Wia Sawas Mwahu ni Ahnsoun Kalohk
1. Kamwahu dah me kin kohsang atail kin iang emen sounkalohk?
1 Ehu ahnsowo, Sises ketin kadarala sapwellime tohnpadahk 70 pwehn kalohk oh e “ketin poaronepeseng mwowe, wad riemen.” (Luk 10:1) Sansal me koasoandi wet kin kahrehiong sapwellime tohnpadahk ko en kak sawaspene oh kangoange emenemen ni arail kin kalohk. Ni atail kin iang emen sounkalohk, ia duwen atail kak sawas?
2. Ia duwen atail pahn rong ni iengetailo eh kin wia padahk? Dahme kahrehda?
2 Rong Kanahieng: Rong kanahieng ni iengomwo eh wie padapadahk. (Seims 1:19) Ma e wadek ehu iren Paipel, iang wadek ireo nan noumw Paipel. Kilang iengomwo de tohnihmwo ni ara koasokosoi. Ma ke kin rong kanahieng, met kak kamwakid tohnihmwo en pil rong.
3. Iahd me iengetailo ele pahn peki atail sawas?
3 Ese Iahd me Ke Pahn Koasoi: Ni atail kin iang emen me wia eh padahk, kitail kin wauneki ih ni atail kin mweidohng en koasoi. (Rom 12:10) Kitail en dehr kauwe ara koasoi. Ma iengetailo manokehla dahme e pahn nda de tohnihmwo kihda ehu peidek de uhwong oh iengetailo peki atail sawas, kitail en kalaudehla koasoia dahme iengetailo koasoiaiehr ah kaidehn kihda ehu ire tohrohr. (Lep. Pad. 16:23; Ekl. 3:1, 7) Atail koasoi en wia sawas ong dahme iengetailo koasoiaiehr.
4. Dahme pahn kalaudehla atail peren oh pweida nan doadoahk en kalohk?
4 Ni en tohnpadahk 70 ko me doadoahkpene ni wad riemen kanekehla arail kalohk, re “pereperen kowahlap.” (Luk 10:17) Kitail pil pahn ahneki peren oh pweida nan atail kalohk ni atail kin rong oh ese iahd me kitail pahn kak sewese iengetail kan.