Kangoange Emenemen ni Ahnsoun Kalohk
1 Kitail koaros kin kalahnganki ale mehn kangoang sang “lokaia me kin kohda ni ahnsou konehng.” (Lep. Pad. 25:11, NW) Ni atail kin iang meteikan kalohk, iaduwen atail kak tehk kanahieng pwe atail koasoi en kin wia mehn kangoang?
2 Koasoi en Kangoang: Ia uwen kangoang ni ahnsou me kitail kapataiong atail koasoi soahng kan me pid atail kaudok de atail nanpwungmwahu rehn Koht ni ahnsou me kitail kin iang kalohk! (Mel. 37:30) Kitail kak ehukihpene atail padahk kan me kitail pahn wia de atail ekspiriens kan me kitail perenki sang atail doadoahk en kalohk. (Wiewia 15:3) Mie ire kapw kan me kitail diarada sang pein atail onop en Paipel, makasihn kan, de mihding kan en mwomwohdiso? Mwein kitail kak koasoia ire kan sang kapahrek en wehipokon me kitail ahpwtehn rong nan Kingdom Hall.
3 Mwein kitail kakete nsensuwedla ma mie tohnihmw akan me uhwong kitail ki peidek kan me kitail sohte kak sapengla. E pahn uhdahn mwahu ma mwurin atail kohkohlahsang ihmwo, kitail en uhdi ekis oh koasoiong iengetail sounkalohk kan iaduwen atail kak apwalihala soangen irairo ma e pwurehng pwarada mwuhr, de mwein e pahn mwahu en tehk pwuhken Reasoning. Oh ma ke kalahnganki mehkot sang padahk en iengomwo, omw kasalehda kalahnganki mehlel pahn kihong ih kangoang mehlel.
4 Tiengla Mwowe: Mie ekei nan atail pwihn en pwuhk study me wereilahr atail sohte iang irail kalohk? Pein luke irail en iang kitail kalohk kak imwikihla “sawaspene.” (Rom 1:12) Regular oh auxiliary pioneer kan kin kalahnganki ma mie iangarail ni ahnsoun kalohk, keieu laud nimenseng de mwurin souwas ahnsou me ele malaulau sounkalohk kan. Kitail kak utungada pioneer kan sang ni atail pahn wiahda ahnsou en iang irail. Mie sounkalohk me ahneki kahpwal en roson mwahu me mwein katikihala eh ahnsou ong kalohk? Wiahda koasoandi irail en iang kitail, ele ong atail onop Paipel, kak wia sawas laud.—Lep. Pad. 27:17.
5 Lokaiahn kaping oh kasalehda kalahngan iei ahl akan me kin ahnsou koaros wia men kangoang, mehnda ma ni soahng tikitik kan. Kitail anahne katengehdi met nan atail madamadau ni ahnsou me kitail iang kalohk, pwehki ih me kitail men wia iei “kakehlakahda emenemen.”—1 Des. 5:11.