Keieu, wiahda mehn akadei en tepida onop Paipel rehn emen ni kaukaule. Tamataman ahmw mehn akadei ni ahnsou me ke kin iang wia doadoahk en kalohk. Pwehki atail pwukoa en Kristian kin pid en kasukuhl, oh kalohk, eri kitail koaros anahne en nantihong song en kalaudehla atail doadoahk en onop Paipel rehn emen.—Mad. 24:14; 28:19, 20.
4 Ekei Ire kan me Ke Anahne Tamataman: Sounkalohk kan anahne en kin kapakap sang nan arail mohngiong. Ekei pak kitail kin tuhwong aramas kan me kin kapakapki irail en ale sawas en wehwehki Paipel. Ia uwen eh wia kapai ehu ni en Siohwa eh kin ketin doadoahngki kitail ni atail kin diarada oh kasukuhlih soangen aramas pwukat!—Ak. 2:7; Wiewia 10:1, 2.
5 Emen sister kapakapki en kak diar emen me e kak onop Paipel reh oh kasalehda tract me oaralap koasoia Ke Men Kalaudehla Ahmw Wehwehki Paipel? ni eh wasahn doadoahk. Ni ahnsou me lih men pwekada ehu tract ko oh wadekala audepe kan, oh audehda koakon me mih mwurin tract wet, sistero koasoiong ih oh tepida onop Paipel reh.
6 Irail iangatail sounkalohk kan me kin inenen pweida ni arail kin tepida onop Paipel kak sewese iuk en kak lel ahmw mehn akadei en tepida onop Paipel rehn emen. Kapakap ni ahmw pahn rapahki emen oh song en isaneki doadoahngki mehn sawas kan me mie pwe en kak lel ahmw mehn akadei wet. Mwein ni ahnsou keren ke pahn kak iang ahneki peren en onop Paipel rehn emen.