Sewese Iengomw Sounkalohko
1. Ia duwen atail kak alasang madamadau en wahnpoaron Pohl ni ahnsou me kitail kin iang meteikan kalohk?
1 Wahnpoaron Pohl kin isaneki ahnsou me e kin iang ienge me pwoson kan pwehn wia ahnsoun “sawaspene.” (Rom 1:12) Ni omw kin iang emen kalohk, ke kin isaneki soangen ahnsou pwehn kangoange oh sewese ih? Ke sou ehukihong ih dahme kin sewese iuk en wia sounkalohk men me kin pweida nan kalohk? Ahpw kaidehn nennenlahte iang ih kalohk.
2. Dahme kitail kak wia pwehn kalaudehla ahn iengetail sounkalohko eh kin likih me e kak koahiek oh dahme kahrehda met kesempwal?
2 Kamwakid en Likih me E Koahiek: Ekei sounkalohk kin pehm me re soakoahiek oh met kin sansalda ni meserail de ni ngilarail. Kitail kak kalaudehla arail likih me re kak koahiek ni atail kin kapinga irail ni mehlel. Pil ia ekei ahl kan me kitail kak kihong irail pepehm wet? Emen sounapwalih me kin seiloak kin padahkihong ienge sounkalohk duwen soahng dah kan me e kin perki oh ia duwen e kin kalapw kapakapki sawas pwehn kak powehdi soangen pepehm pwukat. Me pid duwen dahme kin sewese emen brother tohrohr en kasalehda me e likih me e koahiek, e koasoia: “E kin tepikihda pohkomwokomw. Ekei pak I kin anahne kapakapki sawas pwe ien kak pohkomwokomw.” Mie mehkot me kin sewese kalaudehla ahmw likih me ke kak koahiek nan doadoahk en kalohk? Ehukihong iengomw sounkalohko duwen met.
3. Dahme kitail kak ehukihong iengetail sounkalohko pwehn sewese kalaudehla eh kin pweida mwahu nan kalohk?
3 Ehukihong Wiepen Kalohk kan: Mie tepin koasoi de peidek me ke diar, mwein mehkot me pid duwen dahme wiawi pohn sahpwet, me mwahu ong tapiada padahk nan kalohk? Mie mehkot me ke pein kapataiong wiepen padahk kan me kin doadoahk mwahu nan kalohk? Kasalehiong iengomw sounkalohko duwen met. (Lep. Pad. 27:17) Erein amwa kohkohlahng pwurehng tuhwong emen, ke kak ehukihong ih dahme ke men kapwaiada erein onopo oh ia duwen omw pahn wia met. Mwurin onop en Paipel ehu, ke kak kawehwehiong iengomw sounkalohko ia kahrepen omw pilada ire ehu de iren Paipel ehu de wiepen padahk ehu pwehn sewesehki dahme tohnsukuhlo anahne.
4. Dahme kahrehda kitail anahne nsenohki sewese iengetail sounkalohk kan?
4 Sounkalohk kan ni mwein tepin Kristian kan kin perenki sewese irail me soh pwoson kan. Ahpw irail kin pil kilang kesempwalpen kangoange oh kakehlaka emenemen. (Wiewia 11:23; 15:32) Wahnpoaron Pohl kaiahnehda mwahnakapw Timoty. Ih eri kangoange en ehukihong meteikan dahme e sukuhlkihdi. (2 Tim. 2:2) Ni atail kin tamataman wia mwahu ong iengetail Kristian kan nan doadoahk en kalohk, kaidehn ihte arail peren oh koahiek me kitail kin kalaudehla. Kitail kin pil kaperenda Samatail nanleng.—Ipru 13:15, 16.