Kitail Koaros Ahneki Mehkot en Kihong Siohwa
1 Ke ese me aramas kak kihong Koht mehkot? Eipel meirongkihla nah mahn me kesempwal akan ong Siohwa, oh Noha oh Sohp wiahda meirong kan me duwehte met. (Sen. 4:4; 8:20; Sohp 1:5) Mehlel soangen meirong pwukat sohte kak kahrehiong Sounkapikada en kepwehpwehla, pwehki e ketin sapwellimaniki soahng koaros. Ahpw meirong kan kak kasalehda uwen laud en arail limpoak ong Koht. Rahnwet, kitail kak doadoahngki atail ahnsou, kehl, neitail mwohni, oh atail kepwe kan pwehn kihong Siohwa “meirong en kaping.”—Ipru 13:15.
2 Ahnsou: E inenen konehng en ‘isaneki’ ahnsou sang irair en sohte nohk kesempwal pwe kitail en iang doadoahk en kalohk laud sang mahs! (Ep. 5:15, 16) Mwein kitail kak kawekila atail koasoandi kan pwe en iang auxiliary pioneer sounpwong ehu de tohtohsang nan erein sounpar ehu. Mwein kitail kak kalaudehla atail ahnsou en kalohk. Ma kitail kalaudehla minit 30 nan ehuehu wihk nan atail kalohk, kitail kak kalaudehla awa 2 nan ehu sounpwong !
3 Kehl: Pwehn ahneki kehl me itar ong doadoahk en kalohk, kitail anahne toupahrek me pid mwadong kan oh doadoahk kan me kahrehiong kitail en nohk pwangada oh sohte kak kihong Siohwa atail kak koaros. Kitail pil sohte anahne en nohk pwunodki mehkan pwe met kak kahrehiong mohngiongitail en tikitikla oh uhd “adihasang” atail kehl me kitail kak doadoahngki ong papah Koht. (Lep. Pad. 12:25) Mendahki ma kitail ahneki kahrepe mehlel en pwunod, ia uwen mwahu en ‘mweidohng Siohwa atail kahpwal akan’!—Mel. 55:22; Pil. 4:6, 7.
4 Mwohni oh Kepwe kan: Kitail pil kak kihong neitail mwohni oh atail kepwe kan en utung doadoahk en kalohk. Pohl kangoange ienge Kristian akan en kaukaule “katohrehsang ekis mwohni” pwehn mie me re pahn kihong irail kan me mih nan anahn. (1 Kor. 16:1, 2) Ni mwohmwohte kitail kak katohrehsang ekis mwohni pwehn wia sawas ong anahn kan ong mwomwohdiso oh doadoahk en sampah pwon. Siohwa ketin kalahnganki dahme kitail kihong sang nan mohngiongitail, mendahki mehkot tikitik.—Luk 21:1-4.
5 Siohwa ketikihong kitail soahng mwahu tohto. (Seims 1:17) Kitail kin kasalehda atail kalahngan sang ni atail kin sapan kihong atail ahnsou, kehl, neitail mwohni, oh atail kepwe kan pwehn papah ih. Atail wiewia kin kaperenda Siohwa, “pwe Koht kin ketin poakohng me kin perenki kihwei mehkot.”—2 Kor. 9:7.